umuvugo- RWIBARUTSE UMUBANO

RWIBARUTSE UMUBANO

Mbega ibyiza, mbega ibirori

Ngizi impundu nkesha umwali

We wansanganije urukundo

None rwibarutse umubano

 

Urukundo ruhuza abantu

Isimbi ryanjye murariruzi

Irebero mu bali murarireba

Mumwishimire ni umurinzi

Ni we nkesha ibirori byiza

 

None ko rwibarutse umubano

Mwali mwiza, mwali nshima

Urabishaka ko uwo mubano

Ukomezanya n’abawushima?

 

Urabishimye se mbyirate

Mbyivuge ijoro n’umunsi

Ko mfite umbereye muri bose

Uje ngo tubane ijoro n’umunsi

 

Nguyu ndatira isi n’abayo

Nguyu nkesha ijuru n’abaryo

Naze twimikane urukundo

Maze rwibaruke umubano

 

Simbi ryererana mu yandi

Uri ingenzi indutira abandi

Uri mukesharugo urutahe

Uri mutima utagira inenge

 

Ibyawe byose birahebuje

Uburanga n’uburere byawe

Ndangamirwa urayoboye hose

Ni wowe ndatwa ibahiga bose

 

Ibyawe byose ubiha umurongo

Ni yo mpamvu uhorana intego

Rudatsimburwa ku mutsindo

Uziturwa na Nyir’ubugingo

 

Urwo nkesha guhora nkusanga

Komeza urwuhire mu ntego

Rutabyara ibyo tudashima

Kandi rwibarutse umubano

 

Komeza urwuhire uwo ubigomba

Uwo bitagomba abone ibimukwiye

Azire kwivanga aho bidakwiye

Ahubwo anyurwe n’ibimugomba

 

Ubwo rwibarutse umubano

Hazaza n’ibindi kandi byiza

Bigusange uri mu mubano

Bibe ibyuzo by’urukundo rwiza

 

Nubishima ko bigusanga

Uzakeshwa kuruta uko ukeka

Uzambikwa urugoli n’ababyeyi

Bizaba ari ibirori bihire

 

Bazaza bose bateze yombi

Bose bijihijwe nawe simbi

Abo babyeyi baguhe impundu

Ziruta iz’uwibarutse umuhungu

 

Bazabikorera urwo rukundo

Kuko rwibarutse umubano

Ukabishima ko rubahuza

Bakarushima rukabagenga

 

Nguwo umunsi w’amateka

Uzaba irebero mu bandi bana

Cyane cyane abafite iyo myaka

Iy’abarwimika rukabahuza

 

Nibwo uzashagarwa na benshi

Bagutambagije nk’umwami

Wowe ubabereye umwamikazi

Umwami akubereye nk’umurinzi

 

Nibwo uzamenya ko uri ingenzi

Gahuzamiryango kuruta byeri

Maze wivugirwe n’abasaza

Banagutambire mu neza

 

Icyampa ibyo birori bigataha

Bigatahana umugisha mwinshi

Amahoro, amahirwe bikawuranga

Umucyo ntiwimukire umuvumbi

 

 

N’ubu njye ndishimye

Nizihijwe n’umwali

Keza, karabo wanjye

Antangije mu ishuli

 

Nanyemeze muri aha

Ko atazantaba mu nama

Nkasibira ntabishaka

Kandi afite ubuhanga

 

Nasubiremo yemye

Yeruye atajijisha

Isezerano mukesha

Ngo twembi twishime

 

Nabe umuhamya wabyo

Imbere y’abamubyaye

Agaragaze umucyo wabyo

Ashimirwe nk’uwabyaye

 

Niyerure ariko amwenya

Ko rwibarutse umubano

Anahamye uwo abikesha

Uwo batangiranye umubano

 

Nakore uko abishaka

Ahumure simuveba

Nahamya ko mbikwiye

Kwitwa koko umukwiye

 

Nahamya ko mbikwiye

Kumubera umutware

Nanjye ndahamya rwose

Ko ariwe mutoni wanjye

 

Nanjye ndahamya rwose

Ko ariwe rubavu rwanjye

Nkomeze mbishimangire

Ko nzamuhora iruhande

 

Nzamuhora iruhande

Mukeshe kuko abigomba

Museguze ibitamuhanda

Azahora ambona impande

 

 

Tuzagana iy’urukundo

Mutembereze iyo rutaha

abone ko ndi mukesha

Dukeshanye mu mutuzo

 

Azaba munezero

Kandi abe na mukesha

Yongere abe umuraza

Intaho y’umunezero

 

Azaba umufasha mwiza

Wizihiye umukunda

Azamurutira byose

Iteka no muri bose

 

Nanjye utari ikigwari

Mpano ya Mwimanyi

Nzaharanira mpatana

Kuguhora ku mutima

 

Nzaharanira mpatana

Kuguhunda ibyo byiza

Bya bindi uhora urota

Uberwe no kubyihaza

 

Nzifatanyiriza nawe

Kubaka ijuru ryacu

Abacu na bo baritahe

Twizihirwe mu byacu

 

Ngaho mukunzi wanjye

Ishimire ko wankunze

Ubirate imihana yose

Niba koko bikwiye

 

Ubibwire abahita bose

Ko wiboneye ugukunda

Ubahiga muri byose

Ukereye kukurinda

 

Uti ‘mundekere umukunzi,

Rudakangwa n’abahizi

Mukundwa ni we murinzi

Mu bahizi ni Ngorabahizi