Imivukire y’Isakapulari ya mutagatifu Yozefu

Ni isakapulari yatuwe ya mutagatifu Yozefu, umurinzi wa Kiliziya, ikunze kwambarwa n’abuhayimana bo mu muryango w’Abafureri Bato (Les frères mineurs capucins). Ku ruhande rumwe uhasanga ishusho ya mutagatifu Yozefu ateruye / akikiye umwana Yezu handitse n’aya magambo : “mutagatifu Yozefu, umurinzi wa kiliziya, udusabire” (sancte Ioseph, protector ecclesiæ, ora pro nobis). Ikindi gice kiriho ikamba rya Papa (tiare Papale) hamwe n’umusaraba, imfunguzo ebyiri n’inuma hejuru hamwe n’aya magambo : “Roho wa Nyagasani ni umuyobozi we” (Spiritus Domini ductor ejus). Igizwe n’amabara y‘umweru, umuhondo n’iry’isine. Umweru n’isine ni amabara yeguriwe mutagatifu Yozefu naho umweru n’umuhondo akaba aya Papa. Intego yo kwambara isakapulari ya mutagatifu Yozefu ni ukubaha mutagatifu Yozefu, kumwiyambaza ngo akurinde, ugire ubuzima bwa roho buhamye kandi arinde na Kiliziya. 

Amavuko y’isakapulari ya mutagatifu Yozefu

Mu 1861 i Vérone muri kiliziya ya mutagatifu Nikola hashinzwe umuryango w’umushumi wa mutagatifu Yozefu (confrérie du cordon de saint Joseph) aha ni ho isakapulari igizwe n’ibara ry’umuhondo n’iry’isine yakorewe nk’ikimenyetso cy’umuryango (insigne de la confrérie) kugira ngo basenge basabira Papa.  Mu kinyejana cya XIX kandi, habayeho igitekerezo cyo gukora isakapulari y’umweru ituwe mutagatifu Yozefu cyizanwe n’umubikira Mariya w’Umusaraba, washinze akaba n’umuyobozi w’abafaransisikani b’Utarasamanywe icyaha (Marie de la Croix, fondatrice et supérieure générale des franciscaines de l'Immaculée Conception de Lons-le-Saunier). Padiri Petero-Batisita (capucin) ni we wayishushanije ifite ibara ryera, iriho ishusho ya mutagatifu Yozefu ateruye/akikiye umwana Yezu mu kuboko kw’iburyo hamwe n’ishami ry’imirasire (lys) ibumoso handitseho “Ite ad Ioseph” (Musange Yozefu) n’ishusho ya Mutagatifu Yozefu ku rundi ruhande akikijwe n’imirasire (lys).  

Ukjo Isakapulari yemewe na Kiliziya 

Isakapulari ya Vérone (Italy) yemejwe n’ishami rishinzwe imigenzo (congrégation des rites) ku rwego rwa diosezi ya Vérone kuwa 8 Nyakanga 1880. Isakapulari ya diyosezi ya mutagatifu Kolode (Saint-Claude, France) yemejwe na Papa Lewo wa XIII, ayishikirijwe na Kayisari-Yozefu (César-Joseph Marpot), umushumba wa diyosezi ya mutagatifu-Kolode kuwa 13 Gashyantare 1884. Karidinali Aluferedi Fulo Arikiyepiskopi wa Liyo (Alfred Foulon; Lyon, France) yasabye Papa ko Abafureri Bato (Les frères mineurs capucins) bajya bamamaza isakapulari kandi bakayambika abantu nyuma yo kuyiha umugisha. Byabaye ngombwako iyo sakapulari ya Liyo ihindurwa kugira ngo hatazabaho amasakapulari abiri ya mutagatifu Yozefu. Isakapulari yera y’Abafureri Bato yagombye gusa mu mabara no mu buryo iya diyosezi ya verone ikozwemo mbere yo kwemerwa kuwa 18 Mata 1893 n’ishami rishinzwe imigenzo (congrégation des rites). Indulujensiya ku bakristu bose bazayambarana ukwemera yagenwe n’urwego rubishinzwe (congrégation des indulgences) kuwa 8 Kamena 1893, kandi Papa Lewo wa XIII yemerera umukuru w’ Abafureri Bato ububasha bwo guha umugisha isakapulari no kuyambika abakristu no guha abapadiri ubwo bubasha igihe babimusabye.

Menya Amalisi tubwirwa mu byanditswe bitagatifu

Amalisi yera

Ni yo turatirwa, tugasabwa kurabya no guhumura nka yo! Umuhanuzi Hozeya ati: “Israheli nzayimerera nk’ikime, irabye indabyo nk’iza lisi, kandi ishore imizi nk’ibiti byo muri Libani (Hozeya 14,6).” Mwene Siraki na we akungamo ati: “Nimukwize impumuro nziza nk’ububani, maze mugwize ururabo nk’amalisi; nimuhanike amajwi muririmbire icyarimwe, mushimire Uhoraho ibikorwa bye byose (Sir.39,14).” Ese amalisi cyangwa lisi ivugwa aha ni bwoko ki ?

Amalisi (Lisi) ni igihingwa cyangwa ikimera kigira indabo nziza cyane kandi gihumura neza, kigakunda kuboneka mu majyaruguru y’isi, mu migabane itandukanye:  Amerika, Uburayi, na Aziya.  Uyisanga henshi mu bihugu nk’ubuhinde, ubuyapani na filipine, Canada na leta zunze ubumwe z’Amerika. Icyo kimera nicyo mu bwoko bwa ‘Lilium’ bukunda kwiganza mu bice by’imisozi n’amashyamba kurusha mu bindi bice, kigira amabara n’impuro bikundwa na benshi, bigatuma gihingwa ngo gikoreshwe nk’umutako haba mu rugo cyangwa mu busitani. Ni ubwoko bw’igihingwa bigoye kubona nta rurabo gifite kuko cyo, no mu gihe ibindi biba bibayeho nabi (été et hiver périodes d'inactivité) usanga gifite indabyo, mbese mu gihe cyose cy’umwaka.

Ubusobanuro n’akamaro by’amalisi

Muri bibiliya, amalisi ikomoza ku muryango wa Israheli; ikibutsa umuryango Imana yihiteyemo ariwo muryango wa Israheli ikunda byimazeyo, mbese nk’uko mu gitabo cy’indirimbo ihebuje batubwira urukundo rw’umukwe n’umugeni. “Ndi akarabo k’amarebe y’i Saroni ndi umwangange wariboye wo mu mibande. Mu bandi bakobwa, uwo nkunda ameze nka lisi mu mahwa. Uwo nkunda ni uwanjye, nanjye ndi uwe. Aragira mu ndabo z’amalisi (Ind.2,1-2.16).” Amalisi ni ikimenyetso cya Bikiramariya, ikaba n’ikimenyesto cy’ubusugi, ubumanzi, ubunyangamugayo n’ubupfura. Mu gihe cy’ubwami bw’Abaromani, uru rurabo rwashyirwaga ku mva z’abayahudi nk’ikimangu (ikashi) zabaga mu nsi y’ubutaka (catacombe). Mu gihugu cya Bosiniya, Amalisi (Lilium bosniacum) ni akarango k’abaturage, igaragara ku ibendera ry’igihugu (Bosnie- Herzégovine) naho mu ntara ya Saskatchewan ikaba akarango k’ururabo (Lilium philadelphicum, emblème floral).

ubundi bwoko bwa Lisi

Amalisi kandi ikoreshwa nk’ikiribwa ; hari ubwoko bukoreshwa muri ubwo buryo bwo kuribwa cyangwa kongerera umuhumuro ibinyobwa mu bihugi byinshi by’iburayi Aziya n’Amerika y’amajyaruguru. Ibibabi bya Amalisi y’umweru (pétales) byakoreshwaga mu kuvura ibisebe no kuvura ubushye igihe byavanzwe n’amavuta y’igiti bita ‘Olive’

Ahandi amalisi ivugwa muri Bibiliya Ntagatifu

Ijambo amalisi rigaragara mu Isezerano rya Kera, cyane mu gitabo cy’Indirimbo Ihebuje. Mu isezerano rishya ntaho rigaragara usibye kuvuga indabyo muri rusange. Aha ni hamwe mu ho amalisi ivugwa ndetse n’aho bakomoza ku ndabyo muri Bibiliya Ntagatifu:

·        Ind. 4, 5: “Amabere yawe yombi ni nk’inyagazi ebyiri zavutse ku isha ari impanga, zikarisha mu ndabo z’amalisi.”

·        Ind.5,13: “Imisaya ye ni nk’akarima kera imibavu, kakera ibihumura. Iminwa ye ni indabo z’amalisi, ivubura imibavu ishashagira.”

·        Ind.6,2: “Uwo nkunda yamanutse agana mu busitani bwe, mu mirima y’ibiti bivamo imibavu, kuragira mu mirima no guca indabo z’amalisi.”

·        1Abam. 7,19: “Naho imitwe y’inkingi z’urwinjiriro, yari ifite imikono ine kandi imeze nk’indabyo z’amalisi.”

·        2Matek.4,5: “Umubyimba wacyo wanganaga n’intambwe imwe y’intoki, kandi urugara rwacyo rwari rubumbwe nk’urugara rw’ururabyo rwa lisi. Icyo kizenga cyashoboraga gusukwamo intango ibihumbi bitatu.”

·        Mt.6,28-29: “Imyambaro yo yabahagarikira iki umutima? Nimwitegereze indabo zo mu gasozi uko zikura: ntiziruha, ntiziboha. Nyamara rero ndababwira ko na Salomoni mu bukire bwe bwose atigeze yambara nka rumwe muri zo.”

·        Lk.12,27: “Nimwitegereze indabo: ntiziboha, ntizinadoda. Nyamara ndababwira ko na Salomoni mu bukire bwe bwose atigeze yambara nka rumwe muri zo.”                                                                             

Uhabwa ubupadiri abwirwa iki?

Umwepisikopi wa ruhengeri aha abadiyakoni ubupadiri (ifoto: internet)

Umudiyakoni ugiye guhabwa ubupadiri agira umwanya wo kwibutswa ibimutegereje, ibyo kiliziya imutegerejeho mu murimo wa gisaseridoti ku rwego rwe. Ibyo imusaba kugira ngo azasohoze neza inshingano zinyuranye azahabwa nk’umusaseridoti ku rwego rwa kabiri. 

Ubusaseridoti ni isakaramentu rigizwe n’inzego eshatu; habanza ubudiyakoni, ubupadiri n’ubwepiskopi buza ku gasongero. Mu byo umudiyakoni azirikanaho abifashijwe n’umwepisikopi uyoboye imihango yo kumwinjiza mu bupadiri, harimo ibikurikira:  

1.     Ujye wibuka ko watoranijwe mu bantu kandi ugashyirirwaho gufasha abantu mu byerekeye umubano wabo n’Imana.

2.     Umupadiri agomba gukorana ibyishimo bitageruka umurimo wa Kristu hamwe n’urukundo ruzira uburyarya.

3.     Mu murimo wa Kristu, umupadiri ntakwiriye gukurikirana inyungu ze bwite kuko ahamagarirwa kuwukora agamije iteka ingoma ya Kristu.

4.     Umupadiri, Kiliziya imutegerejeho kubumbira abayoboke b’Imana mu muryango umwe kugira ngo abayobore ku Mana Data banyuze kuri Kristu kandi babifashijwemo na Roho Mutagatifu.

5.     Umupadiri agomba kwitegereza ubudahwema urugero rwa Kristu umushumba mwiza, utarazanywe no kugaragirwa ahubwo kuba umugaragu wa bose, gushakashaka no gukiza ibyari byarazimiye.

Yitangiye ubuhinduzi bw’inyandiko za Liturujiya

Myr Augustin Misaga (ifoto: internet)

Yitangiye umurimo wo guhindura mu Kinyarwanda inyandiko zikoreshwa muri kiliziya y’u Rwanda; inyandiko za Liturujiya, tutibagiwe by’umwihariko umurimo wo guhindura bibiliya mu Kinyarwanda, bityo tukaba dufite Bibiliya Ntagatifu. Uwo ni nde? Ni Nyiricyubahiro Myr Agusitini MISAGO wavutse mu 1943, mu cyahoze ari Komine ya Kinyami, Perefigitura ya Byumba, ubu ni mu Karere ka Gicumbi. Yabatijwe ku italiki ya 17 Gicurasi 1956 muri Paruwasi avukamo ya Nyagahanga, akomezwa ku ya 1 Ukuboza 1956. Yize mu Iseminari Nto ya Rwesero kuva mu w’1958 kugeza mu w’1963, ayakomereza mu Iseminari nto ya Kabgayi kuva mu w’1963 kugeza mu w’1965. Yize kandi mu Iseminari Nkuru ya Nyakibanda kuva 1965 kugeza mu w’1971 aho yize imyaka ibiri ya Filozofiya n’imyaka ine ya Tewolojiya. Yahawe ubupadiri kuwa 25 Nyakanga 1971. Ni Papa Yohani Pawulo wa II wamutoreye kuba umwepiskopi wa Gikongoro kuwa 30 Werurwe 1992, yimikwa na Karidinali Josef Tomko kuwa 28 Kamena 1992. Intego yari “Omnia propter Evangelium” (Byose bigiriwe Inkuru Nziza).

Yari afite impamyabumenyi ihanitse muri Tewolojiya n’impamyabumenyi y’ikirenga mu byerekeranye n’abakurambere ba Kiliziya, yakuye i Roma, “Doctorat en Sciences patristiques, Institut patristique Augustinianum, 1974-1979”. Nyuma y’ikinyarwanda, yari azi indimi ndwi arizo: Igifaransa, Icyongereza, Igitaliyani, Ikilatini, Ikidage, ndetse n’Ikigereki gikoreshwa muri Bibiliya. Ku myaka 69 y’amavuko na 30 ayobora Gikongoro, yitabye Imana kuwa 12 Werurwe 2012 aguye mu biro bye.

Bumwe mu butumwa yakoze ataraba umushumba wa diyosezi

Ø Nzeli 1971- Nyakanga 1974: Yabaye umurezi mu Iseminari Nto ya Rwesero.

Ø 1980- Nyakanga 1992: Yabaye umwarimu w’iby’abakurambere ba Kiliziya mu Iseminari Nkuru ya Nyakibanda

Ø Nzeli 1980 - Kuboza 1983: Yabaye ushinzwe iby’amasomo mu iseminari Nkuru ya Nyakibanda

Ø Gashyantare 1984 - Nyakanga 1992: Yabaye umuyobozi wa seminari Nkuru ya Nyakibanda.

Ø 1981-1992: Yabaye muri komisiyo ishinzwe guhindura mu Kinyarwanda inyandiko za Liturujiya

Ø 1982-1992: Yabaye umwe mu bagize komisiyo y’Inama y’Abepisikopi ishinzwe iby’Abasaseridoti

Ø 1984-1990: Yabaye muri komisiyo ishinzwe guhindura Bibiliya mu Kinyarwanda ariyo yavuyemo Bibiliya Ntagatifu

Nakomeze kuruhukira mu mahoro! 

Byumba, Rwamagana yakubyariye Ingenzi

Myr Didace RUZINDANA (ifoto: internet)

Iyo ngenzi ni nyakwigendera Musenyeri Didace RUZINDANA, waharaniye ko abantu bajijuka mu kwemera, adasize n’ubundi bumenyi. Yitangiye Kiliziya, by’umwihariko Kibungo na Byumba. Twibuke amwe mu mateka yaranze ubuzima bwe akiri kuri iyi si. 

Musenyeri Didace RUZINDANA yavukiye i Rwamashyongoshyo ku wa 17 Werurwe 1945, abatizwa kuwa 01 Nyakanga 1945 i Rwamagana. Yigiye amashuri abanza ahantu hatandukanye; i Runyinya, Musha, Bitsibo na Rwamagana (1953 - 1959) yize mu iseminari nto ya rwesero, Kigali na Kabgayi (1959 - 1966). Yize kandi mu iseminari nkuru ya Nyakibanda (1966 - 1971) n’iya Nyundo (1972 - 1973).  Yahawe ubupadiri ku wa 17 Nyakanga 1973 i Kibungo. Afite imamyabumenyi ikomeye mu Tewolojiya (Doctorat en Théologie Spirituelle, Université Grégorienne de Rome 1984 -1990). 

v IMWE MU MIRIMO YAKOZE

1.    Umurezi mu Iseminari Nto y’i Zaza (1973 - 1978)

2.    Padiri Mukuru wa Paruwasi ya Mukarange - Kibungo (1979 - 1980)

3.    Padiri Mukuru wa Paruwasi Rwamagana (1990 - 1991)

4.    Padri Mukuru wa Paruwasi Kibungo (1991 - 1992)

5.    Umurezi na Padiri ushinzwe ibya Roho (Père Spirituel) mu Iseminari Nkuru y’i Rutongo (1992 - 1996)

6.    Umurezi na Padri Ushinzwe ibya Roho (Père Spirituel) mu Iseminari Nkuru ya Nyakibanda (1996 - 1997)

7.    Igisonga cy’Umwepiskopi wa Diyosezi ya Byumba (02 Nzeri 1997 - 30 Nyakanga 2011). Yanakoze imirimo inyuranye muri Diyosezi :

·       Ushinzwe umutabera n’amahoro mu gihe cy’imyaka 2

·       Ushinzwe amashuri gatorika muri Diyosezi

·       Econome local mu w’2000

·       Padri Mukuru wa Paruwasi Katedrali Byumba mu wa 2001

·       Ushinzwe Abaseminari bakuru mu wa 2002

·       Umuyobozi wa Caritas ya Diyosezi (2002-2005)

·       Umurezi mu Iseminari Nkuru ya Nyakibanda

Numvise umutima wanjye wasazwe n'ibyishimo

Uvuye ibumoso, MUTUYIMANAGodelive ni uwambere mu bambaye furari

Urwibutso rw'intama za Yezu i Bungwe

Kuwa 19/05/2019 muri Paruwasi ya Bungwe habaye ibirori bidasanzwe, by’umwihariko mu misa ya mbere yahimbajwe n’itsinda ry’intama za Yezu zanagize amasezerano. Intama zari ziteguye gusezerana zahamagariwe kwegera Alitari, hanyuma zemerera imbere y’imbaga y’abakristu gukurikira Yezu Kristu mu budahemuka. 

MUTUYIMANA Godelive, umwe mu basezeranye aratubwira iby’uwo munsi w’amaserano mu itsinda ry’Intama za Yezu, rikorera muri Paruwasi ya Bungwe, n’uko yiyumvaga kuri uwo munsi wamubereye uw’amateka mu buzima bwe. Ubwo Padiri yatangiye kwambika furari ku babyiteguye; “Numvise umutima wanjye wasazwe n'ibyishimo; akingera imbere, numvise koko ndi mu rwuri rutoshye” doreko na furari iriho intama irangamiye umutima wa Yezu, wo ukwiza ku isi yose urukundo nyampuhwe n’ibindi byiza bitabarika.

Misa ihumuje, twagiye mu munsi mukuru w’intama za Yezu wari watumiwemo abasaseridoti, abihayimana, ababyeyi b’intama n’abakristu bahagarariye imiryango y’agisiyo gatolika n’amatsinda y’abasenga. Hari kandi n’abahagarariye intama za Yezu zo muri paruwasi ya Mbazi muri dioyosezi ya Butare. Mu by’ukuri, intama za Yezu zari zishimye, zasusurukije abazishagaye mu byishimo bidasanzwe kandi n’ababyeyi bazo bagize umwanya wo kugaragaza ibyishimo batewe n’umunsi mukuru w’abana babo.

Umunsi mukuru warangiye Padiri Antoine NGAMIJE MIHIGO, Padiri mukuru wa Paruwasi ya Bungwe asaba abashumba bacu, Sr Egidie MUKANYANDWI na Sr Béatha MUJAWINGOMA, ko itsinda ry’intama za Yezu ryaba umuryango mugari muri Paruwasi ya Bungwe hanyuma aduha umugisha.

Umunsi mukuru wabaye uw’ibyishimo koko, abasezeranye batahanye akanyamuneza, basingiza Imana muri Magnificat yabo bwite, bafatiye urugero kuri Mariya, dukesha Magnificat twifashisha dusingiza Imana muri ubu buryo:

“Umutima wanjye urasingiza Nyagasani, kandi uhimbajwe n’Imana Umukiza wanjye. Kuko yibutse umuja we utavugwaga; rwose, kuva ubu amasekuruza yose azanyita umuhire. Ushoborabyose yankoreye ibitangaza, Izina rye ni ritagatifu. Impuhwe ze zisesekarizwa abamutinya, bo mu bihe byose. Yagaragaje ububasha bw’amaboko ye, atatanya abantu birata; yahanantuye abakomeye abakura ku ntebe zabo, maze akuza ab’intamenyekana; abashonje yabagwirije ibintu, abakungu abasezerera amara masa; yagobotse Israheli umugaragu we, bityo yibuka impuhwe ze, nk’uko yari yarabibwiye abakurambere bacu, abigirira Abrahamu n’urubyaro rwe iteka.”  (Lk.1,47-55)

Mutaggatifu Mariya Kirisitina yatoboye kiliziya......

Marie-Christine de l'Immaculée- Conception’ (foto: réflexion chrétienne)

Yavukiye i Naples mu butaliyani kuwa 1 Gicurasi 856, yitaba Imana kuwa 20 Mutarama 1906, iyo tariki ni nayo yizihizwaho nk’umutagatifu. Amazina ye y’amavuko ni Adélaïde Brando. Ni we washinze umuryango w’ababikira bashengerera Iasakaramentu bagamije guhongerera ibyaha by’imbaga nyamwinshi no kwita ku rubyiruko rw’abakobwa b’abakene. Kuva akiri muto yaranzwe no kuryoherwa n’isengsho, n’icyifuzo cyo kuba umutagatifu. Mu ijoro ya Noheli yo mu 1868, yiyeguriye Imana, ayisezeranya kuba isugi. Mu 1876 yagiye mu muryango w’ababikira bahora bashengerera Isakaramentu (Adoratrices perpétuelles du Saint-Sacrement) aha ni ho yaherewe izina rya ‘Marie-Christine de l'Immaculée- Conception’.

Mu 1877 byabaye ngombwa ko ava mu kigo cy’abihayimana kuko ubuzima butari bumeze neza kuburyo yahaguma. Yahisemo kujya kwibera i Naples mu nzu yoroheje yasangiraga n’abakobwa bifuza kwiha Imana. Icyo gihe yafashwaga na mutagatifu Ludoviko na Padiri Michelangelo Longo. Mu 1884 Brando yimukiye i Casoria, abifashijwemo na mutagatifu Ludoviko wa Casoria, atangiza urugo rwambere (communauté) rubaho ubuzima bushingiye ku gushengerera Isakaramentu ritagatifu. Umurimo wabo w’ibanze ukaba guhongerera no gukiza ibyaha (réparer et expier) by’abantu.

Mariya Kirisitina, yifuje cyane ko bahora bashengerera ubutaretsa amanywa n’ijoro, agakunda Ukaristiya cyane kugeza ubwo yubakisha icyumba iruhande rwa kiliziya, akayitobora urukuta kugira ngo ajye ahora arora Isakaramentu ritagatifu. Urugo yatangije rwemewe n’ubuyobozi bwa kiliziya nk’umuryango w’abihayimana kuwa le 7 Nyakanga 1903, nuko bitwa ‘Congrégation des Sœurs victimes expiatrices de Jésus- Sacrement’.  Ishami rimwe ryiguriye kubaho rishengerera, irindi ryo rikita ku burezi no kwigisha gatigisimu abakobwa b’abakene.

Ku myaka 49, yitabye Imana kuwa 20 Mutarama 1906. Akiriho yakunda kuvuga ko agomba kuba umutagatifu byanze bikunze, "Je dois me faire sainte, coûte que coûte." Kwiga ko yakwandikwa mu gitabo cy’abatagatifu byatangiriye muri Arikidiyosezi ya Naples mu 1927, ubuhamya ku buzima bwe bwoherezwa i Roma mu 1978 kugira ngo urwego rubishinzwe (Congrégation pour les causes des saints) rubifateho umwanzuro. Kuwa   2 Nyakanga 1994 ni bwo Papa Yohani Pawulo wa II yamwemeje nk’umubahwa (vénérable). Kuwa 27 Mata 2003   amwemeza nk’Umuhire, nyuma y’uko kuwa 20 Ukuboza 2001   yemeje igitangaza cya mbere kibaye hiyambajwe Mariya Kirisitina, cy’uko mu 1992 umugore witwa Federica de la Fuente w’imyaka 27 yamwiyambaje, akaza gukira indwara y’ibihaha yari bugufi kumuhitana, ku buryo abahanga batashoboye gusobanura, kuko yari yarabazwe kenshi ariko ntakire, ahubwo akarushaho kuremba.

Umutaliyani Maria Angela Di Mauro yari afite ikibazo cyo kubyara, kuko yabigerageje inshuro ebyiri zose bitamuhira. Kwifuza umwana byatumye yiyambaza Mariya Kirisitina kugira ashobore guheka nk’abandi babyeyi. Yongeye gutwita, nabwo abaganga babonaga ubuzima bw’umwana buri mu kaga, bamuca intege ko kumurinda ntacyo bikimaze. Maria Angela we ahitamo kwiyambaza Mariya Kirisitina ngo amurinde we n’umwana we nuko abyara umuhungu umeze neza. Hari mu 2004. Iki gitangaza ni cyo cyatumye Mariya Kirisitina yandikwa mu gitabo cy’abatagifu kuwa 17 Gicurasi 2015 nyuma y’uko kuwa 20 Nzeri 2014 byemejwe na Papa Francis ko cyabaye hiyambajwe Mariya Kirisitina.

NTUBE UMUNTU USANZWE

 

Bamwe mu bitabiriye umunsi ibirori

Urwibutso rw’Intama za Yezu I Bungwe

Hari mu birori byo kwishimira abana 54 binjiye mu itsinda ry’intama za Yezu  rikorera muri Paruwasi Regina Pacis Bungwe, ubwo Padiri mukuru, Padiri Antoine NGAMIJE MIHIGO yabwiraga intama zinjiye mu rwuri ati ‘Ntuzabe umuntu usanzwe, ejo uzagaragaze ko wabaye umuntu mushya.’ Ibi bikatwibutsa ko amasezerano ahamagarira uyakoze guhinduka, akabaho bihuje n’ibyo yasezeranye, bitabaye ibyo ntacyo yakungura umuryango w’abemera. Kubaho bihuje n’uko wahoze utarasezerana ni ikimenyetso cy’uko icyo uhamagarirwa muri ayo masezerano utazagisohoza.

Bana muzirikane amagmbo Padiri mukuru wanyu Antoiune yabwiye ababyeyi banyu: “kuba Yezu yaravuze ati ‘nimureke abana bansange’, nimwe bambere mwabyumvise.” Barabyumvise, barahinduka, bemera kubaha umwanya ngo mujye gutozwa mu itsinda ry’intama za Yezu kandi banabagenera ubufasha bunyuranye mubasaba; barahindutse. Namwe Bana nimuhinduke kuko muri mu irerero ryiza. Padiri Antoine ati “[mu itsinda ry’intama za Yezu] Ni mu itorero, irerero, aho umwana yigira ubumuntu.” Mwatojwe ubumuntu, murerwa gikristu; murabe abahamya babyo, mukomeze kuba intwararumuri zirukana umwijima w’icyaha n’uw’ubujiji.  Intama za Yezu zirangwa no kubaha abandi kuko Yezu abanyuramo kugira ngo abakize, murabitore. Nibyo Mama Egidiya MUKANYANDWI, umushumba w’intama, yabwiye imbaga y’abitabiriye ibirori agira ati “Yezu Mushumba Mwiza akorera mu babyeyi, mu babikira no mu bapadiri kugira ngo tumukurikire.” Kugira ngo umwana abe umuntu udasanzwe, Padiri Antoine yibutsa abana bari mu ntama za Yezu ibi bikurikira:

1.     “Umwana uri mu ntama za Yezu ntasiba misa, ntasiba umuryango-remezo w’abana.”

2.   “Agatamo gato kagomba kubaha ababyeyi n’ababyeyi bakubaha agatama gato, ntibakabuze gusanga Intama nkuru.”

3.     “Agatama gato karangamira isoko y’amazi afutse ava mu mutima wa Yezu.”

4.     “Agatama ka Yezu gahora gatwaye urumuri.”

5.     “Uri intama ya Yezu, mukurikire mu budahemuka.”

Twemere ko bishoboka kuba umuntu udasnzwe, ‘Koko nta kinanira Imana (Lk.1,37)!’ Mtg. Filomena ati “Koko uwiringiye Imana agera kubyo we yabonaga ko bidashoboka, kabone n’iyo yaterwa ubwoba ate, ntiyigera acika intege na busa.” Twemerere Imana idukoreremo

Mwigane Umushumba mwiza

bamwe mu ntama za Yezu

Urwibutso rw'Inatama za Yezu i Bungwe

Byari ibyishimo byinshi mu birori byo kwakira intama zinjiye mu rwuri kuri iki cyumweru gisoza icyumweru cy’Umushumba mwiza (kuwa 15/05/2019). Ni ibirori byabimburiwe n’igitambo cy’Ukaristiya cyaturiwe muri Paruwasi Regina Pacis Bungwe kiyobowe na Nyakubahwa Padiri Antoine NGAMIJE MIHIGO, Padiri mukuru. Nyuma ibirori bikomereza mu nzu mberabyombi ya paruwasi. Mu ijambo ry’uhagarariye ababikira ba Mutagatifu Chrétienne i Bungwe, intama za Yezu n’abazishagaye bakanguriwe kunga ubumwe na Kristu we Mushumba mwiza. Ni we tugomba kureberaho kuko ariwe rugero rwiza rudasumbwa. Mama Valence MUKAKOMITE ati “Mwigane Umushumba mwiza.” Ngiyi intero itwibutsa ko duhamagarirwa kuba abakurikiza ba Kristu umukiza, tugahora turangwa n’ingero yaduhaye akiri ku isi. Kwigana umushumba bijyana no kumenya icyo ushinzwe kandi ukagisohoza neza.

Aha niho Mama Valence yahereye asaba ababyeyi ubufatanye buhoraho mu kurera intama za Yezu. Ati “ababyeyi bagomba kwibutsa abana ko igihe cyo kujya mu rwuri cyageze” kugira ngo babarinde gusiba nta mpamvu. Ababyeyi nibo bambere badutura Imana, nitubumvire badufashe gukomeza gutera imbere kuri roho no ku mubiri, bagaragaza itandukaniro nk’uko byagarutsweho n’intama zaturutse muri paruwasi ya Mbazi, i Butare. Aha niho iri tsinda ryatangiriye, ritangijwe n’ababikira ba Mutagatifu Chrétienne.

Ubufatanye bw’ababyeyi, abasaseridoti n’ababikira mu kubungabunga urwuri -itsinda ry’intama za Yezu- ni ingingo yagarutsweho n’abafashe amagambo banyuranye. Bakomeje gusaba ubufatanye burambye kugira ngo hatazaba gucika intege no gutakaza intama zinjiye mu rwuri. Imbaga y’abana n’abaje kubashyigikira basabwe gushakisha abandi bana, bakazanwa mu rwuri kugira ngo batozwe uburerere bwiza kandi bafashwe kumva neza icyo Imana ibahamagarira mu buzima bwabo bwa buri munsi n’ubutumwa ibaha muri Kiliziya. Bakabikora bazirikana ko Mutagatifu Maxime yavuze ati “ntukirengize itegeko ry’urukundo kuko ni ku bwiryo tegeko uzahinduka umwana w’Imana. Ariko nuryica uzaba umwana w’ikuzimu.” (S. Maxime le Confesseur. Centuries sur l'amour, 4.20).

Umuhire Basile-Antoine Marie Moreau

Umuhire Basile-Antoine Marie Moreau

Basile-Antoine Marie Moreau yavutse kuwa 11 Gashyantare1799 mu bufaransa (Laigné-en-Belin, France), yitaba Imana kuwa 20 Mutarama 1873, aguye i Mans mu bufaransa. Iyi tariki niyo tumwizihizaho nk’Umuhire.  Ni umupadiri washinze, mu 1837, umuryango w’Umusaraba Mutagatifu (congrégation de Sainte-Croix) ugizwe n’abafureri (Joséphistes) n’abapadiri (Salvatoristes), babereyeho gufasha abantu kumenya Imana, kuyikunda no kuyikorera ; wemerwa kuwa 13 Gicurasi 1857 na Papa Piyo wa IX. Yashinze kandi abamariyani b’Umusaraba Mutagatifu (Marianites de Sainte-Croix), ababikira bita ku burezi, ubuvuzi n’abantu batagira ubitaho, wemewe kuwa 19 Gashyantare 1867 na Papa Piyo wa IX.

Ni umwana wa cyenda mu bana ba Louis na Louise Pioger Moreau, abakristu basengeraga muri Kiliziya bihishe (l'Église clandestine). Yababajwe cyane n’impinduramatwara yo mu gihugu cye yabangamiye bikomeye Kiliziya. Amashuri yayize afashijwe na Julian Le Provost wari Padiri mukuru wabo, mu 1814 amufasha kwinjira mu iseminari ya Château-Gontier ubu ni Lycée Victor-Hugo. Ubwo kiliziya yari ibonye agahenge mu 1816, Moreau yinjiye mu iseminari ya diyosezi, ahabwa ubusaseridoti mu 1821 afite imyaka 22. Yashinze umuryango w’Umusaraba Mutagatifu kugira ngo azibe icyuho cyari mubuke bw’abapadiri n’uburezi bwa gikristu cyari i sarthois nyuma y’impinduramatwara. N’ubwo atari ashyigikiwe n’umwepiskopi we, mu 1841 yatangije tsinda ry’ababikira.

soeurs de sainte croix (foto: Animation Missionnaire)

Umunyakanada w’ i Montréal witwa Laurette Comtois, mu ijoro ryo kuwa 17 rishyira kuwa 18 Kamena mu 1948, yakize indwara y’ibihaha (pleurésie) mu buryo budasanwe kubera ko ababikira n’abanovisi b’Umusaraba Mutagatifu mu bihe bitandukanye batabaje Imana bisunze umugaragu wayo, bakanamukoza igice cy’umubiri we mu mugongo (relique du Serviteur de Dieu Basile Moreau). Ni Papa Yohani Pawulo wa II, kuwa 12 Mata 2003 wamutangaje nk’Umwubahwa (vénérable), kuwa 15 Nzeri 2007 Papa Benedigito wa XVI amutangaza nk’Umuhire (bienheureux), nyuma y’uko kuwa 28 Mata 2006 hemejwe igitangaza cyabaye bamwiyambaje.

Mutagatifu Sebasitiyani, Umurengezi wa Kiliziya

Saint sébastien  (photo: Les Archers d'Anet

Mutagatifu Sebasitiyani, umumaritiri w’umuromani wabaye ikirangirire, yavukie i ‘Narbonne’mu majyepfo y’Ubufaransa. Ni umutaliyani w’i Milan. Ntibizwi neza igihe yavukiye, bavuga ko yavutse mu kinyejana cya III, agakundwa cyane na n’abami Diyokelesiyani na Magisimiyani (empereurs Dioclétien et Maximien Hercule), kugeza ubwo Diyokelesiyani amugize umutware w’urugo rwe n’umugaba w’Ingabo ze. Mu gihe cy’itotezwa ry’abakristu ku ngoma ya Diyokelesiyani, Sebasitiyani yishwe azira gushyigikira abo bari basangiye ukwemera kwa gikristu. Hari mu kinyejana cya IV. Igitabo cyandikwamo abahowe Imana (Martyrologe romain) kigaragaza ko yizihizwa kuwa 20 Mutarama muri kiliziya y’iburasirazuba no kuwa 18 Ukuboza muri kiliziya y’iburengerazuba.

 N’ubwo yari umukristu uhamye, yakunzwe cyane n’abapagani. Yahisemo kuba umusirikari, yigomwa ubukire bw’iwabo akiri muto agamije kurengera Kiliziya yatotezwaga bikomeye, afasha abakristu kuko nawe yari we, bigatuma urubanza baciriwe rwo kwicwa rutabaca intege ngo bihakane Imana. Sebasitiyani yari afite ingabire y’Imana imuha ubuhanga no gushishoza ; ntiyigeze atererana Kristu kandi nta n’ubwo yigeze agaragariza abarwanya Kiliziya ko akunda Kristu, bityo abasha kugoboka kenshi imfungwa z’abakristu zari zaragowe bitavugwa.  Uko kwiitangira Kiliziya, kwatumye ahabwa izina ry’Umurengezi wa Kiliziya.  

Umunsi umwe yari aherekeje imbohe z’impanga, Mariko na Mariselini, arabakomeza kugira ngo batsinde igishuko cy’umuryango wabo wabashishikarizaga guhakana ubukristu ango baticwa, badahorwa Imana. Uku gukomeza Mariko na Mariselini kwabaye imbarutso y’igitangaza kuko byatumye umugore witwa Zowe (Zoé) utarashoboraga kuvuga, nyuma yo gutwarwa n’amagambo yabwirwaga izo mbohe, yegeriye Sebasitiyani, bituma yongera kuvuga. Iki gitangaza cyatumye ababyiboneye n’amaso benshi bahinduka bemera Yezu Kristu kandi benshi bakira uburwayi bunyuranye. Ibi ntibyatinze kugera ku muyobozi w’umujyi wa Roma, préfet Chromace, wari urwaye bikomeye.  Nuko yogira inama yo gusaba ubufasha Sebasitiyani na padiri Polikarupe, bamusazeranya ko bamukiza niyemera ko ibibumbano byinshi bisenywa. Uyu muyobozi yaje kwegura, arahinduka aba umukristu bituma akira indwara nuko icyo gitangaza gihindura abantu bagera kuri 4 000, bitagombeye ko malayika abonekera abo kwa Chromace.

Igihe cyarageze Sebasitiyani aregwa ibwami kuri Diyokelesiyani wamukundaga cyane ko ashyigikira abakristu. Bamuhatiye kureka kuba umukristu, we ntiyava ku izima. Igihe ahinguts imbere y’umwami, azira ubwoba, yahamije ko ari umwigishwa wa Yezu Kristu: nuko Diyoklesiyani aramubwira ati : ‘waratinyutse! naragukungahaje, ngutuza ibwami, none ngo uri umwanzi w’umwami n’uw’imana zacu ?’. Sebasitiyani ati : ‘ iteka ryose nambaje izina rya Yezu Kristu nsaba ngo uzarokoke kandi urambe ku ngoma, kandi iteka ryose nasenze Imana yo mu Ijuru’. Diyoklesiyani abonye ko Sebasitiyani ari umwemeramana udahinyuka, yahisemo kumutanga ngo yicwe. Umwami yategetse ko Sebasitiyani azirikwa ku giti, akicishwa imyambi n’abasirikari yari akuriye. Sebasitiyani yatewe imyambi myinshi kugeza aho aba nka yamaswa wagira ngo ifite imyambi mu ruhu, bamusiga aho bagira ngo apfe nyamara Imana yemera iramukiza.  

Nyuma yaje gusubira ibwami, atakambira Diyokelesiyani, amwereka ibyiza by’ubukristu ariko we ntiyahinduka. Igihe kimwe Sebasitiyani ahengera umwami akikijwe n’ingabo ze n’abandi bantu benshi, araza n’imbere ye, ati: ‘Nyaguhorana ingoma, niba udakuyeho iteka waciye ryo kurimbura abakristu, kandi aribo bayoboke bawe b’ukuri, Imana itarenganya iraguhannye vuba bidatinze. Warantanze ngo banyice; nyamara Imana yankomereje ubugingo ngo nze kukubwira ibyo nkubwiye’. Diyoklesiyani ngo amare kubyumva ntiyahinduka, ati: ‘Uratumitse none ho genda bakwice mbireba’. Ubwo ategeka ko akubitwa inkoni ikozwe mu cyuma (verges) kugeza ashizemo umwuka, apfa atyo, aguye i Roma, Hari kuwa 20 Mutarama 288. Umubiri we bawujugunye mu mazi bagira ngo abakristu batawubona bakajya bamwiyambaza- vénérer. Kuko umuntu w’Imana atazima, Sebasitiyani yabonekeye mutagatifu Lusiya, amuhishurira aho umubiri we uri. 

IBITANGAZA BYAKURIKIYE URUPFU RWE

Nyuma yo kubonekera mutagatifu Lusiya, ku ngoma y’umwami Humbert, ubutaliyani, by’umwihariko umujyi wa Pavie, bwugarijwe n’icyorezo-peste- cyahitanye abantu benshi. Malayika yabonekeye abatuye i Pavie, abamenyesha ko icyorezo kizahoshwa no kubaka aritali yatuwe mutagatifu Sebasitiyani. Iyo aritali imaze kubakwa mu kiliziya (église Saint-Pierre-aux-Liens) icyorezo cyarakize, nuko ibisigaye by’umubiri wa mutagatifu Sebasitiyani (reliques) bijyanwa i Pavie kugira ngo uwo mu maritiri yiyambazwe n’abakristu.

Mutagatifu Sebasitiyani ni umwe mu batagatifu b’abasirikari bahowe Imana ba kiliziya y’ikubitiro. Ibihugu bimwe bimufata nk’umurinzi w’abasirikare, abarinzi b’i Roma (gardes suisses) n’abofisiye ba polisi. Ni umurinzi w’imiryango imwe n’imwe y’abihayimana. (Confrérie Saint- Sébastien de Bligny-sur-Ouche en Côte-d’Or, l'ordre des chevaliers de Saint Sébastien de Soissons) akaba n’umurinzi w’imijyi myinshi ;

1.     Bratislava, umurwa mukuru wa Slovaquie

2.     Caserta, Avella, Mistretta na Assolo mu butaliyani

3.     Melilli na Cerami muri Sicile

4.  Rio de Janeiro muri Brésil, uyu mujyi washinzwe kuwa 20 Mutarama 1502, witwa   ‘São Sebastião de Rio de Janeiro’

5.     Palma de Majorque na Saint-Sébastien muri Espagne

Mutagatifu Sebasitiyani ashyinguye i Roma hafi y’ intumwa Petero na Pawulo, hari n’abavuga ko ibice by’umubiri we byakwirakwijwe muri kiliziya zitandukanye ku migabane yose. Yiyambazwa cyane cyane iyo hateye ibyorezo. Bivugwa ko muri iki gihe isi ihanganye na corona, mutagatifu Sebasitiyani ari umwe mu batagatifu biyambajwe cyane kimwe na mutagatifu Rita na mutagatifu Roch.  Uwamamaje cyane imibereho ye ni Mutagatifu Ambrozi wabaye umwepiskopi wa Milano mu Butaliyani.

Numva nagendera kuri gahunda

Umumararungu Yvonne aba muri iri tsinda

Urwibutso rw'Intama za Yezu i Bungwe 

Itsinda ry’intama za Yezu rikorera muri paruwasi ya Bungwe ni rimwe mu matsinda usangamo urubyiruko rwinshi, by’umwihariko abana. Ni itsinda ry’isuku n’ibyishimo bituruka ku burere batozwa n’ababikira ba Mtg. Chrétienne ndetse n’ubusabane bubahuza nabo bashumba. Bimaze kwigaragaza ko iri tsinda ryari rikenewe uhereye ku kamaro karyo n’ibyo abarimo bivugira. UMUMARARUNGU Yvonne, ni umwe mu basezeranye mu itsinda rya mbere, aradusangiza ku byiza byo kurererwa mu ntama za Yezu; aradusangiza icyo kuba ari intama ya Yezu bimufasha mu buzima bwa kinyeshuri.

Ati: “kuba ndi intama, mu buzima bw’ishuri ni ukumenya mbere na mbere uwo ndiwe n’icyo ndicyo,” bikamufasha kumenya igikwiriye n’ikidakwiriye gukorwa na we mu gihe runaka. Iyo utiyizi wangiza byinshi cyane, ukohokera mu bitaguhesha ishema, ugatakaza igihe cyawe mu bidashinga. Icyo Yvonne aharanira, ari nacyo izindi ntama zagakwiriye guharanira ni ukuba uwo uriwe. “Numva muri jyewe, ubwo ndi intama ya Yezu naba koko intama nyayo, numva nahora nishimye” n’ubwo umuntu ari umunyantegenke, uhura na byisnshi bimutera kubabara. Yvonne, kuba mu ntama bimutera kunyoterwa n’umuco mwiza wo kubaha no kubahiriza gahunda. Ni byo avuga muri aya magambo; “Numva nagendera kuri gahunda y’ikigo; sinkererwe cyangwa ngo nirwe mpangana n’abarimu cyangwa abanyeshuri.”

Twumva, mu buzima bwo ku ishuri, amakosa menshi akorerwa mu cyitwa ikigare, mu ntama batozwa kutagendera mu bigare. Ni byo Yvonne avuga; ‘ngomba kwitondera kugendera mu kigare kuko nta sura nziza mba nerekanye.’ Ni byo koko buri wese aba agomba kubahisha itsinda arimo kugira ngo rigaragare neza kandi rinamufashe koko kwitagatifuza no gutagatifuza abandi. Akomeza agira ati: “kuba ndi intama, ngomba kwiga ntabyukira mu magambo ngo nyirirwemo. Nkirinda kwiba no kwangiza,” akabyirinda cyane ku buryo atashimishwa no gutwara ikaramu ya mugenzi we cyangwa igikoresho cy’ishuri. Ku bwe yirinda ikibi azirikana rya jambo ngo ‘iriya na yo ni intama’ ryavugwa igihe cyose afatiwe mu makosa.  Umwana wo mu itsinda ry’intama naharanira kugendera kuri gahunda y’aho ari, akirinda kwiba no kwangiza, gusuzugura n’andi makosa, nta kabuza azaba arushaho kwegurira Imana umutima we, azirikana amagambo ya Mtg. Mariya Madalina wa Pazzi mu marembera y’ubuzima bwe bwo ku isi: “Ndasaba nkomeje kutazagira undi mwegurira umutima wanyu utari Nyagasani.”

Ni njye mushumba mwiza (Yh.10,1-18)

(Ifoto: internet)

Ivanjili yanditswe na Mutagatifu Yohani itubwira ikiganiro Yezu yagiranye n’abafarizayi, abaha ikigereranyo cy’umushumba mwiza (Yh.10,1-18). Yabahamirije rwose ko ariwe mushumba mwiza, umenya intama ze, akazigurana kandi akaziha ubuzima. Ngiki igituma intama zikunda umushumba wazo, zikamukurikira kandi zikamwumvira; koko Yezu atubereye umushumba mwiza!

Ø Yezu ni we rembo ry’intama

Yezu kristu abihamya yeruye ko ariwe rembo intama zigomba kwinjiriramo kugira ngo zikizwe.  Ati “Ndababwira ukuri koko: ni jye rembo ry’intama. Ni jye rembo; uzanyuraho yinjira azakizwa, azishyira yizane kandi abone urwuri.” Kuba uwa Yezu Kristu ni iby’agaciro kuko biduhesha ubwisanzure, tukabona urwuri nyakuri, tukarubamo twishimiye ibyiza birugize. Ese twanganya iki Kiliziya itureresha ijambo ry’Imana kandi ikaduhembuza amasakaramentu? Kiliziya ni urwuri rw’intama za Kristu kandi rusendereye ibyiza byinshi rukomora kuri uwo Kristu urubereye umutwe.

Ø Yezu, Umushumba mwiza wigurana intama ze

Ni ukuri; umushumba mwiza yigurana intama ze; uko kuzigurana kukazihesha ubuzima bw’iteka. Nimuzirikane aho turirimba ngo ‘Muze dushimire uwatwiguranye tukaronka ubuzima.’ Iki ni kimwe mu bimenyetso by’ikirenga bigaragaza ubwiza bwa Yezu Kristu, Umushumba mwiza. Twamugereranya na nde, Yezu wapfuye urupfu ruhesha abantu bose umukiro? Ahora atugoboka mu makuba duhura na yo, ntadutererana, araduhumuriza, aradutabara. Ese ibyo wagezeho byose wabishobojwe na nde? Ibibi byaguhushije, ibyo wahonotse amahoro ni ku mbaraga zawe? Nitwemere tumwumve ijwi rye; turyumvire twima amatwi iby’ahandi byose. Niwe wenyine tugomba gukurikira we utubwira ati “ndetse nemera guhara ubugingo bwanjye, nkabutangira intama zanjye.”

Ø Yezu, Umushumba mwiza, atanga ubugingo

Intama zikesha ubuzima umushumba uziragira, uzimenyera ubwatsi bwiza n’amazi afutse, akazimenyera isaso n’ibindi byose zikeneye. Natwe ibyo dukenye ngo tubeho neza nk’abajya mu ijuru, Yezu arabifite kandi abitanga ku buntu; kwa Yezu hari byose; nta nzara ibayo, nta nyota. Yezu Kristu arahari wese muri Kiliziya kandi ni we rembo, inzira, ukuri n’ubugingo, akaba n’umugati utanga ubugingo wamanutse mu ijuru. Ese ubwo buzima ufite wabuhawe na nde? Kwibaruka ni ugutanga ubuzima, ese ibyo wabyishoboza, bitari mu bushake bwe? Byose ni kubwa Yezu, umushumba mwiza!

Ø Umushumba mwiza ahorana impuhwe

Umworozi mwiza ntatuza, ashimishwa no kubona amatungo ye ameze neza kandi yiyongera. Na Yezu Kristu ntashimishwa no kubona intama zitari mu rwuri ahubwo anezezwa no kuzikoraniriza mu gikumba kimwe ngo zisangire urwuri rutoshye n’amazi afutse. Yezu agira urukundo nyampuhwe ruhoraho. Ni kenshi ducumura, tukirengangiza urwo rukundo rwe, ruhora rutwibutsa ko tugomba guhorana umutima utunganye; ese We aradutererana? Kutugira abe, akaduhaza ubuzima kandi ntaduheze ku mbabazi twabiganya iki? Ni uko se tubikwiriye? Nimwongere mutekereze kuri aya masakaramentu; Batisimu, Ukarisitiya, Penetensiya…

Bavandimwe natwe batisimu twahawe yaduhaye ubutumwa bwo kuba abashumba b’ubushyo bwe. Tube abanyamwete mu butumwa nyabutatu dukesha batisimu tuzirikana ko “icyaha gihindura umuntu umunebwe naho ubutabera bwa Kristu bukamugira umunyamurava (S. Jean Chrysostome)”.

Yezu niwe wabahamagaye, muramubenguka

Itsinda ry’intama za Yezu zir imuri Salle

 Urwibutso rwi Intama za Yezu i Bungwe

Ni ingingo yibukijwe abakristu bitabiriye igitambo cy’Ukarisitiya cyabereyemo amasezerano y’abana 54 babarizwa mu itsinda ry’intama za Yezu. Mu muhango witabiriwe n’imbaga y’abakristu harimo n’abihayimana bo muryango wa Mtg. Chrétienne bashinzwe gutegura no kwita ku ntama za Yezu, Padiri Antione NGAMIJE MIHIGO, padiri mukuru wa Paruwasi Regina Pacis Bungwe yibukije abagiye kwinjira mu rwuri, ko bahamagawe na Kristu, ati ‘Yezu niwe wabahamagaye, muramumenya, muramubenguka.’ Koko rero, Nyagasani Yezu niwe uduhamagara, akaduha ubutumwa butandukanye dusohoreza muri kiliziya ye, yuzuye ububasha bwe.

Nibyo padiri Antoine yabwiye imbaga y’abakristu, ati “Kiliziya ni iya Kristu, niyo mpamvu ububasha bwayo ibukomora kuri Kristu kandi ikabuhorana.” Uwo Kristu uduhamagara ntagira iherezo. Kumukurikira ni ukugira uruhare kuri kamere y’urukundo n’ukutagira iherezo bye. Padiri yamenyeshe abakristu ko ‘nidukurikira urukundo rwa Kristu, tugakundana nk’uko yadukunze, tuzahoraho iteka.’

Padiri Antoine akomeza yibutsa intama za Yezu ibikwiriye kuziranga. ‘Mugomba kuba mukundana, abo mwigana, abo muturanye, mugomba kubagaragariza urukundo’ kuko nta kindi bahamagarirwa kitari urukundo nkuko padiri akomeza abishimangira; ‘ikigomba kubaranga ni urukundo; kurangwa n’urukundo ni cyo Yezu abahamagarira.’ Ni byo koko Yezu niwe mutwe wa kiliziya kandi asangiye kamere na se; tuzi neza ko Imana ari urukundo niyo mpamvu Padiri Antoine agira ati “urukundo ni ishingiro rya Kiliziya!”

Padiri mukuru Antoine yakomeje inyigisho ye, yibanze ahanini ku bana bari mu rwuri, abagiye kurwinjiramo n’ababyeyi ahamya ko abana bagomba kubaha ababyeyi n’ababyeyi bakubaha abana babo, bakabakosora ariko birinda kubahahamura kandi bagafata iyambere mu kubereka icyiza no kucyibatoza ubudahuga. Yanibukije isano iri hagati y’umwana n’umubyeyi we wa Batisimu agira ati ‘umubyeyi wa batisimu afite ubuzima bwa roho kando roho yawe irabukeneye.’ Birakwiye rero kububaha no kubegera igihe twitegura amasezerano kugira ngo badusabire ku Mana. Erega nta masezerano yoroha, kireka iyo utayahaye agaciro cyangwa utazi icyo avuze mu buzima bwawe n’ubwa Kiliziya ya Kristu.

Bana, ntama za Yezu nimukunde Yezu, we Ntama w’Imana ukiza ibyaha by’abantu. Nimuzirikane ko amasezerano yose, harimo n’iryanyu, ashingiye ku rukundo bityo mukunde Yezu kuko abikwiye, ntawe uhwanije ubwiza na we kandi agomba guhebuza byose gukundwa nk’uko tubizirikana mu isengesho ryo gukunda.

Gukunda Yezu ni ukwifuza gusa na we, ni ukurarikira ibyiza agabira abemeye kumugira ibanze mu mitima yabo, ni uguharanira kuba nka we no gukomezwa na we igihe wamutengushye ukagwa bityo akaguhunda imbaraga-nyabuzima. Bana Mtg. Efuremu ati “Aragowe kandi ateje impuhwe uri kure y’urukundo rw’Imana.  Iminsi ye ayimara asinziriye mu byago, kure y’Imana, ahataba urumuri nuko agatura mu mwijima (S. Ephrem le Syrien. Discours sur les vertus et les vices.)