BIKIRA MARIYA NI MUNTU KI

1. BIKIRA MARIYA NI MUNTU KI?

By Fratiri Eric HATANGIMANA

Bikira Mariya yavutse nk’abandi bana b’abakobwa, akura nk’abo ariko batanganya umugisha kuko mbere y’iremwa ry’ibihe, Imana yari yamuteguriye kuzayibera umubyeyi mu nsi. Ahagana mu mwaka wa 20 mb.k, ni ukuvuga ahagana mu mwaka wa 728 w’ishingwa rya Roma, mu gihe umwami Herodi yaratangiye kuvugurura Ingoro y’Imana i Yeruzaremu, nibwo Bikira Mariya yari hafi kuvukira mu majyaruguru y’iyo ngoro. Yavutse ku babyeyi ANNA na YOWAKIMI. Bikira Mariya rero ni we wari ugiye kuzabera Imana ingoro nyayo mu nsi; ingoro idashobora gusenywa n’abantu bityo amasekuruza yose akazamwita umuhire (Lk.1,48). Uwo mwana Mariya ntazigera ahangarwa n’ubushyanguke bw’ikuzimu; uko yakujijwe mu mutima we ni ko bizamera no mu mubiri we nk’uko ihame ry’asomusiyo ribivuga. Iyo tuvuze ku izina Mariya, hari icyo riduhishurira n’ubwo ryari risanzwe rimenyerewe mu gihe cye. Tuzi ko ba mariya muri Bibiliya ari benshi nk’uko abasaveri babiririmba. Iryo zina kimwe na Marita, abenshi mu bahanga bemeza ko rikomoka ku ijambo ry’ururimi rw’icy’aramiya, “Mara” risobanura “umugore”. Mariya ubwaryo rigasobanura umwamikazi cyangwa umugore wiyubashye.

Mu kwezi kwa gatandatu nyuma y’igitangaza cyari cyabaye kuri Elizabeti mubyara we cyo gusamira mu zabukuru, ni bwo Malayika Gaburiyeli yaje iwabo wa Mariya, maze amugezaho ubutumwa bw’Imana ko agiye gusama inda ku bwa Roho Mutagatifu. Icyo gihe Bikira Mariya yari umuturagekazi wo mu majyaruguru ya Yeruzalemu, mu mudugudu witwa Nazareti. Yari yarasabwe n’umusore w’umubaji witwa Yozefu wo mu muryango wa Dawudi; icyo gihe imyaka yari hagati ya cumi n’ine na cumi n’itandatu. Nyuma yo kwakira indamutso ya Malayika nk’indamutso y’amahoro(Shalom) cyangwa y’ibyishimo, tubona Bikira Mariya nk’umwari udasanzwe “wuzuye inema, Nyagasani ari kumwe nawe” mu yandi magambo Mariya ahorana na Nyagasani ku buryo izina rye rishobora gusimbuzwa “uwuzuyimana, umutoni w’Imana” cyangwa “uhorana n’Imana.” Aha ni ho humvisha ko Bikira Mariya ari utasamanywe icyaha, akaba kandi umwari w’isugi mbere na nyuma y’ivuka rya Yezu Kristu.

---

[1] Inyigisho ya Eric HATANGIMANA (arangije Filozofiya muri Seminari nkuru i Kabgayi)

INKURU Y'URUKUNDO - RERE NA RAMBA PART 22

Ramba arangije gusenga, asaba Rere kuza bagasangira iwabo kugira ngo abonereho umwanya wo gusezera ababyeyi be. Rere arabimwemerera ariko na we arabimusaba nuko Ramba aramusubiza ati: “ibyo wankoreye ni byinshi, ntacyo wamburana nkifite. Uyu munsi ni njye nawe! Dore ko tutazongera guhura kubera amasomo.” Rere amusubiza yisekera ati: “Ngo iki? Ahubwo uzatungurwa nugera ku ishuri! Dutahe!” Bombi barahaguruka baboneza igana iwabo wa Ramba. Bagezeyo Mama Ramba abakirana ubwuzu; abazanira intebe, abahereza umusururu mu gikombe ababwira ati: “Bana banjye se ko mutazongera kukabona iyo ngiyo; nimugasezere!” Rere agiye gutaha, Papa Ramba yarababwiye ati: “Muzakomeze mwitware neza. Ntimuzadukoze isoni kandi mwarabaye intangarugero mu bwana bwanyu. Muzakomeze mubane neza, mufashanye aho bishoboka, muzigane umwete kandi mujye mukunda gusenga bana banjye!”

Ramba asubiza Se ati: “Urabizi Papa, kuva nkiri muto, sinigeze nkukoza isoni mu bandi babyeyi. Kandi nta n’umwe muri twe wigeze aba ingalisi[1]. Ngusezeranije ko nzaharanira ko uzajya wishimira ko wambyaye!”  Nuko Rere arasezera hanyuma azamukana na Ramba iwabo. Batararya Rere yari yahamagaye murumuna we amubwira ko ari kumwe na Ramba kandi ko bari butahane. Ramba ageze iwabo wa Rere, yasanze bitarashya kuko banakundaga gutarama cyane. Baricaye baraganira, bumva inama bagirwa n’ababyeyi, ibiryo biba biraje ngo barye. Rere abwira ababyeyi be ati: “Uyu munsi ntabwo turi busangire; ndasangira n’umushyitsi!” Barangije kurya Ramba arasezera ngo ajye kwitegura neza kugira ngo abone uko za kuzinduka. Bucyeye bafatanya urugendo rugana ku ishuri. Icyaje gutungura Ramba ageze ku ishuri nuko yasanze yaramwishyuriye icumbi ryegereye iryo yabagamo; bari batandukanijwe n’imiryango ibiri gusa. Kenshi gashoboka, Rere na Ramba basangiraga ibyo kurya; bahuraga kenshi gashoboka dore ko bombi bari n’abasomyi b’Ijambo ry’Imana, hari n’izindi nshingano bashinzwe mu kigo mu bijyanye n’iyobokamana. Rere akirangiza kwiga yahise abona akazi, aza no kugashakira mushuti we ubwo yari ageze mu mwaka gatatu kugira ngo abone udufaranga two kwikenuza kandi bizamworohere kubona akazi arangije bityo ntazahere ku muhini[2]. Nyuma y’umwaka umwe arangije, Ramba yasinye amasezerano y’akazi y’imyaka icumi ishobora kongerwa.

Ubwo Ramba yajyaga gutangira akazi, iwabo bari mu bukene ndetse byari no mu gihe cy’itumba. Bituma yiyambaza inshuti kugira ngo abone uko yabaho mu gihe atarahembwa. Rere wamukundaga cyane ntiyitaye kubyo yari yaramutakajeho mbere byose, ahubwo yakomeje kumuha amafaranga. Ntiyishimiraga ko umukunzi we yabaho nabi kandi we afite ubushobozi n’ubwo butari buhagije. Yaribwiraga ati: “ubu se nabaho ntuje, umukunzi wanjye amerewe nabi? Oya, ntibikabe. Mu bushobozi buke mfite, nzamufasha kwishima no gushimira Imana yatumye yemera kunkunda. N’ubwo yambera umwana mubi, njye nzakomeza kumubera indahemuka. Ndamukunda, ntakabeho nabi nshoboye kumufasha.” Ramba na we akaba umusore ukunda kubwira umukunzi we akamuri ku mutima kose, akavuga kandi uko yishakiye kuko yanganga guhisha umukunzi we ikimurimo kandi akanatinyako umukunzi we yamufata nk’umuntu ukanganye cyangwa utamenya uko ateye. Yifuzaga ko umukunzi we yamumenya byuzuye binyuze mu myitwarire, imivugire no gutebya. Nguko uko Ramba na Rere babanye mu rukundo rurambye kandi ruharanira kutimika uburyarya.

---

[1] Iri jambo riva ku nshinga kugalita isobanura kugira ubunebwe

[2] Guhera ku muhini = kuguma mu bukene

TUJE KUVUZA IMPUNDU

TUJE KUVUZA IMPUNDU

Tuje kuvuza impundu

Twambariye gushima

Imana Nyir’ugusengwa

Impundu zivuzwe iwacu

Iwacu turishimye

Twibarutse n’impanga

Abali babiri beza

Impundu nibazihabwe

Nibemere tubashime

Dushimira iyabatoye

Bakegukana n’ibyabo

Ngo biyegurire ibyayo

Tuje kuvuza Impundu

Dushimira abo babyeyi

Bibarutse aba bali

Bakemera kubatura

Impundu murazikwiye

Mwebwe ndereyimana

Kiliziya irabashima

Mwareze uko bikwiye

Mwibarutse ibibondo

Mubitoza umurongo

Wo gukunda by’ikirenga

Umuryango w’abemera

Impundu zivuzwe iwacu

Zitwibutse igihe cyacu

Twiyegurira Imana

Ngo tubone uko twitanga

Twabikoze ari byiza

Twihitiyemo neza

Mbese ubu biragenda

Cyangwa ntibikigenda

Birya wari warahize

Na za ngufu zakuranze

Ukimara gusezerana

Ni byo bikikuranga

Impundu zivuzwe iwacu

Kuko tukibishaka

Kandi tukibikundfa

Birya bikwiye abacu

Birya biranga abacu

Twongere tubihugukire

Biture imitima yacu

Ibyo byiza bitunagure

Nitwemera tugatuza

Tugasubira ku isoko

Kiliziya n’umuryango

Impundu zivuzwe iwacu

Mwebwe abakretsiyene

Mwongere mwishime

Mubonye imbaraga nziza

Zikereye gukora neza

Muzikomeze mubane

Mugezanye ku Mana

Mwiyeguriye mwese

Muyibere abahire

Ngaho nimubarebe

Mwongere mubasubire

Intore z’Uwaduhanze

Bakwiye ibirori bihire

Namwe babikira bacu

Mubyumve si umunyenga

Si no guhunga iwanyu

Bitumye mwiha Imana

Ni Kiliziya mukunda

Mukore mubire akuya

Mwamamaza Kristu

Aganze ubuzima bwacu

Nimwambarire gushimwa

Mushimwa n’Imana

Yo ibatuma kuri bose

Isonga rikaba abakene

Kubaha bibe ibyanyu

Muhorane guca bugufi

Na Sainte Chrétienne

Azabasabira ibyiza

Nimwigire kuri Mariya

Urugero rw’ababikira

Mwambaze ubudatuza

Roho ubaha gutsinda

Imana impaye nk’ibi

Nahora nyiririmba

Nyishimira ubudatuza

Nkizihirwa muri ibi

Naharanira nshikamye

Kuba nk’uko ibishaka

Nkemera ntajuyaje

Kugana aho Imana inshaka

Naharanira iteka

Ko ahora avugirizwa impundu

Igihe mpuye n’abantu

Kubera ibyo bankesha

Namaramaza rwose

Mparanira igihe cyose

Ko kwiyegurira Imana

Bimbera isoko y’ubuzima

Nagaragaza mpatana

Nkabigirana urukundo

Ko Kiliziya ubu ihirwa

Kuba imbonyeho ituro

Naharanira neza

Ko iwacu hahora impundu

Umuryango ugakundwa

Kristu akaba ubukungu

Nk’ubu mbaye beyata

Nakomeza gushima

Simbure ku rugendo

Nkakomeza umurongo

Nafasha abadusanga

Mbereka ubwo buryohe

Bwo kwiyegurira Imana

Ukabaho ukennye utuje

Naba umuhamya wabyo

Irebero rudasumbwa

Nkaharirwa kubanza

Ngo umukiro ubatahe

Naha ubuzima bwanjye

Icyerekezo kimurika

Isengesho n’umutuzo

Urugendo n’urukundo

Nkubu mbaye Jeanne

Byose bituma nkundwa

Byakora ubudasiba

Ngo umukiro utahe bose

Nakora ubudahuza

Nkabusanya n’iyo ntego

Nkatenguha uwo muronbgo

Wa sekibi n’abamukunda

Nazirikana iteka

Ko satani adatuza

Kandi ko ari jye ashaka

Nkamurwanya ubudahuguka

Njye rebero ryo mu bali

Nakomeza iyo ntambwe

Yerekeza Aritali

Intaho y’abatsinze

Miryango muri hano mwese

Nguru urugero rwiza

Mutoze abo mushinzwe

Kubaho banyura Imana

Nimube urugero rwiza

Abana batozwe namwe

Maze ibyo bakora byose

Binyure Ushobora byose

HUNDWA IMPUNDU

HUNDWA IMPUNDU

Hundwa impundu Padiri wacu

Uhorane ihirwe i Bungwe iwacu

Uwagutoye akube iruhande

Agumye agushoboze guhora ukeye

Hundwa impundu kuko ubikwiye

Ibikorwa byawe ni byo bikurata

Rudasumbwa ni wowe ndata

Kubw’ikuzo uhesha Uwagutoye

Padiri mukuru ni wowe ushimwa

Kubera Bungwe ugize amahanga

N’abanyamahanga barikanga

Iteka ryose uri Nyagushimwa

Uwareba iyi Paruwasi

Akazengeruka Diyosezi

Yabona Musenyeri akwiye

Kwimuka akaba i bungwe

Ibitusi, imbingo ntiwabishimye

Ni mu gihe rwose ntibinakwiye

Ubisimbuza ayo matafari

Harakunda haba nk’ibwami

Inyubako nziza turazitaha

Zirimo amacumbi n’ibiro byiza

Uti: “nimutuze biracyaza,

N’ibindi biraje murabitaha”

Kiliziya yacu urayisukura

Uyiha imiryango ikurura abantu

Urahazitira ngo hatavogerwa

N’abadakwiye kuba aho hantu

Mbe nshime ngarukire he

Ko mbona ahandi harutwa n’iwacu

Kubera wowe mubyeyi wacu

Ukora ubudasiba ngo hase ukundi?

Bikira Mariya waramutuje

Nyir’impuhwe yimikwa i Bungwe

Twakuveba iki mubyeyi wacu,

Tubona ibyiza bigana iwacu?

Turashimira Uwagutoye

Akakugenera kuba i Bungwe

Urahakwiye si ibyo guhanga

Uragashoboye ako kuhahanga

Musenyeri wacu yarakubonye

Ati: “uyu ndambuyeho ibiganza,

Atabaye Padiri mukuru nahomba”

Ntibukeye aba aje kukwimika

Ubukuru bwawe buhera i Bungwe

N’ubwo wari muri Diyosezi

Ushinzwe imirimo y’ikirenga

Ati: “ibyo birenga bigane i Bungwe”

Turashima umushumba wacu

Kubera Mundere waje i Bungwe

Akahatura hagahora ibyangwe

Ngo hake hasukure imitima yacu

Uri intwari njye simbeshya

Uri intore izirushya intambwe

Yisunga Umukiza isanga

Igahora imwigera mu ntambwe

Komereza aho turagushima

N’ubwo twavuga ibyo udakunda

Uri umubyeyi, jya umenya icyiza

Ugikore wemye tuzakumva

Menya abo ushinzwe n’imico yabo

Harimo abashima n’abadashima

Nyamara njyewe igituma nkurata

Ukora igikwiye ukareka ayabo

Roho udusangiza aragusange

Aguhe Ingabire ukeneye i Bungwe

Ukomere twubake Paruwasi

Tujye mbere hamwe na Diyosezi

Uwanshoboza nkaba mbikwiye

Nakoranya abahamya, abahanga

Tukemeza bose ko utari Mundere

Ugahinduka ukaba’Mbarere’

Abakureze turabashima

Ababyeyi na kaminuza

Naho ubundi mu butumwa uhabwa

Uri ‘Mbarere’ rwose turagushima

Horana impundu ni wowe Padiri

Ubere Kiliziya ishami ry’umutari

Ureke abatumva umurongo wawe

Ugume ukorere Umukiza wawe

Sinasoza ntavuze shapeli

Y’agahebuzo muri Diyosezi

Ingendo nyinshi zigane i Bungwe

Umukiro wa benshi uturuke i Bungwe

Uri indatwa no mu gutaka

Ugeze mu Ngoro ukarora hose

Uhita uharanira muri byose

Kwiha Yezu we Nyagutaka

Roho nahawe Nyir’ububasha

Usendere Mundere wacu

Padiri mukuru waduhaye

Umushoboze guhora atsinda

Turamugutuye ngo umwigombe

Umuhore hafi, akube iruhande

Azire guhunga ibitagukanga

Akwisunge mu bimukanga

Uramushoboze mubyo ashingwa

Ntagasebye ubuvunyi utanga

Musendere kuruta uko akeka

Mubyo ashaka uhahore iteka

Horana impundu Padiri Mundere

Gahore ushimwa n’Uwagutoye

Aguhe impagarike n’ubugingo

Ukomeze wagure uwo murongo

---

[1] Uhimbiwe Padiri MUNDERE Dominique Savio

INKURU Y'URUKUNDO- RERE NA RAMBA PART 21

Rere aramushimira, hanyuma akomeza ijambo rye agira ati: “Nababajwe bikabije n’ibyakubayeho bifitanye isano nanjye. Ibyo byararangiye reka dukomeze ibishya. Mu kukugaragariza ko nkukunda kandi nkwitaho, ko uri ingenzi mu buzima bwanjye, naguteguriye impano ariko ndayiguha ubanje kunsezeranya ko utari butangare cyane kandi ukayireba udahagaze kugira ngo ntongera kugukururira ibyago.” Ramba amusezeranya ko ari ntacyo ari bube, ati: “Humura rwose, ahubwo yimpe ndebe!” Rere niko kumuhereza ibahasha ifunzwe neza; Ramba ayakirana amatsiko menshi yibaza ikirimo. Iyo bahasha Ramba yayisanzemo inyemezabwishyu yo kwiyandikisha muri kaminuza n’urupapuro ruhamya ko yishuye icumbi ry’amezi atatu. Ubwo Ramba yahise yumirwa, abura icyo avuga kuko mu burwayi bwe atigeze atekereza ko Rere yamutera igika[1] atyo. Ubwo icyunzwe kiramurenga. Rere abonye ko bigenze gutyo, afata agatambaro kera yari afite agahanaguza mu ruhanga rwa Ramba, amuhanagura n’ibiganza hanyuma amufata ku ntugu, aramubwira ati: “Ibuka ibyo wansezeranije hanyuma ukomere.” Ramba aramusubiza ati: “Ndabyibuka mukunzi wanjye, ubu ndumva meze neza!” Ramba yarambitse impapuro hasi hanyuma arahaguruka, abwira umukunzi we ati: “ubu nkukorere iki? Nzakugire nte koko?” Rere aramusubiza ati: “Nta kindi nshaka kitari ukunkunda; unkunde kandi uzakomeze kunkunda!” Ramba aramwegera, aramuhobera maze amwegereza umusaya aramubwira ati:

“Uri mwiza Rere

Igitego mu bakobwa

Impano itagira uko isa

Nkesha Umuremyi wanjye

Uri mwiza mu bandi

Ubarutabose uri irebero

Uzira kujorwa mu ngiro

Umenya igikwiye kiruta ibindi

No mu mvugo ntuhigwa

Ugatera kunyurwa uwo ukunda

Bityo agahora akwizihiye

Kuko nawe uhora umwizihiye!

Nzagukunda kuruta uko nzi

Bizaguhira kuruta uko ubikeka

Tuzabana tuberane umurinzi

Mu byacu hazaganze kunezerwa!”

Nuko aramuterura, amuzengurutsa mu kirere amurimbira ati: “Urankunda nkanyurwa, nzagukunda kubarusha, nzakurinda kwicuza, nzagutera kunezerwa, nkubere uko ubyifuza kutanyuranya na Rurema!” Rere na we akamwikiriza agira ati: “Nzagukunda urudashira, ndugukunde uko uri kose kuko umbereye ishema. Ishema ryanjye ni wowe. Nzakubera isoko y’umukiro, n’ibyishimo bidakama. Iteka ryose no muri byose, aho ndi hose nzaberwa no kuba uwawe!” Ramba amaze kumva Rere amurirmbira amushyira hasi ngo bakomeze baganire; Rere amusobanurira uko yabigenje kugira ngo amwandikishe kandi anamwishyurire icumbi, nuko bombi barishima. Rere abwira Ramba ati: “Ngibi ibyo nari narabuze; kuganira nawe nkureba mu maso wishimye, kumva undirimbira no kuba mu maboko yawe. Ndabikunda rwose! Hashimwe Imana yagukijije, ikaba iduhaye kongera kunezerwa mu rukundo rwacu!” Ramba wari wishimye cyane afata Rere mu biganza, nuko amuririmbira ibitero bibiri by’akaririmbo kitwa ‘undutira abandi’. Arangije asaba umukunzi we kumwicara mu maguru na we amunyuza amaboko mu mbavu, bahuza ibiganza nuko aca bugufi bahuza imisaya hanyuma Ramba aterura agira ati:

“Shimwa Mana yanjye, Soko y’urukundo ruzima; urukundo nyabuzima ruzira uburya! Ubwo nari ndwaye nagaragaje intege nke no gushidikanya ko unkunda, ariko binyuze muri uyu mwana wawe Rere, wongeye kunkomereza ukwizera, ungaragariza ko no mu bubabare bwo kuri iyi si ihita ukomeza kurwana ku bagaragu bawe ukunda! Urankunda rwose, sinkishidikanya. Ngushimiye uyu mwana wahaye umutima ukunda by’ukuri kandi ukamuha kungaragariza no kunsangiza by’umwihariko urwo rukundo wamuhunze. Uramurinde, umukomezemo uyu mugenzo mwiza wamutangijemo kugeza ku ndunduro y’ukubaho kwe. Uduhe guhora tuzirikana ku nzira y’urukundo rwacu no kuyivomamo imbaraga ziturinda gutandukana maze igihe nikigera, uzaduhindure umwe ku mubiri nk’uko turi umwe ku mutima. Roho w’Imana nzima, uraduhore hafi. Amina”

---

[1] Gutera umuntu igika = kumutera inkunga

BIKIRA MARIYA N’UMUHAMAGARO

BIKIRA MARIYA N’UMUHAMAGARO

By Fratiri Eric Hatangimana

Bikira Mariya ni umwe mu bantu bagize amateka ya Kiliziya bitewe n’ubutumwa ayifitemo; ni umubyeyi wa Kiliziya cyangwa umubyeyi w’abemera bose. Ni yo mpamvu afite uruhare rukomeye mu rugendo rwacu rwo kugana Imana, rwo kuyimenya no kuyikorera mu mihamagaro itandukanye. Bikira Mariya rero adufasha mu mihamagaro yacu, kuko uwo Imana yaduhitiyemo ngo aduherekeje, Imana nayo yamwihitiyemo kuva kera na kare kugira ngo ayiherekeze. Mariya ni umubyeyi w’Imana utabara abakene, utakambira abanyabyaha, umenya abababaye. Ni umubyeyi twaraze mu bihe bikomeye na Yezu Kristu ubwe munsi y’umusaraba. Ni yo mpamvu tugomba kumumenya no kumukunda kugira ngo tujyane nawe. Mu muhamagaro wacu rero, dukwiye kumva ijwi rye aho atubwira ngo icyo Yezu ababwira mugikore. Ni umuvugizi wacu ku mwana we Yezu Kristu kuko ari indatana, bunze ubumwe kuva kera na kare; ni byo Mutagatifu Yohani Mariya Viyane avuga agira ati: “Yezu ntacyo ashobora kwima Mariya ku buryo iyaba abari mu muriro bashoboraga kwicuza kandi Mariya akabasabira imbabazi bazihabwa.” Ikindi kandi, ubutumwa bwa Bikira Mariya muri Kiliziya bugaragazwa n’amabonekerwa atandukanye agirira ku isi. Ahora aza kwibutsa abantu umugambi w’Imana wo kubacungura. Ntazigera aruhuka rero kuri uwo murimo kugeza ubwo Yezu azaza mu ikuzo.

Dusabe Umubyeyi wacu Bikira Mariya wari warahanuwe mu Isezerano rya kera, akagaragara mu Isezerano rishya nk’Umubyeyi w’Umucunguzi w’abantu bose, ahore adutakambira kandi atuvuganira ku Mwana we Yezu Krustu. Bityo mu buzima bwacu bwose, mu muhamagaro wacu, tubashe kubaho nk’uko yabayeho mu migenzo myiza yo kwicisha bugufi, kwemera no gukunda. Nuko tubashe gusingiza Imana nk’uko yabikoze mu ndirimbo ye y’igisingizo cy’Imana ‘Magnificat’, tubitewe n’ibyishimo byo kwakira ubutumwa bw’ugushaka kw’Imana mu buzima bwacu maze nk’Umubyeyi Bikira Mariya, tuvugane ukwemera ngo: “Dore ndi umuja wa Nyagasani; byose bimbeho nk’uko ubivuze (Lk.1,38)”

“Bikira Mariya, Umwamikazi wa Kibeho udusabire”

NIMUREKE NSHIME

NIMUREKE NSHIME

Nimureke nshimire uwo Mugenga

Uwo mubyeyi ugenga byose

Nyir'ububasha bugena byose

Nimureke nshime Nyir'umuringa

Nabuzwa n'iki kumuririmba

We wantoje kutagaramba

Akandinda no mu rugamba

Ubwo mu nyanja nkareremba

Nashimwe Rugira byose

Nasengwe ni we ubikwiye

Guhabwa impundu n'abamukunda

Gusingizwa iteka n'abamusanga

Ngaho reba mpagaze nemye

Bucya bukira ntacyo mbaye

Nkananirwa gushimira n'iyo Mana

Ikora ibyo byiza ubutaruhuka

Ngaho reba mbuze n'umunsi

Habe n'akanya ndi muri rwinshi

Kugeza ubwo ntwawe na Nyamunsi

Ntarashima uwo unkiza iminsi

Nimureke nshime njye mfite impamvu

Nzi aho yankuye n'ibyo yandinze

Yarandinze ankiza iyo hirya

Harya hashimwa n'abakurwanya

Ngaho mbwira niba ari byiza

Kuva mu byago ugifite ubuzima

Ukabihonoka kurya udakeka

Ugasigara wihara kuhivana

Ukabura ubwenge buguhugura

Ngo bugutoze kumenya gushima

No kuzirikana ko hari Ubasumba

Usumbya bose ubufasha bwiza

Mbese ubwo byaba birimo ubwenge

Ntazirikanye ibyiza n'aho bituruka

Nkigira uwundi nkaba ikirenga

Nkatana n'abo tutari guhuza?

Nimureke nshime Umukiza wacu

Kuko aturinda amakuba adukwiye

Agahora ashaka karibu iwacu

Ngo tumuture imitima yacu

Ibuka nawe aho yagukuye

Birya wasimbutse bikurenze

Ukaba ukomeye wigenza

Ntubona ko ari ibitangaza

No kuba ukirihoo tukureba

Bucya bukira ugihumeka

Nta byiza biruta ibyo ngibyo

Ibyo ni byo shingiro rya byose

Oya! Wivuga ko nta mpamvu

Kuko iwawe hagera impungu

Ngo ntiwashimira mu ruhumbu

Ngo nta n'ubwo uri n'umukungu

Harya ubwo uteze kuzamuba

Wowe udukoko tubera impamvu

Twonona ibiri mu bubiko

Ubwo twagusura utaturisha

Nimureke nshime ntaba nk'abo

Abahorana amaganya mu mutungo

Bamwe birengagiza abo bose

Batagira n'aho batera isombe

Nimureke nshime nkihumeka

Ndate ubufasha bw'agahebuzo

Buruta byose tuba duhiga

Nkesha Imana Nyir' urukundo

Yarandinze ntaravuka

Nkambakamba ntiyantaye

Na n'ubu aho ndi ntidutana

Nashimwe We unyitangira

Mbivuze nemye nzira igitutu

Mbivuze neruye ntububa

Nkifite umwuka sinzasiba

Gushimira Imana Rugira utanga

Nzabihorana mu rukundo

N’umutima utuje usanga Yezu

Ubuzima bwanjye nkiri ku isi

Buzasingiza Nyagusengwa

Nashimwe Umuremyi wacu

Nashimwe Umucunguzi wacu

Nashimwe Udutagatifuza

Nihashimwe Ubutatu bwera