Umuvugo: Mahoro yanjye

Umuvugo: Mahoro yanjye

Mahoro yanjye ko mbona umpunga

Buzima bwanjye ko mbona urenga

Oya simpunga njye nza ngusanga

Nyoberwa ahubwo igituma umpunga

Ni jye ugukunda njye wakubyaye

Nkutesha kamere nkutoza iyindi

Ngo uhunge urupfu ugane ubugingo

Nyoberwa ahubwo igituma umpunga

Ko nkukunda njye ntakuryarya

Nkagukiza nkubera Muganga

Ngo tubane nerza bizira uburyarya

Nyoberwa ahubwo igituma umpunga

Tega amatwi utuze mbikubwire

Bitaba amabwire ubyiyumvire

Ibyiza nagukoreye ikanga

Nyoberwa ahubwo igituma umpunga

Ni jye wakuremye ndakurinda

Utaranavuka sinagutaye

Aho uvukiye ndanezerwa

Nyoberwa ahubwo igituma umpunga

Utaranabona sinakwinubye

Nakubyaye bundi bushya nkukunze

Ngo ube mu muryango w’abansenga

Nyoberwa ahubwo igituma umpunga

Sinatereye iyo narakureze

Nkurinda gusonza ndakugaburira

Sinagutaye ahubwo narakurinze

Nyoberwa ahubwo igituma umpunga

Umubiri wanjye sinawugukinze

Narawuguhunze ngo twibanire

Sinaguheje iwanjye ku meza

Nyoberwa ahubwo igituma umpunga

Naraguhaje ngumya kurera

Nkutoza ibyiza ndagukiza

Ndanagukomeza ngo ujye guhamya ibyanjye

Nyoberwa ahubwo igituma umpunga

Nakurinze ukiri urusoro

Ndakubyara ndakugaburira

Ndagukuza ndagukomeza

Nyoberwa ahubwo igituma umpunga

Nubwo wankosereje ukampemukira

Ndihano mbwira icyo unshinja

Ngo twese dusabane imbabazi

Nyoberwa ahubwo igituma umpunga

Terura umbwire ndi hano wese

Ushire agahinda unsangize ibyawe

Menye ibyo ushaka ngo uhore ukeye

Nyoberwa ahubwo igituma umpunga

Nibyo mubyeyi sinakubeshya

Ndakubwiza ukuri kumwe udutoza

Nkurondorere byose usanzwe uzi

Maze mbone ngere ku ntsinzi

Sinarota nkubeshya uzi byose

Ngo nkwihishe kandi uba hose

Ngo nkere kukurushya ubasha byose

Iteka ryose ndetse na hose

Unyibukije byinshi wankoreye

Bintera kwibuka ibimbereye

Mbabazwa n’uko ntigeze mbikunda

Nyoberwa ahubwo igituma umpunga

Batisimu yangize umwana wawe

Ibyo nkora bituma ncika iwawe

Kuko ibikorwa byanjye utabikunda

Nyoberwa ahubwo igituma umpunga

N’umwambaro wera wanyambitse

N’utuvuta twiza wansize

N’urumuri rwawe wangabiye

Nkaba ntazi iyo ibyo byose byarengeye

N’igaburo ryawe neguriwe

Ngo nshire umururumba nzire inzara

None nkaba nirirwa nangara

Nyoberwa ahubwo igituma umpunga

Warankunze urabinyereka

Aho kurushaho kugushimisha

Ngo nkukunde ibi bizira uburyarya

Ndakurererega ndihaza

Ubuse kosntasonzeye iwawe

Ko ntacyo nkushinja utakoze

Mbura iki ngo ntore ibyawe?

Nyoberwa ahubwo igituma umpunga

Ese ko wandinze ukampa n’imbaraga

Ukanyiha udasize na Roho wawe

Ngo nkurye untunge nkuhumeke

Mba nekereza nte iyo nkuhunga?

Nanubu iyo ntuje nkagutekereza

Nkireba hose ninenga

Nkigenzura wese uko ngenza

Nyoberwa rwose igituma undinda

Ariko kandi nturi umubyeyi

Kuko ibyabo byose ntubiyobewe

Bo batanga batitanga

Ahubwo uri Imana

Ikikuranga ni urukundo

Imbabazi nyinshi n’impuhwe

No kuduhaza uduhumuriza

Ngo tukugarukire ritararenga

Mbabarira dawe wowe wambyaye

Nirengagije ibyo wankoreye mvuka

Mbirengaho ndaguhemukira

Nohoka mubyo wambujije gukora

Mbabarira Yezu wanyihaye

Ngo shire irari ntungwe nawe

Ngo nzire inzara umbere impamba

Sinaguhabwa ngo undamire

Mbabarira Roho nahawe na Rurema

Ngo nkumvire nkunde nkomere

Ngo ngukunde umpunde ingabire

Sinabikozwa ibyo kukumvira

Mumbabarire rwose naragomye

Kandi ukuri kwanyu ntaragukinzwe

Ngo mbone impamvu njye mu byanjye

Narakumenye ndakurerega

Mbabarira mubyeyi w’imico myiza

Nyoberwa rwose igituma unkunda

Ukandinda kubona ibinkwiriye

Byabindi by’abakugomeye!

Dore ndi hano nje wese

Nkusaba imbabazi ntiyererutsa

Nkusaba ubufasha burenze ubundi

Ngo mbone uko nahinduka ukundi

Ndabizi neza sinabishobora

Kugukorera wese nkuko ubishaka

Ariko kandi ndabyemera rwose

Ko ibyo n’ibindi mbishobozwa nawe

Ibyo nakoze ni byinshi

N’ibyo nijanditsemo ni uko

Bimwe birwanya ubukristu

Ariko nabuze ibyaruta ibyawe

Ntabyo nabonye ngo nkukureho umutima

Ngo nkureke burundu nigendere

Niyo mpamvu nsaba imbabazi

Ngo nzihabwe nkere guhinduka

Mbabarira none dore ndaje

Nje wese rwose na roho yanjye

Umpunde imbaraga nzinukwe icyaha

Mbone ngusange maze tubane

Iyi si ntuye mfasha nyihunge

Ndeke kuyikorera nkiyituye

Mparanire ibyawe nyurwe na we

Nizihirwe no kuba mu bawe

Dawe mwiza uzira uburyarya

Ndabikubwiye sinkubeshya

Ndabigusabye sinihenze

Ngo umfashe rwose sinshoboye

Dawe mwiza nje mbishaka

Yezu wanjye nje ngusonzeye

Roho nziza nkubere icumbi

Mariya mwiza nje nkugana