Umukironews

Saturday, April 18, 2020

KOMEZA USENGE

KOMEZA USENGE

Yewe muntu uhigiye icyiza

Wowe ugishaka nk'uwagitaye

Ngo kikubere inshuti mu rugendo

Komeza usenge ukaze umurego

Ibyo ukoze byose bibe isengesho

Bityo iyo ntwaro ikubere inganzo

Uri mu byiza ndetse no mu byago

Wowe wabonye ko bidakwiye

Gutunga byose ubuze urukundo

Ishusho y'Imana yo yaguhanze

Komeza usenge ukaze umurego

Wowe wabonye ko bidasobanutse

Gucya ku mubiri roho idakeye

Ukagenda wera nk'imva nshyashya

Komeza usenge ukaze umurego

Usaba ibyo byose biguha umukiro

Ubyitoze kugeza ubitoye

Nibwo uzashima ko ufite ibanga

Nibwo uzatura harya dushaka

Rya juru ryiza twe turirimba

Ndavuga intaho y'abatsinze

Iyi si dutuye idakozwa icyiza

Nibwo uzishima ubuziraherezo

Kuko uzashimwa na Mwimanyi

Umenya byose n'amaherezo yabyo

Uko ibihe bigenda bikura ibindi

Komeza usenge ukaze umurego

Uhigike impamvu nyakibi atanga

Zisubiza inyuma umukiro ugusanga

Ubwo zikagutoza guta umurongo

Shikama usenge usaba Imana

Ubufasha bwayo bukomeza muntu

Bukamurenza aho abona byanga

Ubwo akagana Imana ikize ku buntu

Komeza usenge uzira kuryarya

Udategeka Imana nkaho uyigenga

Uyiginge, uce bugufi usenga

Hamwe n'ukwemera uzabironka

Komeza usenge usabire bose

Ubanze ushimire ibyo yaguhaye

Wigorore n'abo mutajya imbizi

Ukore ibineza Rugira byose

Komeza usonzere uwo mugenzo

Umwe Kristu adutoza twese

Ngo tuwutore uduhe umutsindo

Igihe uturanga muri byose

Komeza urinde roho yawe

Gucika intege ngo ubure gusenga

Komeza urinde ubuzima bwawe

Gukunda ibintu butarimo Imana

Uzabikora urimo gusenga

Uhimbaza Nyir'ugusengwa

Imana mu Butatu budatana

Yo itwegera ngo tube indatana

Komeza usenge ni rwo rugendo

Rwo kwegera Uwatwihaye

Uzirikane ko ari bwo bugingo

Ku babikora batajijisha

Niba utabikora waratanzwe

Gira bwangu bitagucika

Ugasezera wegukira ibyago

Kuko utakoze birya ugomba

Pfukama utuze ubwo mushyikirane

Wowe n'Imana izira guhendwa

Uyture intege nke zawe

Ufatanye na yo gufata umugambi

Humura ntabwo iri bukunene

Uzira ibyo ukunda bitayikesha

Iragukunda kuruta uko ukeka

Ngaho senga irimo kukumva

Tangira usenge usaba imbaraga

Udasize urukundo rwo gusenga

Isengesho rirangwa n'ibikorwa

Birya biranga koko abasenga

Nawe usenga nturi umwere

Ntukirare ngo warabitoye

Hato satani atabigutesha

Akagutwara ahazira abere

Sunday, April 12, 2020

Bana, dore urugero!

Samweli, umwana ukorera Uhoraho (1 Sam1-28;3,1-21)

Samweli ni umwana Ana wari ingumba yahawe n’Uhoraho; mu kwizera Imana isengesho rye ryarasubijwe. Samweli yatuwe Uhoraho akimara gucuka, afatanya n’umuherezabitambo Heli gukorera Uhoraho. Yeguriwe Imana ubuzima bwe bwose, atangira gukorera Uhoraho yumvira umusaza Heli. Natwe muri batisimu twahawe tweguriwe Uhoraho; turi abana b’Imana.

Samweli atwigisha iki?

Tumwigireho gukorera Imana tukiri bato. Nta gihe runaka tugomba gutegereza ngo dukorere Nyagasani Imana yacu; uko ungana kose, aho uri hose, akanya ufite kose, korera Imana. Zirikana ko Samweli yatangiye gukorera Uhoraho agicuka nyamara wowe ufite imyaka irenze iyo yari afite!

Samweli atwigishe kumvira no kugisha inama abaturera. Samweli utari amenyereye ibyo kuvugana n’Imana, igihe yumvise ijwi yihutiye gusanga Heli, akeka ko ari we umuhamagaye, ese wowe iyo baguhamagaye wihutira kumva icyo bagushakira? Samweli yazirikanye ibyo Heli amuhaye nk’igisubizo cya rya jwi rimuhamagara. Wowe iyo uhawe igisubizo cyangwa inama urazikurikiza? Samweli kandi atwigishe umuco wo kugisha inama ababyeyi bacu n’abaturera kugira ngo twirinde kuzagwa mu kigare cyo koshywa n’urungano.

Yozefu, umwiza utiyandarika (Intg.39,1-20)

Yozefu, wagurishwe na bene se mu misiri, yari mwiza cyane kandi akagira ubwisanzure busesuye mu rugo rwa Putifari. Yari afite ububasha busesuye ku mitungo, ku mafaranga no ku baja n’abagaragu nyamara ibyo ntibyamuhumye amaso ngo yiyandarike, yice itegeko ry’Imana. Yozefu yaje kubengukwa na Nyirabuja wamusabye kenshi ko baryamana ariko Yozefu ntiyabyemera. Byageze aho mukaputifari uwo agerageje kugusha Yozefu mu mutego ariko Yozefu amwereka ko nta kindi atinya kitari icyaha, ko nta wundi yubaha by’agahebuzo utari Uhoraho. Yozefu yaranzwe no gukora ibyo ashinzwe yubaha Imana.

Yozefu tumwigireho iki?

Kugira ibintu cyangwa amafaranga urusha abandi ntibikabe ikigusha ahubwo bigushyigikire mu kwamamaza Ivanjili ya Kristu. Uburanga n’icyubahiro n’igitinyiro ntitukabigendere ngo tugwe cyangwa tugushe abandi mu cyaha ahubwo ubwo turebwa cyangwa dusangwa na benshi, nitubafashe kumenya ko Kristu wabitangiye ku musaraba abasaba kuba intungane nk’uko Data wo mu ijuru ari intungane.

Yezu, umunyabwenge w’umutoni ku Mana (Lk.2,21-52)

Ivanjili ya Luka itubwira inkuru ebyiri kuri Yezu n’ingoro; Yezu atuirwa Imana mu ngoro na Yezu mu ngoro y’Imana hagati y’abigisha. Ni inkuru zigaragaramo ubuhanuzi bwerekeye kuri Yezu na Nyina ndetse n’ubuhanga bw’uwo mwana Yezu.

Muri iyi nkuru Yezu twamwigiraho iki?

Guharanira ubwenge bwuje ubwitonzi

Yezu yagombye kubyirukana ubwenge n’ubwitonzi agira ngo yumvishe abantu bose ko uhereye mu buto, umuntu ahamagarirwa kuba umunyabwenge; akagira ubumenyi bumugeza ku buhanga buzamubeshaho mu isi. Ubwo bwenge bukagoomba ubwitonzi kugira ngo bube ingirakamaro kuri nyirabwo no kubo Imana izamuhuza na bo. Guharanira ubwenge ntibitana no gukunda gusobanuza no kuganira n’abakurusha ubunararibonye n’ubumenyi.

Guharanira ubutoni ku Mana

Yezu Kristu yakuranye ubutoni ku Mana; yari azi neza ko agomba kuba mu nzu ya Se, byongeye kandi nta bwandu yigeze avukana kuko ari Imana yagombye kunyura ku muntu kugira ngo icungure abantu bose. Natwe Batisimu yadukijije icyaha cy’inkomoko; guhera ubwo twatangiye urugendo rwo guharanira kuba abatoni b’Imana. Tuzabigeraho nitwishimira kuba mu by’Imana, twunganiwe n’Impuhwe zayo zigaragariza mu Isakaramentu ry’imbabazi

SIBA UBUDASUBIRA

SIBA UBUDASUBIRA ,TWISHIME ELIAS

Muntu ukunda Imana

Hamwe n’ubuzima itanga

Muntu wanga icyaha

Ukanga ko kikuranga

Siba ubudasubira

Muntu ushaka icyiza

Gitanga ubuzima bwiza

Bugenura ubw’abatsinze

Bagashimwa n’Iyabahanze

Siba ubudasubira

Niba ukiri mu byaha

Uhigiye ijuru nawe

Dukesha Nyir’imitsindo

Uduhuriza mu rukundo

Siba ubudasubira

Usange Nyir’ubuhanga

Aguhange kurya abishaka

Ngo ukunde ubone ub ugingo

Bugenerwa uwabushatse

Siba ubudasubira

Ibikorwa bikugusha

Ugahunga rumuri rwaje

Umwijima ukagutaha

Ukegukira icuraburindi

Siba ubudasubira

Bya bindi bikikugenga

Bikagutanya n’abatakumva

Bakubwiraukuri udashaka

Ugahitamo kubahunga

Cyo siba ugufite umwanya

Utazisama wasandaye

Ukicuza bitagikwiye

Nkaho wabuze ukubwira

Ko aseseka ntayorwe

Siba ubudasubira

Usenge uzira kuryarya

Wicuze ubutabeshya

Wigomye ku byo utunze

Ukunde ubone ubugingo

Siba ubudasubira

Kwegukira isi n’ibyayo

Guhunga ijuru n’ibyaryo

Guhuma amaso ukireba

Ukabaho uzira ubugingo

Ni ukuri birakwiye

Guhindura uko ubigenza

Ukagenza kurya bikwiye

Ushaka guhora akesha

Umwami watwitangiye

Ibuka ibyo watojwe

N’abogeza Inkuru Nziza

N’abatumwe n’Imana

Ubyubahe uko bikwiye

Usibe kubica hirya

Siba uzirikana neza

Ko bitazahora ari uko

Ubwo byose bizarangira

Hasigaye Ijambo ry’Imana

Ubwo uzabahe urirwanya

Siba uzire kubigaragaza

Usabire bise basa nk’isayo

Ari abasenga n’abatabyumva

Ari abemera n’abahakanyi

Ubasabire bose kunyura Imana

Siba usibe kubisubira

Ibirwanya Umuremyi wacu

Na Yezu Umwami wacu

Hamwe na Roho w’Imana

Sanga izo ngero nziza

Zirya dukesha Kiliziya yacu

Uzigane ufite umugambi

N’inama zimeze neza

Uzitore usibe kuzica amazi

Siba guhora ugenda

Ak’umuyaga n’amazi

Ushaka kumenya byose

Nk’aho ari byo bigukwiye

Kurusha ibikorwa byinshi

Ndavuga ibikorwa byiza

Birya bihamya urukundo

Bitishyuzwa ntibyigambwe

Uri mu bandi ngo ushimwe cyane

Siba byo ntubisibe

Twese duhuje indwara

Urukingo n’umuti ni ibi

Gusiba gukora icyaha

Ukorana n’Uwaguhanze

Ngo ushobozwe kutaneshwa

Ngaho dufatanye twese

Dusange Umukiro wacu

Kuko ari twe wagenewe

Ngo tubane muri iryo hirwe

Rituwe n’intungane

Siba ubudasubira

Usibe uzire gusiba

Uhugukire ibyo ugomba

Ibyo utagomba ubinyure hirya

Wakire umukiro ugusanga.

Reka kujijisha

Umuvugo: Reka kujijisha, Twishime Elias

Wowe usenga Imana ubitegetswe

Uti nibarangize ngire ngende

Wowe ujya mu misa bigatinda

Kikakuziriraho gucyura ibyizwe

Ukarushaho kunguka ibikugusha Ubwo se uri umukristu, reka kujijisha?!

Muri korali ntuhatangwa

Ukaririmba ugahogoza ugashimwa

No mu ikoraniro ntuhasiba

Ugatanga umusanzu uko bisanzwe

Uti: “niturangiza kurepeta ni ya gahunda”