Mbese ubwo uzagarukira he? Twishime Elias

Mbese ubwo uzagarukira he?

Twishime Elias

photo, internet

Ko wavutse witonda cyane

Ugakura bagushima

None ukaba utakirwiyambitse

Aho unyuze hose baguha induru

Mbese ubwo uzagarukira he?!

Ko bakubyaye bishimye

Unyuzeho wese abaha impundu

Mukaba mubana bashavuye

Unyuzeho wese abaha induru

Mbese ubwo uzagarukira he?!

Ko mbona winjira usohoka

Ugana umuryango uva mu gikari

Ngo ibyo yemwe ntibigira icyanga

Ibyo bagutoza bigutiza umurindi

Mbese ubwo uzagarukira he?!

Ko mbona wanga wiyumvira

Wiha gusesengura ukumvirana

Ukishinga ibyo wita kwigenga

Bikaguhinduka bikugenga

Mbese ubwo uzagarukira he?!

Ko wanga kumva ukumvirana

Ukanga kubona ukabonabona

Ukanga kugenda ugahobagira

Aho kuvuga ukarogombwa

Mbese ubwo uzagarukira he?!

Ko batisimu wayihawe

Mu ngabire nyabutatu tuzi

Ugakomezwa ngo ukomeze abandi

None ukaba nta rutege utentebutse

Mbese ubwo uzagarukira he?!

Ko wabatijwe twese tubyemeye

Ugahabwa urumuri rw’amahanga

Ngo rukumurikire iteka

None ukaba utagihweza

Mbese ubwo uzagarukira he?!

           

N’uwo mwenda wera wambitswe

Uranga ubusukurwe bw’umutima

Ngo uwurinde ubwandu bwose

None ukaba waramazwe n’ibizinga

Mbese ubwo uzagarukira he?!

N’ayo mavuta wasizwe

Amwe atagatifuza, y’ubutore

Ngo ukunde ugengwe n’Inkuru Nziza

None ukaba waramazwe n’umwera

Mbese ubwo uzagarukira he?!

N’ukuntu bambe uri mwiza

Umusore bashima mu buranga

Aho unyuze hose bakayaguhanga

Dore umuhungu utagira uko asa!

Mbese ubwo uzagarukira he?!

Nawe ubasumbya ubwiza

Mwali urondogoza abahungu

Ngo icyo nshaka ni ubukungu

Uje wese nkamukesha

Mbese ubwo uzagarukira he?!

Iyo Ukaristiya uhabwa

Ko ubikora nk’umuhango

Ukamiragura nk’ibijumba

Ubwo uzirikana ko ari Nyiribisingizo?

Mbese ubwo uzagarukira he?!

Ubwo iyo utuje ukigenzura

Mbese ukisenya ukitsinda

Usanga Yezu uwo wahawe

Umwemerera ngo akugenge?

Mbese ubwo uzagarukira he?!

Ko wakomejwe bambe

Ngo ube intumwa mugabo uhamya

Ngo ukomere kandi umwamamaze

None ukaba umurata ubusembwa

Mbese ubwo uzagarukira he?!

N’izo ngabire wahunzwe

Zirimo izituma bagukunda

Aho kuzikoresha usingiza Imana

Uzikoresha wibuza imbehe!

Mbese ubwo uzagarukira he?!

Ese ko udasabira abahise

Ntuzi ko Nyirububasha

Ari We wazuye Razalo

Amaze ine yose mu mva?

Mbese ubwo uzagarukira he?!

 

Ko washingiwe imbere y’abakristu

Mugasezerana mwembi babiri

None aho wirirwa iyo iheru

Ukaba udasiba kuyasubiramo

Mbese ubwo uzagarukira he?!

Mbe mugabo udashimwa

Umwe udasiba kuyaga urukobwa

Aho bwiriye niho urara

Aho wubatse ukahahunga

Mbese ubwo uzagarukira he?!

Umugabo n’uwo abyaye

Bagafatanya mu cyaha

Ngo n’iboyi baryese

Bakishimisha birimbura

Mbese ubwo uzagarukira he?!

Nawe mudamu bashima

Ngo ubwo ntawe ubikeka

Umugabo mwubahe ntankeke

Ahiherereye mbice bicike

Mbese ubwo uzagarukira he?!

Yewe mubyeyi ubyaragura

Ushuka abana ubangiza

Ayo mahano ukora ukwiye kurera

Uzirikana ko ufite abana?!

Mbese ubwo uzagarukira he?!

Ese iyo ukora ibyo byaha

Ngo ubwo kandi wikinze muntu

Ntuzi ko ahiherereye ku bantu

Ari ahirengeye ku Mana?

Mbese ubwo uzagarukira he?!

Ugusigwa byo ni ikizira

Uti: “ayo mavuta ndayarambiwe

Mu bice byinshi by’amasakramentu

Ndetse n’iwacu turisiga!”

Mbese ubwo uzagarukira he?!

Ariko ubundi nkwibarize

Iyo wakarabye ukisiga

Ntibucya ukongera ukiraba

Ngo bigaragare ko uri isimbi?

Mbese ubwo uzagarukira he?!

Nawe padiri, maseri na fureri

Urwo rwego rw’indakemwa urimo

Waruhawe utagenzwe

Ngo wirirwe urutesha agaciro?

Mbese ubwo uzagarukira he?!

N’iyo misiyo na karisime byiza

Ukagira n’umuhire wisunze

Wakurikije ibyo wisunze

Ukajugunya ibyo wishinga

Mbese ubwo uzagarukira he?!

Dore amagambo ni yo agutunze

Ishyari inzangano byaragusaze

Ibyiza byose byaraguhunze

Agatsiko gatindi ni yo ngoro yewe

Mbese ubwo uzagarukira he?!

Uri umukristu turakuruzi

Uri intangarugero rwego

No mu bikorwa by’urukundo

Ibyawe hose ni have mbanze

Mbese ubwo uzagarukira he?!

Kandi ibyo ukora byose

Ukiratana ubwigenge

Ukihara umudendezo

Ngo umukristu ntagengwa n’amategeko

Garuka!

Nuko mu kuyoba kwawe ukishigikira

Ngo umutima upfa kuba utanshinja   

Ubundi se ugushinje ikibi kihe

Ikiza cyaraguhunze

Garuka!

SIGAHO !

UMUVUGO - SIGAHO, Twishime Elias

Sigaho kwishuka wibeshya

Sigaho kwiyica wishora

Wishinga ubudashishoza

Ngo urashaka guhora ushimwa

Sigaho sezera ubudasubira

Sohoka wemye ubudakumirwa

Hato utazisama usandara

Isi n'abayo bakagusenda

Sigaho kwigira ntibindeba

Sigaho kwigira uko udakwiye

Kumwe wibeshya ko bigukwiye

Harya wiroha wiyahura

Sigaho rwose ntibigukwiye

Kwishinga ibiriho byose

Ngo bikugenge ubure gutaha

Sigaho ibyiza siko bigenda

Sigaho kwinjira wububa

Sigaho kwihisha abakureba

Utirinda ibiguhumanya

Barya usanga batagushima

Sohoka wanga kubisubira

Bibise byose biguce hirya

Unyure hino ho hagukwiye

Urahasanga Muhorakeye

Muhorakeye urahamusanga

Abigutoze ubone umurongo

Ubishime ugire ubugingo

Maze ubitore ushire agahinda

Wowe ukereye gusamara

Ugasama byose ubudakenga

Ugahora ukereye kwakira

Sigaho udatora n'ibigutwika

Ni wowe mbwira ntasize abandi

Abasama byose nk'akabindi

Bikabahinduka bibangiza

Ubwo bagatora iyo kwangara

Wowe ukereye kwangara

Ukazira intaho utabuze aho uba

Mugashubera ukazira iwanyu

Mukitwaza ko muri mu byanyu

Sigaho kugumya guhabara

Ngo uhore ugenda nk'amazi

Sigaho rekura ibyo bitindi

Bigutera guhora ubunga

Wowe uzira kugira icyo ugomba

Ugatereka inzara kurusha rusake

Ngo akazi kose ntikakureba

Sigaho ntawe ukora anebwa

Sigaho kurakaza abakubyaye

Reka guhemuza abakubonye

Mara agahinda abagukunda

Sigaho gukesha abakurerega

Sigaho kwiroha mu nyenga

Usanga impanga itazira impanga

Kebuka urebe iruhande rwawe

Urahasanga umutimanama

Sigaho kwigira mbuzubwenge

Hato udatera urupfu ibitwenge

Emera wake urupfu umuringa

Usange Yezu aguhe uburanga

Sigaho kwishira mu birere

Usabira ibyo wita iminyenga

Bikagutumbagiza ubireba

Bikakugusha iyo rushira imbehe

Sigaho kwambara ibitagukwiye

Ibyo bikurata uko umeze kose

Sigaho kwambara ubusa ureba

Butagutwara uko isi ibishaka

Sigaho guhobera ibihombanya

Reka guhonga abaguhonyora

Bamwe utaaka bagutaranga

Barya bose bagutobanga

Sigaho kumvira abatakuvura

Reka kugana abatakuganza

Ngo bakugarure ubuze ubwenge

Ngo muhuze isi muyigenge

Sigaho musore usora ibyo atunze

Usesera hose usa n'umusambi

Kuko utora ibyo utataye

Ukabitorana n'uwitaye.

Sigaho kwirirwa mu bakobwa

Ngo mwiyandarike mube inyanda

Sigaho gusanga ibigusasangiza

Ibyo bigusanga bigusesereza 

Sigaho kwisiga ukisanga

Kandi ufite abagusanga

Bagusangiza iby'urukundo

Bakagutoza kugira umurongo

Sigaho kwiyanga ugikundwa

Sigaho kugenda bakigushaka

Sigaho kumvira abakugusha

Komeza wumvire Inkuru Nziza

Komeza wumvire ibyo igutoza

Ubikundire umucyo wabyo

Ubyakire ubibemo intyoza

Ubibatoze bamenye ibyawo

Sigaho kwanga ubuzima bwiza

Womongana ahataba itabaza

Ngo rigutabarize utakibasha

Igihe amaso yaheze mu mva

Sigaho kumva ibatukureba

Sigaho gukunda ibitaguhanga

Bigahangamura iyo uhanze

Bikaguhagika mu byo wanze!

Sigaho kuyoba uyoboza

Komeza wihunga Ruhanga

Yoboza abakereye kumusanga

Bamusanganiza ibyo ashima

Sigaho guhunga Imana

Ngo urahangira iyo ugenga

Ngo uyigengane ububi bwawe

Bityo mujyendane mu byawe

Sigaho gushavuza utagutanga

Ngo wegukire ibigusanganira

Ibikugomba wanyuze hirya

Igihe wacitse ugana ishyanga

Sigaho rwose sanganira Data

Uje ugusanga ngo akuraruze

Data wakuremye agukunze

Akakugenera uwo kugucungura

Sigaho guhoza mu gahinda

Uwagukunze kuruta byose

Uwagucunguje umusaraba

Akakwiha ngo umunyure wese

Sigaho kuninira umurengezi

Roho w'Imana We muvugizi

We uturinda turi mu b'isi

Akadutoza kutaba ab'isi

Sigaho kwigira nk'impfubyi

Hato utabesha ko ubura umubyeyi

Kandi dufite Mariya mwiza

Umubyeyi uhora aduhakirwa

Sigaho kwihimbira impamvu

Ufite ibikwiye ngo ukore neza

garagara wemye uve mu ruhavu

Uharanire kuba mwiza ukora ibyiza

RERE NA RAMBA PART 20

RERE NA RAMBA PART 20

N’ubwo Ramba yari atorohewe n’uburwayi, uko yitabwagaho n’umukunzi we byaramunyuraga cyane kuko kenshi gashoboka Rere yaramubwiraga ati:

“Kabeho ukwiriye njye wakubonye

Kabeho ukunda njye uruguhunda

Gahurwe abandi uhore unkunda

Ndabikubwiye njye ndagukunda

Kabeho wumva umutima wanjye

Uhora uterera mu gituza cyawe

Kabeho wumva ikikwibasiye

Ko gishegesha umutima wanjye

Kabeho neza kabure icyago

Kabeho neza karame iwanjye

Kabure byose kiretse ibyiza

Muhorakeye gahorane ibyuzo

Kabure byose kiretse ibyiza

Birimo ugukunda ubutakuryarya

Akaruguhunda ubudahuguka

Kabone byose kiretse ibyago!”

Na Ramba akanyuzamo, akirengagiza uburibwe, agakora mu nganzo akesha Iyamuhanze ngo yishimishirize umukunzi. Agaterura agira ati:

“Ngwino mwali umare agahinda

N'ibyo byose biza bihinda

Bimwe bihindira iyo birengera

Birya bikurengana ubyihaye

Bikakurengana mu bapfuye

Bikagutwara na roho yawe

Ngaho se ngwino witinda

Gira bwangu ni wowe nshaka

Nta rubanza ni wowe ubanza

Gufata iya mbere ubyigamba

Ko wakukiye mu rugamba

Rwo kunkunda ubutagaramba”

Nyuma yo gukira neza, Rere agiye mu mwaka wa kane, ni bwo Ramba yagiye gutangira mu mwaka wa mbere. Ubwo Ramba yajyaga gutangira; buracya ngo ajyane na Rere, nibwo Rere yamusabye ko baganira akanya gato. Ramba yabyemeye atajuyaje nuko akurikira umukunzi we bajya muri ka gashyamba. Rere yenda igitenge yari yifubitse, akirambura hasi hanyuma abwira Ramba ati: “Ndicara maze kubona ko wicaye kandi neza!” ubwo Ramba yari amaze kwicara, Rere yamubwiye asasa akandi gatambaro imbere ye ati: “Njye ndiyicarira hano kuko nkeka ko aribwo uri bwumve neza agaciro k’ibyo nkubwira.” Akirangiza kuvuga atyo Ramba yamubajije uwabateranije, yibazaga icyabaye gituma umukunzi we amubwira atyo. Nimugihe kuko yatekerezaga ko hari  ushaka kubasenyera imihana[1]. Rere abonye ko umukunzi we asa n’uwifitemo ubwoba, aramubwira ati: “Humura! Uri na Rere wawe ugukunda!” Niko kumwongorera, amusaba kuzamura amaboko ye, Ramba na we ntiyazuyaza kubigenza nk’uko umukunzi we abimusabye. Rere akimubona azamuye amaboko, yamukirigise mu maha agira ati: “Seka sha! Ntabwo nshaka kukubona ubabaye.” Ramba yarasetse cyane ari nako agerageza kwiyaka Rere nuko bombi baricara ngo baganire. Bakimara kwicara no gushira amaseka, Rere yabwiye umukunzi we Ramba ati: “Urabizi ko nkukunda kandi niba ugishidikanya ndi hano ngo mbiguhamirize; uribuka ubuzima bwacu muri pirimeri, muri segonderi kugeza n’ubu tukiri kumwe. Nashatse kukuzana hano kuko nawe utayobewe amateka y’aka gashyamba mu buzima bwacu.” Ramba amuca mu ijambo amusaba kudashidikanya mu rukundo rwabo, amwemeza neza ko amukunda kandi ko azi ko na we akundwa cyane, ko yabimenye igihe atamutereranye mu burwayi bwagaragaraga ko buzakira bumusigiye ubumuga. Ati: “burya na bwo namenye ko unkunda urukundo rw’ukuri, namenye neza uwo uri we n’urukundo unkunda. Nari ntarakumenya, ariko ubu ndakuzi.”

---

[1] Gusenya imihana = guteranya abantu bakangana

RERE NA RAMBA PART 19

Rere yasubiye kuri watsapu asanga ubutumwa yoherereje Mpano ntibwagiye nuko arongera arabwohereza. Agerekaho na we umuvugo w’imikararago mirongo itatu n’ibiri. 

Ati:

“Wirushya iminsi ugora ibihe

Unsaba urukundo ndetse n’ibyarwo

Undatira ibyiza byo kugukunda

Kuko njyewe mfite umukunzi

Erega Mpano shakira ahandi

Urahura n’uje agusanga

We umusanganize gahunda

Ureke Rere wabonye Ramba

Naramwiyeguriye na we ni uko

Umutima wanjye ni kimwe n’uwe

Sinarota nkuharira abandi

Kuko we yarangije kuwutura

Sinkubeshya nturi uwanjye

Uw’abandi gumana umutuzo

Gira amahoro komeza urugendo

Ururinde kugeza umubonye

Witondere ibyo kurutanga

Utazavaho wicuza uburi kera

Utakishimira uwo wakunze

Igihe usanze waribeshye

Umwali ugukwiye nguwo araje

Ntatinda buracya muhure

Umwakire ni we ugukwiye

Umushime bizaguhira

Urumuhunde nk’uko ubishaka

Ararwakira aribururinde

Unezerwe kurusha iwanjye

Kuko wizihiwe n’uwo ukunda

Nzagukunda kurya bikwiye

Mbikore rwose kuko mbigomba

Kwa kundi Rurema adutoza

Kuko ukundi gufitwe na Ramba!”

Iyo amafaranga ya buruse yazaga, Rere yayakoreshaga nyuma yo koherereza umukunzi we ibihumbi bibiri byo kuguramo tumwe mutwo akeneye kandi akanakoraho make ashira ku ruhande ngo Ramba azayahereho aza kwiga igihe azaba yamaze gukira. Uku gukomeza kwitabwaho n'umukunzi we byateye Ramba guhorana akanyamuneza ndetse biza no gutangaza abamusuraga bose, bibaza bati: "Bishoboka bite ko umuntu urwaye gutya, utagira aho yigeza n'ubwo afite imbago, ahorana umunezero kandi hariho n'abazima byananiye?" Abo bose Ramba yabasubizaga ko ntacyamubuza kunezerwa mu gihe cyose Imana ikimushigikiye. Ubwo burwayi Ramba yabumaranye Imyaka ibiri n'igice, yitabwaho n'ababyeyi be uko bashoboye. Rere na we yakomeje kumuba hafi ku buryo Ramba atigeze atekereza. Yemwe no mu minsi mikuru yose yabaga, iyo Rere yabaga ari mu biruhuko yazaga kuyisangira na we, amuzaniye impano ndetse n'iyo yabaga ari ku ishuri yamwohererezaga amafaranga yo kurya kuri simukadi yamuguriye. Muri icyo gihe kandi niko Rere yandikishaga Ramba mu mafaranga ye bwite, akamusabira kuziga umwaka ukurikIra; ibyo byose akabikora yihaye intego y’uko nta muntu ugomba kumubona nk’impinga y’abapfu[1] ku biijyanye n’ibibazo by’inshuti ye.

---

[1] Impinga y’abapfu = umuntu w’umutesi

DORE INTUMWA PAUL by intama za Yezu Paruwasi bungwe

DORE INTUMWA PAUL by intama za Yezu Paruwasi bungwe

“Ubugwaneza bwanyu nibumenyekane ku bantu bose”, Fil.4,5

TWISHIME ELIAS                                                                                                                                PARUWASI NYINAWIMANA    

NYAMIYAGA – KABEZA

KABEZA, 18 Mutarama 2020

“Ubugwaneza bwanyu nibumenyekane ku bantu bose”, Fil.4,5

abavokasiyoneli b'i Bungwe

Bavandimwe nkunda, Kristu Yezu akuzwe!

Nihasingizwe Imana, yo Rukundo rurema n’Umwana wayo Yezu Kristu, Rukundo ruducungura na Roho Mutagatifu, Rukundo rudutagatifuza; Nibasingizwe ubu n’iteka ryose! Ndashimira Imana inyemereye kubagezaho iyi ntashyo mu gihe gishize tutari kumwe; nyamara turi kumwe ku mutima. Ndabaramutsa mwese dusangiye kuzirikana ku muhamagaro; ku rugendo rugana Imana. Narinzi ko nzagenda mbasezeyeho ariko nagiye bitunguranye bityo kubasezeraho ntibyaba bigishobotse. Ubu ndi muri Paruwasi ya Nyinawimana, mu murenge wa Nyamiyaga w’Akarere ka Gicumbi; akaba ari ho nkorera ubutumwa. Nimukomere mu mirimo yanyu, muhamye ibirindiro mu bikorwa by’urumuri, muzirikana ko ‘Uhoraho aramira abagwa bose, abunamiranye akabaha kwemarara (Z.145,14).’

Bavandimwe, nimuzirikane ku mpamvu ituma mukomeza kwizirika kuri Groupe Vocationnel- ni ukubera iki? Zirikana kubyo uyikesha bityo wibuke ibyo usabwa kugira ngo isagabe, yera imbuto ikwiriye kugira ngo ibe koko irembo ry’umukiro ry’abasonzeye ijuru. Nimuharanire kuba abamamaza Ivanjili mu ngiro, muzirikana ibikorwa by’urukundo bituma koko mwunga ubumwe muri Kristu. ‘Kristu uwo ni We twamamaza, tuburira buri muntu kandi tumwigisha ubwenge bwose, kugira ngo buri wese tumuhindure intungane muri Kristu.’(Kol.1,28). Ya gahunda yo gusurana binyuze mu matsinda mwarayikomeje cyangwa mwasanze nta nyungu iyirimo? Ubukristu butadutoza umurimo ngo butubyarire ubuvandimwe, butugeze ku butungane buragatabwa! Ndifuza ko mumenya igikwiriye, gushira mu bikorwa Ijambo ry’Imana mwumvishe kuva kera kandi n’ubu mucyumva. Nimutume abantu basingiza Imana kubera ibyo mukora kandi icyiza mwatojwe ntimukagitezukeho kuko kizabageza ku mukiro Imana itanga.

Bavandimwe, nimwimike urukundo mu buzima bwanyu, muzirikana ko Ubutatu Butagatifu muharanira kwiyegurira ari urukundo; Data, Mwana na Roho Mutagatifu ni urukundo nyabuzima kandi nyampuhwe. Mufashanye mutarobanuye kuko uwitwa umuntu wese ari umwana w’Imana ukundwa na Yo: none rero “Ubugwaneza bwanyu nibumenyekane ku bantu bose”, (Fil.4,5). Urukundo ruduhuza ni urwa kivandimwe ariko niba atari n’urwo, urwo ari rwo rwose ntirukajorwe: Urubyiruko twirinde guhindurana ibikoresho ngo twohokere mu kwihaana imburagihe. Gukomera ku bumanzi n’ubusugi byabaye nk’insigamigani kuburyo icyorohera benshi mu gusobanura urukundo ari ubusambanyi. Nyamara ‘urukundo nirwo rwashoboje abari benshi gupfana ubusugi, biyemeje gukomera ku masezerano bagiranye n’Umukiza wabo. Batsinda batyo ubukana bw’ababatotezaga, batsindishije umugenzo w’ubudahemuka.’ Urukundo rukomera ku masezerano no ku cyemezo kizima kandi nyabuzima cyafashwe. Ntimugasebe kandi ntimukirare; ‘iyo roho irushaho gukunda, niko igabanukirwa no kubonako ikunda. Ibyo bikayikongezamo ubudatuza icyifuzo gitagatifu gishingiye ku rukundo’. Nimurusheho kujya mbere muri uyu mwaka!

Bavandimwe, ntimukadohoke mu gukora neza - 2Tes.3,13 - kugira ngo mutavaho musuzuguza Imana yanyu. Nyagasani Nyir’amahoro ubwe nabagwirize amahoro, aho muri hose n’igihe cyose. Nyagasani abane namwe mwese (2Tes.3,16)!

TWISHIME ELIAS,

eltwishime@gmail.com, umukironews.blogspot.com

Yezu mushumba mwiza, Intama za Yezu z'i Bungwe

UWANJYE, IRIBA NAGENEWE (Ind.4,12)

UWANJYE, IRIBA NAGENEWE (Ind.4,12) 

UMWINJIZO

Imana ni urukundo, ishimishwa no kubona abo yaremye bafite umunzero bakesha kuyumvira no gushingira ubuzima bwabo bwose kuri yo. Imana ubwayo si umwihariko w’umuntu runaka, ni iya bose na byose kuko ariyo irema, igatagatifuza, ikabeshaho ibiboneka n’ibitaboneka. Imana ubwayo ni urukundo rukomokaho uruhuza abantu. Bivuze ko abantu duhuzwa n’Imana yo icyaremwe cyose kidashobora gusobanura ku buryo bwose. Ubukungahare bwayo bwigaragaza ku buryo bunyuranye. Muri yo, hakomokamo urukundo ruhuza abashakanye n’abifuza iyo nzira, uruhuza abantu bakarema ubuvandimwe, n’urutuma umuntu yihunza bimwe mu by’isi kugira ngo yegukire kwitangira abandi binyuze mu isengesho no mu bikorwa bifatika kandi akabikora nta gihembo cy’isi agamije. Urukundo rutuma Muntu aharanira kubaho mu buryo bumwe nk’Imana: ese Imana ikeneye ko uyihemba ku byiza yagukorereye? Kireka kuyumva uyumvira. Icyo ni cyo cyayinezeza, kikayibera igihembo kiyinyura. Imana yo rukundo rw’ikirenga yaremye muntu imwishushanije, umuntu wese akeneye gukunda no gukundwa. Byabaye ngombwa ko Muntu aremerwa uwo yagombaga gusangiza urukundo Imana yamuremanye, bityo bombi bakibumbira ku Muremyi, we Rukundo nyabuzima, ikaba n’isoko rukumbi idakama y’ibitangaza Muntu akorerwa.  

·         IKIZIRIKO CY’UBUMWE

Kuba Muntu yararemanywe urukundo, yagombaga kuzirikana ko ari itegeko ahawe ryo gukunda Umuremyi we n’ibyo yaremye akabibamo nk’uko Imana ibimubwirije. Ntiyagombaga kuyikunda no gukunda ibyo yaremye bindi gusa kuko muri byo hatarimo umufasha bakwiranye, (Intg.2,20) umwe bagomba kubana, bafatanya ubutumwa bwo kororoka no kugenga isi. Kubw’urukundo rwayo, iremwa rya Eva rigaragaza ko Imana yifuje ko umuntu agira uwo bafatanya urugendo rwo ku isi mu butumwa bwo kuyifasha kurema no gucungura isi. Bakabikora bunze ubumwe; ari indatana zinyuze Uwazihanze. “Ni cyo gituma umugabo asiga se na nyina, akizika ku mugore we, bakaba umubiri umwe.” (Intg.2,24). Imana niyo yishakiye ko urukundo ruba ikiziriko cy’ubumwe kuko ruhuza abantu, rukabahindura umwe, bakagengwa n’ubumwe buzira icyashya. Bavandimwe nkunda, ‘nitwihatire gukora icyiza tutadohoka - Gal.6,9’, nicyo kidukwiriye nk’ abanan b’urumuri, abana b’Imana Nyir’ubutagatifu!

Ku bw’iryo jambo dusanga mu gitabo cy’Intangiriro, urukundo ruhuza umugabo n’umugore ni ikimenyetso cy’ubumwe buzira gutana: mbese umubiri umwe ushobora gutandukana? N’iyo bibaye bibyara urupfu cyangwa ubumuga. Utandukana n’uwo bashakanye, abaho abana n’ubumuga bwo kubura urubavu rwe bityo aba akwiriye kwitabwaho by’umwihariko kugira ngo mu gihe bishoboka akire ubwo bumuga. Cya kiziriko cy’ubumwe gishobora gusanwa mu gihe cyacitse, abari batandukanye bakongera kwiyunga, bakaba umwe nk’uko babyiyemeje nta gahato. Urukundo ni ikiziriko cy’ubumwe bubyara ubuvandimwe n’ubusabane, ni ubuzima bityo ‘udakunda yapfuye ahagaze. Ni umwicanyi kandi nta bugingo buhoraho yifitemo.’ (Soma 1Yh.3,14-15).  Yezu Kristu, Rukundo nyabuzima nta kindi atwifuzaho kitari uguhuzwa n’urukundo, rukatwunga, rukatwimikamo ubumwe buzira nyakamwe. Ati: ‘...Kugira ngo bose babe umwe… ndabasaba ko na bo bunga ubumwe muri twe...’(Yh.17,20-21)!

·         IRIBA NAGENEWE, ISOKO IGIPFUNDIKIYE

Muri rusange, urukundo si umutungo wiharira ahubwo ni ifunguro ritaribwa n’umwe rikaryoha risangiwe n’imbaga nyamwinshi. Ku rundi ruhande, hari ubwoko bw’urukundo ruryoha ari uko rusangiwe na babiri gusa, rukarushaho kurura iyo hinjiyemo uwa gatatu; ni urukundo ruhuza umuhungu n’umukobwa ngo bareme umuryango umwe. Koko rero umwe abera mugenzi we iriba yagenewe, iryo akesha amazi afutse. Umwihariko w’umutima. Ntibikwiye ko umuntu akunda babiri kuko agakunze ababiri kabateranya. Urukundo rwo muri iki cyiciro ni urukundo ruheza - amour exclusive kuko umwe akundi undi umwe agaheza abasigaye bose. Iyo hatabayeho guheza, umwe mu bakundana ntaba akiri iribi umukunda yagenewe ahubwo ahinduka nka rya riba rishokwamo n’inka nyinshi, zikanywa amazi ziyatobatoba! Bene uwo rubanda ruramushoka, rukamuvutsa ibyo yitezweho, akibera inshuti abagome n’abanyarugomo. Mwe mu kundana muzirikane ko mi iriba ry’umwihariko ryagenewe umwe rukumbi mu magana y’abantu. Urasigeho, ntiwiyegurire abashotsi; uwawe, uwo wagenewe arahari kandi ari bugufi.

“Uri umurima uzitiwe……isoko igipfundikiye n’iriba nagenewe” (Ind.4,12)! Ayo magambo yo mu gitabo cy’indirimbo ihebuje agaragaza neza ko umukunzi aba ari umwihariko utavogerwa w’umukunda. Ese biracyagezweho? Niba uzi ko igisubizo cyawe ari oya, menya ko ubusanya n’ijambo ry’Imana ryo rigomba kutumurikira, rikaboneshereza intambwe zacu. Uyubahiriza, naho yagera ahishimirwa n’abagome, nazrkane aya magambo: “Nzakuvana mu kiganza cy’abagome, nkugobotore mu nzara z’abanyarugomo” (Yer.15,21). Tuzi neza ko Ijambo ry’Imana ari ubuzima; kubusanya na ryo ni uguhuza n’urupfu, ni ukohokera mu mwijima w’icuraburindi, ni uguhungu Umukiza n’Umuremyi. Nyamara uwizera Imana ntacyo azaba; “Arahirwa umuntu wiringira Uhoraho, kuko Uhoraho amubera ikiramiro” (Yer.17,7)! Naho numusuzugura, “ubugingo bwawe buzahora buregetse, uhore udagadwa ijoro n’amanywa, uhore ushidikanya ko ukiriho. Nibucya uzajya uganya ngo ‘ese burira ryari?’Nibugoroba, ugire uti ‘noneho buracya ryari?’ Uzaba ubiterwa no gukurwa umutima n’ibyo amaso yawe azagumya kwibonera (Ivug.28,66-67)! Icyiza ni ukwizirika ku mukunzi wawe, ukamubera koko umurima uzitiwe n’iriba yagenewe, ugaharanira ko yishima kandi ukamushimisha mwubaha Imana.

·         WANTWAYE UMUTIMA, WANTWAYE WESE

Ngaya amagambo yizihira uyumva, bikarushaho iyo akunda urutaryarya.  Ukunda nyitoze kubwira uwo ukunda ari nawe ugukunda uti: “… erega wantwaye umutima…wantwaye wese” (Ind.4,9)! Iri jambo rizamunyura kandi rumukomeze rimuremamo icyizere gishyitse. Abakunda bifuza cyane kwegukana abo bakunda, bikaba nanone igihamya cy’uko bene uru rukundo ruzira gusangirwa. Ni urukundo rwikubira, aho umusore yikubira umukobwa, n’umukobwa akamwikubira bityo buri umwe akababazwa no kumva umukunzi we yakundwa n’undi. Kwiyegurira umukunzi wawe ni intego nziza ku bari mu rukundo rwo gushinga urugo n’abari mu rukundo rwo kwiyegurira Imana ariko bigasaba kuri bose kumenya Imana, yo Buhanga bw’ikirenga. ‘Koko kukumenya ubwabyo, ni ubutungane bwuzuye, kumenya ububasha bwawe bikaba isoko yo kudapfa (Buh.15,3)’! Urukundo nirutubere ikiraro kiduhuza, twe ubwacu ndetse n’Imana. Urukundo ruhuze ababyeyi, umusore n’inkumi, ruhuze umuntu n’Imana. Umutu agira umutima umwe, bityo agomba gukunda umuntu mwe kugira ngo bazubakane urugo ruzima kandi bagaharanira gukomeza gukundana. Ntibikabe nk’umwambaro uhararwa, ukanahararukwa. Gutwarana umutima bituruka ku kubana neza muri urwo rukundo - mubwizanya ukuri, musabana imbabazi, mugirana inama muharanira ibyishimo bitarwanya Imana.

Nimufate umwanya mwihugure muganira ku babatanze iyo nzira, mumenyane bihagije ariko mwirinde icyabagusha mu mutego bigatuma amagambo meza mwabwiranye muyatesha agaciro kuko havutse ibyo mutari mwiteze. Nimuberwe n’urukundo, rubaryohere ariko mwitonde kuko satani ahatega imitego myishi kandi benshi irabagusha, ikabagenza uko ashaka. Nimuhinduke mube maso! Mwirinde uburagi mu rukundo: mumenye kuvuga yego cyangwa oya kandi muhagarare ku migambi myiza mwifitemo. Mubyumve neza; ‘ijambo rivugiwe igihe ni nk’ikirezi cya zahabu gitakishije feza (Imig.25,11). Tuzatsinda ni twiyambaza Imana tugahora twizigiye gufashwa no kuzirikana ku Ijambo ryayo. Imana soko y’urukundo niturengere!

“Uwo nkunda ni uwanjye, nanjye ndi uwe” (Ind.6,3)!

                                 TWISHIME ELIAS, umukironews.blogspot.com