Mutagatifu Tewotimi, Umwepiskopi (+407)

Tewotimi yavukiye mu karere k’abapagani, muri Aziya ntoya (Turukiya) mu muryango w’abapagani. Yarezwe n’abagereki, yigishwa na bo; aba umunyabuhanga w’ikirangirire cyane mu bijyanye n’imitekerereze-nyurabwenge y’abagereki. Ni na cyo bakurijeho bamwita ‘Tewotime’.  Yaje kuvumbura ukuri mu Ivanjili, Ubwo buhanga bwe ariko abujijuza cyane inyigisho ntagatifu z’Ivanjili ya Yezu Krisitu. Yemeye ubukirisitu ari umugabo ukuze, yihata imico n’imigenzo yabwo mitagatifu, aribabaza cyane, umubiri we awufata rwose uko umwanzi agenzwa. Nyuma bamugira umwepiskopi wa Tomi (Thomes) muri Sitiya (Scythie) muri Aziya ntoya. Ategeka iyo kiliziya ku ngoma y’abami Tewodozi na Arikadi.

Urukundo rwe rw’Imana rutuma yambuka uruzi rwa Danibe (Danube) ruri mu Burayi bwo hagati ajya kwigisha abantu bo mu bwoko bw’abahuni (Huns) bahoraga bashaka kudurumbanya ubwami bwa Roma. Abo banyamahanga babonye ibitangaza akora bamwita imana y’abamoni. Icyakora baramwumvira cyane; buhoro buhoro abaha imico y’abantu, abaca ku bugome n’ubushimusi bwabo, bacika ndetse ku kujya bagira igihugu bahagurukira kuyogoza. Rimwe umupagani umwe muri bo byari byarakaje, yenda umuheto we ashaka kumurasa ngo amwice. Agize ngo arambure ukuboko, kumiranira mu kirere ntiyaba agishoboye gutamika; ibyo kumurasa na byo biburiramo bityo. Nyuma ariko aho yicurije icyaha cye, Tewotimi aramusabira, ukuboko kwe kurakira.

Mutagatifu Tewotimi yari incuti cyane ya mutagatifu Yohani Kirizositomi, amufasha rwose kurwanya abanzi ba Kiliziya Kirizositomi yarwanyaga akomeje. Bimuzana ndetse mu Nama nkuru ya Kiliziya yabereye i Konsitantinopoli. Arengera cyane inyigisho za mutagatifu Kirizositomi bari baciye muri iyo nama, araziburanira aratsinda. Yitabye Imana ahagana mu mwaka wa 407. Tumwizihiza ku itariki 20 Mata. (Aya mateka yakusanyijwe na padiri Théophile TWAGIRAYEZU, umupadiri wa Diyosezi ya Byumba. Ku yandi makuru ku nyandiko zawakusann na we ku mibereho y'abatagatifu bariza kuri tel: 0788757494, 0782889963, ubunyamabanga bwa SPES MEA).

Aho byavuye:

• https://nominis.cef.fr/contenus/saint/2165/Saint-Theotime.html
• DIX MILLE SAINTS, Dictionnaire hagiographique cyanditwe n’Ababenedigitini b’i Ramsgate. Ed.VI., Brepols,1991.p.481. 
• ABATAGATIFU MU MINSI Y’UMWAKA, Ed. De l’imprimerie de Kabgayi, Icapwa rya kabiri,.Nzeri 2015.p.124.

Nta buranga burengeye ubwenge, uko wahitamo umukunzi

Bimwe mu byifashishwa mu kongera uburanga

Iyo umuntu bamubonanye n’undi kenshi bavuga ko bakundana; abakundana, iyo bahuye ubuzima burahinduka kuko bishimirana mu mibereho yabo yose, bagakosorana buzuzanya bagambiriye guterana ibyishimo. Ugasanga umwe abuze uko yifata, atangiye kugira amasoni, bakarebana akana ko mu jisho... Ibi ariko ntibyagaragaza abakundana by’ukuri; bivuze ko n’abaryaryana bishobora kubaranga. Umutima wonyine niwe ubitse ukuri kandi biragoye kumenya akari ku mutima ariko kandi birashoboka. Ibikorwa bishobora kuranga akari ku mutima. Mu guhitamo umukunzi, hari ibintu bibiri by’ingenzi abahungu n’abakobwa bahuriraho, nyarmara ubyishinze byonyine ntiwahirwa. Benshi mu bakundwa ntibaba babyujuje byose icyakora ubyujuje niwe uhiga abandi. Hari ubwo umuntu aba afite kimwe nabwo gicagase bigatuma ashakwaho ubucuti buzamugeza ku isakaramentu ryo gushyingirwa. Turebere hamwe ibyo abasore n’inkumi batekerezaho mu guhitamo inshuti.

Ubwiza / uburanga

Buri wese agira uburyo bwe yihariye arebamo ubwiza. Ni yo mpamvu abantu badahuza amahitamo; ugasanga hari abanga kanaka nyamara hari uwo ahora mu bitekerezo amanwa n’ijoro. Hari abakunda abirabura, hari abakunda inzobe, imibiri yombi, bamwe bakunda abananutse abandi bagahitamo ababyibushye... Ngibi ibikubiye mu bwiza bw’umubiri.  Umuntu ashobora kuzuza ibyo ukunda ku mubiri ariko ugasanga nta muco agira, nta kirazira n’imwe imuranga usibye gushira isoni gusa kandi isoni ari umuco mwiza ubuza umuntu gukora ikibi. Ibyo bigatuma ntawumushakaho ubucuti kuko aba afite uburanga burengeye ubwiza bw’umuco. Bavandimwe, umukobwa mwiza yaba ari ukeye ku mutima no ku mubiri? 

Ubukungu

Hari igice cy’abantu bumva ko batakundana n’abakene; ngo nta wajya aho ibintu bitari. Umutungo wifuzwa ni imirima, ubworozi, amafaranga, imodoka, amazu, amashuri n’ibindi. Umukobwa ubifite abahungu bagahurura nk’imishwi ihamagawe na nyina naho umusore wabironse abakobwa bakamwuzuraho bamurwanira nk’intozi zirwanira agasimba.

Nimwibuke aho dukunda (abagatolika) kuririmba dutya: “Ntugashukwe n’ibintu by’iyi si, jya umenya y’uko byose bizashira, ntibikagutware ngo bikwambure ikamba ryawe (Inzira y’umukiro).” Bavandimwe, twibuke kandi ko umuryango urangwa no kudahuza (society depends on differences) maze dushimire buri wese amahitamo ye, niba agamije kumugeza ku Mana, kandi tureke kwivanga mu mibanire y’abantu tugamije kubashiramo amahitamo yacu. 

Bavandimwe, twabonye byinshi byitabwaho mu guhitamo umukunzi. Icyo wamenya mu gutamo umukunzi ni uko uburere, ubushake bwo gukora n’ubuhanga mu gucunga umutungo byagakwiye kuba ku isonga. Ibitekerezo bizima nibwo bwiza bw’agahebuzo! Ushobora kubana na we ibyo atunze yarabirazwe, atarigeze abikorera, mutazi no kubicunga, bikabayoyokana murora. 

Ushobora kubana na we yarabikoreye, ukabibamo umukozi kandi mwarasezeranye ivangamutungo; mbese ntubigiremo ijambo usibye inkyuro za buri munsi. Mushobora kubana ntacyo mutunze, mugashakisha buhoro buhoro, mukazahwana n’ababitangiranye mwitaga ko bahawe umugisha mukagera n’aho mubarenga. Mushobora kubana neza mu mahoro, umutungo mufite mukawugiramo uruhare rungana ariko mwabura umugisha w’Imana, nko kwibaruka, kurera ugakuza n’urukundo rwihangana, byose bigahinduka ubusa, mukarutwa n’abadatunze. 

Nimwimike urukundo nyarwo mu mitima yanyu, murangwe no gushishoza. Nimwirinda guhubuka kandi mukaragiza Imana urukundo rwanyu na mbere yo kumenyana n’uwo wifuza kuzabana na we akaramata, nta kabuza Imana yo Rukundo izarubasenderezamo.

Tumenye Mutagatifu Mariselini (Marcellin de Carthage +413)

Igihe abami b’abanyaroma batotezaga abakirisitu, hari abakirisitu benshi bagiraga ubwoba, bagatura ibigirwamana ibitambo, n’ubwigenge bwa roho zabo bakabupfusha ubusa bagapfa kuri roho kubera ubwoba bwo guhamya Krisitu, bakemera kuba ibigwari ku mugaragaro. Kandi muri abo babaga ibigwari harimo n’abapadiri bahakanaga Krisitu. Ubwo rero igihe Kiliziya isubiranye amahoro guhera mu mwaka wa 313, igihe hari itangazo (Edit de Milan) ryabuzaga kongera gutoteza Kiliziya, hibazwaga ikibazo gikurikira : « ese ni ngombwa kongera kwakira muri Kiliziya no mu busaseridoti abari barihakanye ukwemera kwabo kubera gutinya kwicwa ? » abadonatisiti bayobowe n’uwitwaga Donati bo bahitaga basubiza bati « oya ». Mu myaka ya za 400 rero, abigishabinyoma bitwaga abadonatisiti bari bamaze gukwira cyane muri Afurika ya Ruguru.  Mutagatifu Mariselini yabayeho mu gihe cy’abo bigishabinyoma. Yari umukirisitu wubatse. Yari aziranye na mutagatifu Agusitini wa Hipona. Uyu Agusitini ni we wadutekerereje ibye atubwira ko Mariselini yari umukirisitu wiga iby’Imana, witonda cyane, ufite kandi umwete wo kwiga iby’Imana no kubikurikiza akomeje.

Igihe Kiliziya ihisemo kugirira impuhwe abo bagarukiramana, abo badonatisiti bahisemo kwiyomora kuri Kiliziya bagashinga idini ryabo. No mu myaka ijana nyuma y’itangazo ry’amahoro ry’ i Milano, muri Afurika hari hakiri abatsimbaraye ku kutakira abagarukiramana. Icyo gihe umwami w’abami Honoriyusi yategetse Mariselini guhuriza hamwe abagatolika n’abadonatisiti kugira ngo hagaragare ufite imyemerere inyuze mu kuri. Mariselini icyo gihe yari umutware wa Karitaje, ategekera abaromani. Mariselini yari umuntu wari warize amashuri menshi azi ubwenge cyane. Mutagatifu Agusitini yamwandikiye ibitabo byinshi kugira ngo asubize ibibazo Mariselini yibazaga. Kimwe muri ibyo bitabo kivuga ku « Ibabarirwa ry’ibyaha ». Iyo nama Mariselini yayikoresheje muri 410, abagatolika batsinda impaka rwose, batsinda abadonatisiti, berekana neza aho ukuri Yezu Krisitu yabigishije guherereye. Marselini aba ari we uca urwo rubanza. Abadonatisiti baratsindwa. 

Mariselini yaciye iteka y’uko batazongera kwigisha amafuti yabo. Babirengaho ariko bakomeza kwigisha. Mariselini ashatse kubahana, mutagatifu Agusitini amwandikira ibaruwa yo kubimubuza. Abadonatisiti rero bamurwaye inzika. I Roma, ingoma zihinduye imirishyo, Mariselini aranyagwa. Abimye ingoma baba inshuti z’abadonatisiti. Abadonatisiti bafatisha Mariselini kugira ngo bihorere. Baje kumurega ko agambanira umwami w’abami. N’ubwo mutagatifu Agusitini yabyitambitsemo, ndetse akandika igitabo yise « Umurwa w’Imana » (la Cité de Dieu) kugira ngo amurengere, ariko biba iby’ubusa. Abadonatisiti baje kumwicisha hamwe na mukuru we wari umucamanza. Ariko rero iryo teka ryo kumwica ntiryari ryaturutse ku mwami mushya w’abanyaroma. Abimenye anyaga umutware yari yagabiye Karitaje, aca iteka rihuje n’iryo Mariselini yari yaciye. Abadonatisiti bishyura ubugome bwabo, na bo barahanwa. Twizihiza mutagatifu Mariselini w’i Karitaje ku itariki 6 Mata. (Byakusanyijwe na padiri Théophile TWAGIRAYEZU, umupadiri wa Diyosezi ya Byumba).

Aho byavuye:

• ABATAGATIFU MU MINSI Y’UMWAKA, Ed. De l’imprimerie de Kabgayi, Icapwa rya kabiri, Nzeri 2015. P.113-114.
• DIX MILLE SAINTS, Dictionnaire hagiographique cyanditwe n’Ababenedigitini b’i Ramsgate. Ed.VI., Brepols,1991. p331.

Ibyishimo by’ukuri, ubuzima bw’uwiyunze n’Imana

Hari abibwira ko kunywa inzoga bitanga
ibyishimo

Mu buzima bwa muntu, kimwe mu biranga kubaho neza ni ibyishimo. Umuntu agomba kubaho anezerewe ndetse abantu bamwe banahamya ko umunezero utera kuramba, bityo ibyishimo bikaba ibyangombwa mu mibereho yose ya muntu. Nicyo gituma dukora tutikoresheje kugira ngo tubigereho kuko kubura ibyishimo mu buzima ari ugupfa uhagaze. Muntu ahamagariwe kubaho ubuzima bwe bwose arangwa n’ibyishimo, kabone n’iyo ibihe bitagenda neza nk’uko yabyifuzaga. Kurangwa n’ibyishimo ni ikimenyetso cy’uwashikamye, amurikiwe na Roho Mutagatifu, mu kwizera Imana n’Umwana wayo, Yezu Kristu. Bene uwo, n’aho ab’isi babona ko ashengurwa n’agahinda, ishavu ryimukira kwiyumanganya maze ibyishimo bikaboneka ahari umwuka w’ibyago. 

Isoko nyakuri y’ibyishimo

Ese ibyo byishimo tubigezwaho n’iki? Mu zihe nzira? Birakwiye se? Nubwo gushaka umunezero ari ngombwa, bitera ibibazo byinshi kuko hari abatazi ibyishimo bakeneye n’aho bagomba kubishakira. Byaba ibya roho ndetse n’iby’umubiri. Hari abasigaye barazwa inkera no kubona ikibi bikundira kuko icyiza kitakibatuyemo; babayeho nk’abo icyiza cyahunze, nk’abahindutse icumbi ry’umwijima w’icuraburindi kuko bihunza Urumuri rubarasiraho. Bahitamo ku bwende bwabo cyangwa bashutswe ikibi batitaye ku ngaruka cyabazanira bo ubwabo ndetse na bagenzi babo. Hari abantu bashimishwa no kwiyegereza ikibi kandi bakagombye kugihunga! 

Bavandimwe, ni he ibyishimo byacu biganje? Ibyishimo ni ijambo ryagira ubusobanuro bwinshi bitewe n’urisobanura kuko abantu badahuza ibibatera umunezero. Ibyishimo ni ijambo rikoreshwa na bose: abagome n’abagiraneza, abakristu n’abapagani, abahakanyi n’abayobe, imfura n’ibigwari, ibirara n’abanyamutima. Rifite ibisobanuro binyuranye nyamara bihamagarirwa kuba bimwe n’ikibitera kikaba kimwe kuko bigomba guturuka ku Mana, bigasanga muntu kandi bikamugeza ku Mana yo ibitanga. 

Dore hamwe muho ibyishimo byakagombye guturuka: Gusenga uzirikana bose (harimo n’abakwanga). Gufasha no kwitangira abandi ubikoreye ko na bo ari abana b’Imana kandi ukabikorana umutima uzira uburyarya. Gutungwa n’ibyo wakoreye mu nzira zitunganye no gutoza abandi gukora hagamijwe kwitunga no kwigira. Kugira urugo rwiza; ni ukuvuga kugira umugabo, umugore, abana n’abakozi batinya Imana. Hari ugukiza umuntu umurinda akarengane no kumufasha gukiza ubugingo bwe inyenga y’umuriro itegereje gucumbikira abagomeramana ubuziraherezo... Umuntu nashimishwe no kutizirika ku by’isi ngo byiharire umwanya ukwiriye Imana na muntu mu mutima we. Nibwo azegukira Imana. 

Niba ushaka kwegukira Yezu iziture ku by’isi(1Kor.7,35), umenye kubiha umwanya ubikwiriye. Nta muntu ukwiriye kugengwa n’isi, ngaho ngo akurikiye ibyishimo. Ntibikabe, kuko muntu yahawe kugenga isi n’ibiyituye byose (Intg.1,28). Ibyo Imana yaremye byose ni byiza, ni ingirakamaro mu buzima bwacu kandi bigomba kuduhuza na Yo, bigatuma turushaho kuyikunda no kuyibisingirizamo, aho gutuma tuyitera umugongo. Nuko rero ibyishimo uterwa n’ibiremwa by’Imana byakagombye kuba ibyishimo bitagutandukanya n’Umuremyi wawe. Bavandimwe, ibintu ntacyo bitwaye; biba bibi igihe tubyivurugutamo, bikatwibagiza Imana bityo tukegukira ubuzima buhigika Imana aho kuyisingiza. Ibi ni byo bituma muntu yiberaho uko ashaka aho kubaho nk’uko Imana ishaka, ari na yo mpamvu usanga ikibi hari abakita icyiza, akababaro kakitwa ibyishimo, hanyuma umuruho n’amaganya bya bamwe bigahabwa umwanya w’umunezero ku bandi. 

Ingero ni nyinshi hirya no hino ku isi ndetse n’aho iwanyu mwahabona ubuhamya. Hari aho umuntu yemererwa n’undi kwica umwana kuko atamushaka, akemererwa gutingana (kubusanya na gahunda yagenwe n’Imana yo gushyingirwa). Hari abashimishwa no kuba indyarya, kubatwa n’ibiyobyabwenge, gukuramo inda no kujugunya abo babyaye… Ibi byose biterwa no kumvira sekibi aho kumvira Roho Mutagatifu utanga ubuzima ni byo bituma abantu badashimishwa n’ibintu bimwe bikwiriye koko kuba isoko y’ibyishimo kugira ngo babeho mu buzima bw’ineza iganza inabi nk’uko Mutagatifu Pwaulo abidukangurira (soma Rom.12,21). 

Ibyishimo se twabivuga dute? 

Ibyishimo by’ukuri ni ibitabangamira abandi mu nzira itunganye barimo bagana Iyabahanze. Ni ibtangize umubiri wa muntu, ingoro ya Roho w’Imana. Ni intangiriro y’ibyishimo bihoraho uzasenderezwa nugera muri kiliziya yo mu ijuru kuko bitaheje abakwanga n’abatakwitaho kandi bikaba byararanzwe no kwakira muntu uko ameze kose. Ibyishimo by’ukuri ni ubuzima, bibonekera mu kwiyunga n’Imana binyuze mu bavandimwe wahemukiye, kuyikorera mu biremwa byayo, gusoma no kubahiriza ibyanditswe bitagatifu no kwibanira n’Ubutatu butagatifu ubuziraherezo. Nuko rero bavandimwe nkunda, “Nimuhore mwishima muri Nyagasani; mbisubiyemo, nimwishime (Fil.4,4).”

Mutagatifu Stanisilasi, Umwepiskopi wahowe Imana (1030-1079)

“Petero, ku izina ry’Imana Data na Mwana na Roho Mutagatifu, ngwino uhamye ukuri kuko kwasuzuguwe.”

Uyu Stanisilasi yavukiye hafi ya Krakoviya (Cracovie) mu gihugu cya Polonye. Ni umwana w’ikinege. Ababyeyi be bamubyaye hashize imyaka irenga mirongo itatu barabuze urubyaro, bamutoza imico myiza, akurana gusenga no kwigomwa kandi yakundaga kurara ku butaka busa, nta kindi arambitseho, ndetse no mu gihe cy’ubukonje bukabije. Stanisilasi arangije amashuri yigiye muri Polonye n’ i Parisi mu Bufaransa, yifuzaga kwiha Imana mu bamonaki nuko igihe ababyeyi be bamaze kwitaba Imana, agurisha amasambu yabo maze amafaranga avuyemo ayafashisha abakene. Umwepiskopi wa Krakoviya yamubujije kuba umumonaki, nuko na we aramwumvira. Amaze kumuha ubupadiri, yamugize umunyamabanga we. Umwami Boleslasi wa II ubwe yahisemo padiri Stanislasi ngo abe umwe mu bajyanama be. Abakristu bamuyobotse vuba, baramukunda cyane kubera inyigisho ze nziza n’urugero rwiza yabahaga mu kwitagatifuza.

Igihe umwepisikopi wa Krakoviya yitabye Imana, umwami Boleslasi hamwe na rubanda nyamwishi basabye ko Stanislasi yababera umwepisikopi.  Nuko mu w’1072, Papa amutorera kuba umwepisikopi wa Krakoviya. Mu myaka ya mbere y’ubwepiskopi, Stanislasi yari abanye neza n’umwami nuko Diyosezi ayiyoborana ubuhanga n’ubwitonzi kandi inyigisho ze nziza zituma n’abari barataye ukwemera bagaruka. Ikindi ni uko yashimwaga na bose kubera ineza ye itagereranywa. Iwe hari harabaye amirukiro y’imbabare; iza roho n’iz’umubiri. Yasabye ko bamuha urutonde rwuzuye rw’abakene bo muri Krakoviya, asaba abamufasha kutagira umukene n’umwe basubiza inyuma. Iyo mico myiza ye ntiyatumaga yibagirwa imirimo ashinzwe ngo yemere kuba igikoresho cy’abategetsi bamwe bakozaga isoni ubukristu.

Igihe kinini mu bwepiskopi bwe, Stanislasi, yakimaze atotezwa n’umwami Bolesilasi II wa Polonye wari nk’igikoko, bose batinya. Yari yadukanye ingeso mbi, zirimo n’ubwicanyi. Stanislasi ntiyatinye kumuhana ndetse abonye ko amunaniye amufungira amasakramentu. Stanisilasi amaze kumwegera mu bwiyoroshye no kumusaba kwihana, umwami yararakaye cyane arahira ko azihorera, akazamwica. Muri icyo gihe, umwepiskopi Stanislasi yari yaraguriye diyosezi ye ubutaka, abugura ku mugaragaro n’abahamya bahari, maze uwo baguze, hashize igihe gito arapfa. Umwami amaze kumenya ko nta nyandiko y’ubugure Stanislasi yagiranye n’uwo baguze maze abyuririraho yitwaje amafaranga n’igitugu.  Yashatse abantu bo gushinja Stanislasi ko yigaruriye ubutaka bw’umuturage ku ngufu. Nuko Stanislasi abwira umwami ko nyuma y’iminsi itatu azamuzanira nyir’umurima bari baraguze uwo murima, n’ubwo yari amaze imyaka itatu apfuye.

Igihe kigeze, umwepiskopi ajya ku mva y’uwo bari baraguze umurima, hariho n’imbaga y’abantu, afungura imva yarimo amagufa y’uwo muntu, maze arapfukama arasenga, arangije abwira uwapfuye ati : “Petero, ku izina ry’Imana Data na Mwana na Roho Mutagatifu, ngwino uhamye ukuri kuko kwasuzuguwe.” Stanislasi amaze gusenga atyo, uwo muntu witwaga Petero arazuka, arahaguruka, afata ukuboko kw’umwepiskopi Stanislasi, abantu bose bareba kandi bagize ubwoba, maze bajyana imbere y’ubucamanza bw’umwami. Uwo Petero ageze imbere y’umwami ashinja umwami n’abahamyabinyoma be uburiganya bwabo, ahamya ukuri. Arangije ajyana n’umwepiskopi ku mva, ayinjiramo, ahinduka umurambo, hanyuma bongera gupfundikira imva. Umwami, aho kwisubiraho ngo areke inabi, arabisha, atuma ingabo ze kwica Stanislasi ubugira gatatu ngo zimwice ariko banga kumwica kuko bamwubahaga kandi bakanamukunda cyane.

Umwami ni we wamwiyiciye ubwe, amusanze mu Kiliziya atura igitambo cy’ukaristiya. Papa Inosenti wa IV ni we wanditse Stanislasi mu gitabo cy’abatagatifu kuwa 17 Nzeri 1253. Umurambo we uri muri Kiliziya ya Katederali ya Vaveli (Wawel). Kandi kuva ku mwami Vladisilave wa I, abami bose ba Polonye bamukurikiye bagiye bambikirwa ikamba ry’ubwami imbere y’imva ya mutagatifu Stanislasi. Tumwizihiza ku itariki 11 Mata.

Aho byavuye:

• ABATAGATIFU duhimbaza buri munsi, ed.Euthymia, Diyosezi Butare, Mata 2013.p.93. 
• ABATAGATIFU MU MINSI Y’UMWAKA, Ed. De l’imprimerie de Kabgayi, Icapwa rya kabiri, Nzeri 2015.p.117-118.
• DIX MILLE SAINTS, Dictionnaire hagiographique cyanditwe n’Ababenedigitini b’i Ramsgate. Ed.VI., Brepols,1991. p.467. 

Nimwambike neza ingoro ya Roho w’Imana

Iyi ni imwe mu myambarire igaragaza ibice
yakagombye kuba ihisha

“Kwambara ubusa ni ugusamburira, ni ukwirukana Roho w’Imana. Ni uguha indaro sekibi udashobora kubana na Roho w’Imana.”

Umuntu yifitemo icyifuzo cyo kubonwa no kugaragara neza. Uwo mutima wa ‘bambone neza’ ni wo utuma agura indorerwamo, akireba kugira ngo amenye niba ari bunyure abamubona. Ibyo akabikora yirengagije ko abantu bakunda ibitandukanye. Iyo ‘bambone neza’ kandi niyo ituma dusaba bagenzi bacu kudufasha gutoranya imyenda duhaha mu isoko, tukanabasaba kuturebera niba tugaragara neza mbere yo kuva mu rugo kugira ngo aho duca hose tuhanyurane umucyo. Umuntu ushira mu gaciro agomba gutekereza neza ku myambaro yambara n’uko ashaka kubonwa. 

Kuko burya ‘Imyambaro wambara iranga uwo uri we!’ nuko rero, ushaka kubonwa neza niyambare neza. Hari uwibwira ati: “n’ubundi ndamutse nambaye nabi sinasohoka ngo njye ahabona. Mbere yo gusohoka ndabanza nkireba, narangiza gutunganya ibyo mbona ko bidatunganye nkasohoka!” ‘Ntimuzi se ko imibiri yanyu ari ingingo za Kristu? Hanyuma rero nzafate ingingo za Kristu maze nzigire ingingo z’ihabara? Ntibikavugwe!  1Kor.6,15’.          

Ku bijyanye n’imyambarire, ni ngombwa kongera kuzirikana kuri ibi bibazo; ni ryari umuntu aba yambaye neza cyangwa nabi? Hari aho abantu bagirwa inama yo kwambara birebire, kutambara amapantalo n’amajipo asatuye, hari n’abandi bagirwa inama yo kwambara bakikwiza. Izi nama zose ziramutse zikurikijwe neza, kuzubahiriza byaranga, kuri abo babihisemo, uwambaye neza. Nyamara, uwashikamiwe n’iingeso cyangwa icyaha, bamusobanurira itegeko bugacya yamaze kubona uburyo azarikurikiza ritamuciye ku cyo rimubuza. Murabyumva neza ko ibyo atari ugukurikiza itegeko ahubwo ni ukugaragaza ko wamenye ko ribaho, ko uryirengagiza nkana. Uwo basabye kwikwiza kugira ngo aheshe bimwe mu bice by’ umubiri we icyubahiro, ahitamo guhisha umutwe, akambara birebire bihwanije umumaro na mikorosikopi. Usabwe kwirinda ibyerekana amatako n’intege, agahitamo kwiyambika birebire bimuhambiye. 

Usabwe kwambara neza, agahitamo kwambara amajipo wagira ngo ni ay’abo abyaye cyangwa ya mipira irobotse mu gatuza boshye uwamamaza amabere. Mu biranga umwari wiyubaha harimo kwambara neza no kugirira ibanga bimwe mu bice by’umubiri we; amatako, amabere, ibibero n’ibindi bikwiye kubahwa no kwitabwaho ku buryo bw’umwihariko. Wasobanura ute ko wiyubaha, ko wambara neza kandi wirirwa wanitse umubiri wawe, uwutaze izuba n’imbeho, ukawubeshya ko wawambitse? Wasobanura ute ko wiyubaha kandi ugenda utagataga kubera uko wambaye ipantalo nk’uwayitayemo umwanda? Umuntu utazi kwambara neza ntakakubeshye kwiyubaha kandi ibyo ntibikarangwe ku mwana w’Imana! 

Bavandimwe uwihara kwambara neza, ntabwo yambaye neza kiretse niba imyambarire ye imuranga nk’umwana warezwe neza kandi ikaba imufasha kubahisha icyicaro cya Roho w’Imana ugomba kumuturamo no kumuyobora ndetse akanamufasha gusingiriza Imana mu mubiri we, agamije kumenyekanisha Kristu no gukiza roho nyinshi.  ‘Ubundi se ntimuzi ko umubiri wanyu ari ingoro ya roho Mutagatifu ubatuyemo kandi ukomoka ku Mana, maze mukaba nta bubasha mwifiteho? 1Kor.6,19.’Uwambaye neza ni uwambara imyenda y’inyuma, azirikana ku mutima ko yambaye Kristu muri Batisimu kandi ko kwitandukanya na We ari byo kwambara ubusa; ikintu Adamu na Eva bazize! Ese iyo wambaye uko ubona bigufasha gusabana n’Imana? 

Tuzirikane ku gaciro ko kuba turi ingoro za Roho Mutagatifu n’ingingo za Kristu nuko bitwemeze ko kwiyambika ubusa ari ugusamburira Roho udutuyemo. Kwambara ubusa ni ugusamburira, ni ukwirukana Roho w’Imana. Ni uguha indaro sekibi udashobora kubana na Roho w’Imana. Kwambara neza ni ukubaha ubuzima butangwa n’Imana kandi ubwo buzima bukenera ifunguro rya buri munsi kugirango busagambe.

Mutagatifu Yohani Batisita, umubyeyi w’abafureri b’amashuri gatolika

Uwo uratirwa abahizi, imena mu ba kristu ni Yohani Batisita wa sale. Yavukiye mu Bufaransa mu 1651, yitaba Imana mu 1719. Amaze guhabwa ubusaseridoti, yababajwe cyane n’uko abana b’abakene babura amashuri kandi batabuze ubwenge. Muri icyo gihe ubutegetsi ntacyo bwafashaga abana b’abakene kugira ngo bashobore kwiga nk’abandi. Higaga gusa abana bashoboye kwiyishyurira amafaranga y’ishuri. Nibwo yigiriye inama yo kureba icyo yabamarira, nuko abanza gukoranya abo ashoboye, atangira kubigisha ubwe, nta mafaranga batanze. Kugira ngo uwo murimo ukorwe neza, Yohani yihutiye gushaka abarimu bamufasha, nuko ajya kubana na bo, abashishikariza uwo murimo kandi arabahugura kugira ngo bazawukore uko bikwiye. Nyuma abonye ko abo bana bumva nk’abandi bose, yihatiye gukwiza bene ayo mashuri n’ahandi henshi mu gihugu.

Hari abantu bamwe batashakaga ko abakene na bo biga, bakiga ntacyo bishyuye kandi bazamenya ubwenge nk’ubw’abishyuraga amashuri. Ngibyo ibyatumye Yohani agira abanzi benshi, banagerageza kumwica, ariko biba iby’ubusa, kuko Imana yari ikimufiteho umugambi. Yaramukomeze; ari umuruho, cyangwa andi magorwa, ntibyamuca intege, akomeza kwitangira uwo murimo nk’uko yawutangiye. Imana ndetse ituma benshi bumva ineza Yohani Batisita yashakaga kugirira abakene maze babimufashamo. Bamwe baje kubana na we kugira ngo bakorere cyane cyane Imana batyo.

Mu mwaka w’1684, yashinze umuryango w’abafureri w’amashuri gatolika, witabirwa na benshi bifuzaga gukorera Imana kimwe na we. Hanyuma abaha amategeko y’umuryango; amategeko yibanda ku kwikenesha, kwigomwa, gusenga cyane no kwita ku bakene n’imbabare. Yohani yari umuntu wicisha bugufi udakunda ibyubahiro, igihe bamuhaye icyubahiro bamugize “chanoine” yarabyanze akomeza kwitwa padiri. Yitabye Imana kuwa 7 mata 1719. Yapfuye umuryango w’abafureri b’amashuri gatolika umaze kuba mugari, n’imbuto zawo, abo bigishije, zimaze kuba nyinshi cyane. Yanditswe mu gitabo cy’abatagatifu kuwa 24 Gicurasi 1900. Tumwizihiza kuwa 7 Mata. 

Muri ibi bitabo wahasanga amateka ya mutagatifu Yohani Batisita wa sale:

• ABATAGATIFU duhimbaza buri munsi, ed. Euthymia, Diyosezi Butare, Mata 2013. p.99.
• ABATAGATIFU MU MINSI Y’UMWAKA, Ed. De l’imprimerie de Kabgayi, Icapwa rya kabiri, Nzeri 2015.p.114-115.

MUTAGATIFU YOHANI KLIMAKI

Mutagatifu Yohani Klimaki yavukiye mu gihugu cya Siriya mu mwaka wa 579. Izina rya Klimaki arikomora ku gitabo yanditse, kivuga ku buzima bw’ubutagatifu nk’urwego. Icyo gitabo yakise “Urwego rwa Paradizo”. Mu rurimi rw’ikigereki urwego ni Climax, bivuga na none ‘urwego rw’ijuru’. Yohani Klimaki yiganye amashuri umwete nuko ku myaka 16 aba amaze kuba umuhanga cyane, woroshya kandi agacisha make. Klimaki arangije amashuri, yahisemo kwiha Imana, nuko ajya mu bamonaki bo kuri Sinayi. Abaho yumvira nk’umwana muto kandi ajya imbere cyane mu kwitagatifuza. Afite imyaka 19, umumonaki witwa Maritiriyusi yamwitayeho cyane, amufasha gucengerwa vuba n’inzira z’ubutagatifu ku buryo byatangazaga cyane umukuru w’abamonaki. Nyuma y’uko umukuru wabo apfuye, Yohani Klimaki yarushijeho gushakashaka Imana mu mwiherero ukomeye mu buvumo, aho yari afite gusa ameza yariho Bibiliya, umusaraba, n’ibitabo by’inyigisho z’abatagatifu.

Imyaka mirongo ine yanyuma y’ubuzima bwe, Klimaki yayibayeho ameze nk’ubana n’abamalayika kuruta uko abana n’abantu. Yakundaga kwibabaza, akazirikana cyane iby’Imana ku buryo byamutwaraga mu bitekerezo agasa n’utakiri ku isi, ahubwo akaganira n’abamalayika ibyerekeye amabanga y’ukwemera. Aho yabaga yiherereye mu cyumba yabagamo, Klimaki yakundaga gusuka amarira, kubera ibyaha by’abantu. Ku bwe yumvaga ibitutsi abantu b’isi yose batukaga Imana yabiroha mu marira ye akabitembana. Hari n’ubwo yarizwaga n’ n’ibyishimo by’ubwiza butangaje bw’amayobera y’Imana yabaga yahishuriwe. Igihe cyarageze abantu benshi baza kumureba ngo abigishe iby’ukwihana n’ubuzima buboneye bwa gikirisitu, buri wese akamugira inama ye azakurikiza kugira ngo ubuzima bwe butunganire Imana.

Yohani Klimaki yabaye umuntu w’Imana, na yo imukoresha ibitangaza byinyuranye. Umugisha yatangaga wakizaga abarwayi, ugakomeza abadandabirana, ugahoza abababaye, ugakora ku mitima y’abanangiye, kandi ugahindura abahakanyi kurusha uko inyigisho zitanganywe ubuhanga zabikoraga. Yohani Klimaki yari afite ububasha bwo kwirukana amashitani; yatsinze amashitani yamuterezaga ibigeragezo, kandi yayirukanaga kenshi mu bafureri babanaga. Umunsi umwe umufureri witwaga Izaki yamupfukamye imbere, amusaba akomeje ngo amwirukanemo ibitekerezo by’ingeso mbi sekibi yamuterezaga ubudahwema. Nuko Klimaki aramubwira ati: “Gira amahoro y’Imana muvandimwe.” Akivuga ayo magambo, atangira gusenga. Mu ruhanga rwe habengerana urumuri ruturutse mu ijuru nuko rukwira mu buvumo hose, maze sekibi irasakuza cyane. Isengesho rirangiye, Izaki ahaguruka afite amahoro, yakize ibyo bishuko, ntibyongera kumugarukamo ukundi.

Yohani Klimaki bamusabye kwandika inyigisho z’ubutagatifu yabigishaga, arazandika nuko icyo gitabo acyita “urwego rwuriza paradizo.” Muri icyo gitabo yanditsemo amagambo avunaguye ameze nk’imigani migufi cyane, akaba inama nziza ku bashaka kugera ku butagatifu. Imana yamuhaye ububasha bwo gukora ibitangaza byinshi akiriho. Umunsi umwe, umumonaki wari mu gihugu cya kure cyane yugama izuba munsi y’urutare runini. Nuko ngo ajye kumva, yumva Yohani Klimaki aramuhamagara ati: “va munsi y’urwo rutare”. Uwo mumonaki ashaka aho Klimaki yumvise amuhamagara yaba ari, arahabura. Yareba kandi agasanga urutare rurakomeye. Aho bigeze apfa kuhava. Amaze kuruva mu nsi, ako kanya ruhirima nk’inkangu.

Abanyapalesitina baburaga imvura, Klimaki akabasabira ikagwa bidatinze. Yohani Klimaki yatorewe kuyobora urugo rw’abamonaki bo kuri Sinayi afite imyaka 75. Inyigisho ze zimera nk’iza mutagatifu Yohani Batisita mu butayu, abaho nk’ubana n’abamalayika muri ubwo butayu bwa Sinayi, kugeza igihe apfiriye. Klimaki yapfuye ahagana mu mwaka wa 649. Kiliziya ihimbaza mutagatifu Yohani Klimaki kuwa 30 Werurwe.

Kubungabunga urukundo ni ugukiza isi

Ifoto ya interineti

Urukundo rwigaragaza ku buryo bunyuranye. Mu muhamagaro wo gushinga urugo, twibanda ku rukundo ruhuza umuhungu n’umukobwa. Urukundo ruduhuza n’abandi ni narwo rudukururira kuri umwe kugira ngo tugirane umubano wihariye, utambutse kure uwo tugirana n’abandi benshi. Ni byo koko, umuhungu ahitamo umukobwa mu bandi benshi n’umukobwa agahitamo umusore umunyuze mu mbaga y’abamunyura imbere bose, nuko bombi bakamenyana byimbitse kugeza ubwo beguriranye amabanga yabo mu ntumbero yo kwizerana no gusangira umunezero. Urukundo ni ijambo rivugwa kenshi kandi na benshi; ibyo bitgaturuka ku kamaro karyo mu mibereho ya muntu kuko iyo rubuze mu buzima usanga nyakurubura yihebye, yigunze, ameze nk’uwamugaye mu mutwe. Akumva kubaho ntacyo bikimumariye maze ubwo agatangira kuvuma umunsi yavutseho no gutonganya Imana ayibaza impamvu yemera ko agerwaho n’iyo mimerere yo kubura urukundo. Hari abarubuze barangwa no guhorana amaganya ndetse no kwanga ubuzima kubera kubona abandi nk’ababateye ikibazo aho kubabona nk’abakenerana. Mu buzima, abantu ni magirirane! 

N’ubwo hari abazi ko barubuze, hari n’abarubuze, batazi iryo shyano bagushize ahubwo bahorana ituze ku mutima ridafite aho rishingiye. Biroha mu cyaha kibazanira ingorane nyinshi zirimo n’urupfu ngo bararyoherwa n’urukundo. Urukundo rutanga ubuzima bwimura urupfu. Hari n’abarufite rwose, bagashimishwa no kurubungabunga no kurukwirakwiza mu batarugira n’abibeshya ko baruronseho ubutoni bityo umuntu akagenda arushaho kuba mwiza ari byo kunogera Imana n’abantu. Kubungabunga urukundo no kurukwirakwiza ni ugukiza isi. Urukundo twarwita ibyiyumvo biza mu muntu iyo atekereje, abonye ikintu, umuntu cyangwa inyamaswa bikamutera kwishima no kwifuza guhorana n’ibyo ahisemo. Ibyo byiyumvo ni byo bihuza umuhungu n’umukobwa, bikabakururira mu kumenyana byimbitse, batakwitonda bikaba byabaviramo kurengera, bakambarirana ubusa kuko icyari urukundo gishobora kurangira cyiswe irari rishingiye ku guhaza ibyifuzo by’umubiri. Iyo bitonze kandi bagashimana koko ibyo byiyumvo bibinjiza neza kandi bakagumana na byo mu muhamagaro wo gushinga urugo. 

Mu mibereho, abahungu n’abakobwa bahura n’icyifuzo, bumwe gishingiye ku matsiko, cyo kwifuza kuryamana. Muri iki gihe amahano yagwiriye, hari abo icyo cyifuzo cyerekeza ku bo bahuje imiterere y’umubiri; umusore ku wundi n’umukobwa kuri mugenzi we bityo bakarwanya ugushyingirwa gutagatifu kwaremwe n’Imana, bimika amabi nk’ay i Sodoma n’i Gomora. Nta muntu wari ukwiye kugengwa n’icyo cyifuzo ahubwo ni ngombwa kukiyobora mu nzira itunganye (la sublimation), kumenya kwigenga (la maitrise de soi) wubahisha umubiri umugenzo mwiza wo kwifata n’ubudahemuka. Mu gucubya icyifuzo cy’irari, umuntu yakagombye guhindura ibyo yatekerezaga, kureka kureba, gusoma, kumva cyangwa gukora ibyo birimuzamuramo, agashaka ibimuhuza bituma yibagirwa ibyo bintu. Kwimara irari by’umukristu ntibikarangwemo kwagazanya (caresses), kwikinisha (mastrubation) no kwambarirana ubusa; ibi byose n’ibindi namwe muzi ni byo byica ubushobozi bwo kwigenzura bw’ubwonko, bigatera umuntu kuba inganzwa imbere y’irari nuko bigatiza umurindi amibi menshi y’amoko anyuranye. Ntibikabe!

Mutagatifu Rikardo (Richard), Umwepiskopi

Rikardo w’i Richester yavukiye mu gihugu cy’Ubwongereza mu 1198. Ababyeyi be bari bafite imirimo ikomeye i bwami kandi bari bakize cyane.  Rikardo amaze gukura, ababyeyi be bashatse kumushyingira umukobwa ufite ababyeyi bakize cyane. Nyamara we arabyanga, ahitamo kwiga. Nyuma ababyeyi ba Rikardo baje gukena, baratindahara, ku buryo, nyuma y’urupfu rw’abo babyeyi, umuhungu mukuru muri uwo muryango yafashwe bugwate, amara igihe kirekire mu buroko kugira ngo abe indishyi y’amadeni y’ababyeyi be. Murumuna we Rikarido yakoze cyane kugira ngo afunguze mukuru we. Ayo madeni yatumye na we akena cyane, biba ngombwa ko ajya kwaka akazi ko kuragira amatungo mu bikingi by’aborozi. Nyuma yaho yaje gushobora gusubukura amasomo ye muri kaminuza ya Ogisifodi (Oxford), aza no kujya i Parisi mu Bufaransa gukomeza amashuri.

Muri uibwo bukene, Rikardo yabaye inshuti z’abandi basore babiri bakennye nka we. Bari bafite umwambaro umwe gusa basimburanwagaho mu kwambara, ku buryo byabasabaga ko basimburanwa kujya mu ishuri, kuko uwo mwambaro wambarwaga n’ugezweho kujya mu ishuri abandi bagasigara mu icumbi. Batungwaga n’umugati na divayi, bakarya akanyama cyangwa agafi ku cyumweru gusa. Nubwo bari babayeho batyo, Rikardo yavuze ko ubwo buzima bwamubereye bwiza kubera ko yari yari atwawe n’amasomo yigaga. Nyuma yaho, Rikardo yagiye kuminuriza amasomo ye i Bolonye mu Butaliyani kugira ngo abone impamyabumenyi z’ikirenga. Yize iby’amategeko, yibanda cyane mu kwiga iby’amategeko agenga Kiliziya. Igihe asubiye mu Bwongereza, yahawe kwigisha muri kaminuza ya Ogusifodi kandi abanyeshuri be bakamukundira ubuhanga bwe. Hashize imyaka mike, abantu benshi batangiye kumukundira ubwiyoroshye, ubumanzi, ugucisha make bye n’ukuntu yakundaga gusenga. Kubera iyo mpamvu yatorewe kuyobora iyo kaminuza.

Nyuma yaho mutagatifu Edimundi wari umwepiskopi wa Kantoruburi amugira umunyamabanga w’iyo Arikidiyosezi mu w’1234. N’igihe uwo mwepiskopi ahunze mu w’1240, Rikarido yamuherekeje muri ubwo buhungiro. Yaherewe ubupadiri ahitwa Oruleya (Orléans) mu Bufaransa. Yaje gutorerwa kuba umwepiskopi wa Cicesteri (Chichester) mu Bwongereza, ariko umwami Heneriko wa III yanga ko bamuhera ubwepiskopi mu Bwongereza, nuko ajya i Roma, Papa Inosenti wa IV aba ari we umuha ubwepiskopi. Amaze kuba umwepiskopi, yaje kutumvikana n’umwami Heneriko wa III utarumvikanaga na Papa. Ariko Rikardo yaje kumvikana n’umwami abifashijwemo n’isengesho n’ibiganiro by’ubwiyunge. Amaze kubohoka ibyo byamubuzaga gukora neza umurimo wa gishumba, yaje kurangwa ahanini no kwita ku baciye bugufi no kugirira impuhwe abakene. Kubera ko bamubwiraga ko ibyo atanga biruta ibyinjiye yarabasubije ati: « biraruta umuntu agurishije ifarasi ye n’amasahani ariraho aho kugira ngo areke abakene bababare kandi ari ingingo za Kristu. » Umunsi umwe yigeze guha abakene umugati, imigati iratubuka kugeza ubwo ihagije abakene ibihumbi bitatu, ndetse irasaguka ku buryo n’abandi ijana baje kuza nyuma yaho yabonye imigati ibahagije. 

Yihatiye gufasha abasaseridoti be kugira ngo barusheho kugira imibereho myiza n’imyifatire iboneye. Kandi icyo gitangaza cyo gutubura imigati yajyaga agikora kenshi. Yapfiriye i Duvre (Douvre) aho yari yagiye guha umugisha ibitaro. Amaze guha umugisha ibitaro, apfa mu gitondo cy’umunsi ukurikiyeho, ku itariki 3 Mata 1253. Yapfuye asoma umusaraba kandi yiyambaza Bikira Mariya we utsinda abanzi b’umukiro wa muntu. Kiliziya ihimbaza mutagatifu Rikardo kuwa 3 Mata buri mwaka.

MUTAGATIFU VALERI (WELARISI), UMUKURU W’ABAMONAKI

Mutagatifu Valeri wiswe Welarisi mu kinyarwanda bakurikije uburyo yitwa mu kilatini no mu rurimi rwe kavukire ‘Walaricus’, mu gifaransa yitwa Valéry (soma ‘Valeri’). Yavukiye mu Bufaransa mu mwaka wa 550. Akiri muto cyane, yatangiye kwerekana ko akunda iby’Imana kuko yakundaga gusenga no gusoma inyandiko ntagatifu. Yaragiraga amatungo ya se ariko akifuza cyane kwiga, nuko ababyeyi be bamushakira umunyabwenge wo mu muryango ukomeye wari hafi aho ngo amwigishe gusoma no kwandika. Yamenye vuba gusoma, na zaburi ntagatifu azifata mu mutwe vuba. Igihe yabaga aragiye, amatungo arisha, na we agasenga kandi kenshi yacyura, akayanyuza imbere ya kiliziya ngo abone uko asura Isakaramentu Ritagatifu. Aho bigeze, Valeri yibuka ko Yezu yavuze ati: “ukunda ababyeyi kurusha uko ankunda ntakwiye kwitwa umwigishwa wanjye.” Nuko abasiga aho, ajya kwiha Imana. Yari afite nyirarume wari waragiye kwiha Imana mu bamonaki ba mutagatifu Antoni bari hafi aho. Nuko amusangayo, baramwakira. 

Nyuma yaje gusanga amategeko y’icyo kigo yoroheje, ahitamo kujya mu kindi cya Oguseri (Auxerre) cyafashwaga n’umwepiskopi, mutagatifu Onere (saint Aunaire). Icyo kigo cyari ishami ry’ikigo cya mutagatifu Jerimani cyari cyizwiho kugira amategeko akomeye. Muri icyo kigo Welarisi yatangiye kuvugwaho ko ari umutagatifu, bimutera impungenge nyinshi, nuko na cyo akivamo ajya mu kindi cy’ahitwa Lukuseyi (Luxeuil) kugira ngo abe umwigishwa wa mutagatifu Kolombani. Aho na ho ntibatinze kubona ubutagatifu bwa Welarisi. Bidatinze kandi, umwamikazi Brineho (Brunehaut) n’umwami Tiyeri (Thierry) batangira gutoteza mutagatifu Kolombani. Yaje guhungira mu Butaliyani, maze igihe atari ahari, Welarisi aba ari we usigarana ubuyobozi bw’ikigo, kandi abasha kubuza umwamikazi n’umwami kwigarurira imitungo y’ikigo. Abanditsi benshi baje kwandika ko mutagatifu Welarisi yaje kubonekera umwami witwaga Hugo kape, amusezeranya ko abamukomokaho bazategeka ubwami bw’abafranki kugeza ku gisekuruza cya karindwi. Ni nabyo bakunze kwerekana ku mashusho agaragaza mutagatifu Welarisi.

Welarisi yari azi kwigisha koko inyigisho nk’abantu b’Imana nyabo. Inyigisho ze zitumye abakirisitu benshi baba abamonaki. Igihe kimwe umuntu w’imfura ikomeye kandi ikize, aza kumugisha inama. Welarisi aramwigisha maze uwo mugabo ntiyasubira iwe ndetse, aherako yinjira muri uwo muryango w’abo bamonaki. Welarisi yakundaga ubumanzi bwa gikirisitu kurusha uko yakundaga indi imigenzo y’ubukirisitu.

Umunsi umwe bari mu rugendo, hagwa imvura nyinshi cyane, bajya kugama ku mugabo batari bazi. Yanze guhita bagenzi be baramwinginga ngo barare aho. Nuko Welarisi aremera. Bidatinze ariko, abandi bagenzi bari baharaye batangira kuganira ibiteye isoni. Welarisi arabatonganya, ariko ntibamwitaho barikomereza. Welarisi abibonye, asohoka muri ya mvura n’abamonaki be, aragenda. Yari azi gukoresha igihe neza ku buryo butangaje. Welarisi yari umukozi cyane, yari yarategetse abamonaki be kwirega iteka n’umunota umwe baba bapfushije ubusa, avuga ati: “Ingabire z’Imana zose zikwiye kwitabwaho.” Yapfuye ku munsi yavuze ko azapfiraho, akikijwe n’abamonaki be. Hari mu mwaka wa 622. Twiyambaza mutagatifu Welarisi ku itariki ya 1 Mata.

Inshingano mu muhamagaro wo gushinga urugo

Muri uyu muhamagaro wo gushinga urugo, umuntu ahamagarirwa kubaho abana na mugenzi we ngo bafashe Imana kurema no kurera, bityo abana Imana ibahaye bagakura bunguka ubwenge, banogeye Imana n'abantu. Koko rero abana barezwe neza kandi b’abakristu barangwa n’imyitwarire myiza; bamera nk’igiti cyiza cyeraho imbuto nziza (Lk 6,43-45).  Amategeko ya Kiliziya (le droit canonique) na Tewolojiya gatolika, bihamya ko ubukungahare bw’isakaramentu ry’ugushyingirwa bushingira ku bintu bitatu by’ingenzi ari byo; Kwibaruka no kurera abana (procréation et éducation des enfants), Ubudahemuka n’ubumwe bwo gushyingirwa (fidélité conjugale et l’unité du mariage) n’Ukudatana mu rukundo ruhuza abashyingiranywe (indissolubilité du lien matrimonial). Abashinze urugo bagomba kunga ubumwe, bakakira ingorane bahura na zo mu rukundo bakundana n'urwo bakunda Kristu na Kiliziya ye. 

Gushinga urugo rwa Gikristu bijyana no gukundana hagati y'umugabo n'umugore bituruka ku kuzirikana urukundo Kristu akunda Kiliziya no kuzirikana ku dusongero tw’ isakaramentu ryo gushyingirwa; agasongero ka mbere ni ukubyara no kurera, aka kabiri kakaba gufashanya n’umuti uvura irari (la procréation et l’éducation des enfants; l’aide mutuelle et le remède à la concupiscence). Isakaramentu ry'ugushyingirwa rihabwa abashinga urugo rwa gikristu ni ipfundo rihuza kandi rigakomeza ubuzima bw'abasezeranye ubwabo ndetse n'abo bazibaruka, niyo mpamvu rifite agaciro gakomeye mu muryango w'Imana kuko rituma havuka kiliziya nto- umuryango- isoko y'uburere bwiza bw'abagize kiliziya y'ejo n'ahantu Ingabire z'Imana zisanzurira. Abifuza kugera ku butagatifu banyuze muri iyi nzira yo gushinga urugo bahuzwa n'urukundo rutuma umwe yemera kuva iwabo no guhara byose agasanga uwo yishimira kandi yihitiyemo. Ni urukundo rwakira umuntu, rugaharanira kumwerekeza mu rumuri rwa Kristu, rukamuvana mu mwijima w'urupfu rw'iteka rukamugeza ku isoko idakama y'imbabazi no ku nyanja ngari y'impuhwe z'Imana, Yo soko y'ubuzima n'ubukungu budashira. Twongere dutekereze ku rukundo ruhuza umusore n’inkumi, rukabanyuza mu isakaramentu ryo gushyingirwa, rukabageza ku Mana. 

Imana niyo itanga urubyaro, kandi yanabikora no kubarubuze 

Abakristu twemera ko Imana ariyo soko y’isakaramentu ryo gushyingirwa; ni byo rwose!  Yaremeye Adamu umufasha umukwiye Eva kuko bitari byiza ko Muntu aba wenyine. Yabigenje ityo kandi ibaha umugisha ngo bororoke bagwire mu isi yose (Intg.1,27-28;2,18-23). Mu gushyingirwa, umuryango mushya uba utegereje n’ubwuzu bwinshi kwakira no kurera imbuto y’urukundo rwabahuje kandi rukibahuza ku mutima no ku mubiri. Impano y’Imana ku muryango ni umwana bazabyara. Ibyo ni byiza ariko bigomba gukoranwa ukwemera, kwihangana, isengesho n’urukundo bizira uburyarya kugira ngo badatera umugongo umugambi n’ububasha Imana ibafiteho igihe bitabagendekeye uko babyifuza ahubwo bagakomera ku isezerano - haba mu byiza ndetse no mu byago - ry’ubudahemuka n’urukundo basezeranye. Abashyingiwe nibakomere ku Mana, bazirikana mu kwemera no kwihangana ibyo yakoreye abayoboke bayo bayitakambiye.

1. Umubyeyi Sara yahawe umwana ageze mu zabukuru; ashobozwa gutwita, kubyara no konsa ikinege Izaki (Intg.17.15-21; 18.1,15; 21,1-3).
2. Umubyeyi Rebeka wari ingumba, Imana yamuhaye kubyara impanga ebyiri ari zo Ezawu na Yakobo nyuma yo kwambaza k’umugabo we Izaki (Intg.25,21-23).
3. Umubyeyi Rasheli yari arembeje umugabo we Yakobo ngo abyarirwe ku bibero, nuko Imana iramwiyereka. Mu gihe gikwiye cy’izabukuru imuha umwana Yozefu (Intg.29,31-35;30,1-23).
4. Umubyeyi Ana, umugore wa Elikana, Imana yumvise isengesho rye n’iry’umutambyi Heli nuko imukiza agasuzuguro imuha umwana Samweli (1 Sam.1,1-3).
5. Umugore wa Manowa na we yari ingumba, Imana yamukoresheje mu kuvana Israheli mu biganza by’abafilisitiya ubwo yamuhaga kubyara Samusoni (Abac.13,1-25).
6. Umubyeyi Elizabethi yasamiye mu zabukuru ikinege Yohani Mubatiza wabaye integuza y’Umucunguzi wacu Yezu Kristu bityo urugo rwa Zakariya rutangira guhanura rubwirijwe na Roho Mutagatifu (Lk.1,36.57-79).
7. Umwari Mariya wari warasabwe n ‘umubaji Yozefu, ku bubasha bwa Roho Mutagatifu yasamye inda, abyara Umwana w’Imana Yezu Kristu (Mt.1,18-25). Koko nta kinanira Imana (Lk.1,37)!

Izi ngero zidufashe, mu muhamagaro turimo, kuzirikana no gukomera ku magambo dukesha Mtg. Filomena: “Koko uwiringiye Imana agera kubyo we yabonaga ko bidashoboka, kabone n’iyo yaterwa ubwoba ate, ntiyigera acika intege na busa.” Gukunda ni ukwifuriza icyiza, ukabikorana ubwiyoroshye n’ubugwaneza biherekejwe no gutinya Imana. Uwo ukunda umuyobora mu nzira igeza ku Mana; ukamucyaha umwereka ibikwiye n’ibidakwiye kandi ukamukomeza kugira ngo atavaho acika intege mu rugendo rumusaba umuhate rwo kugana Imana hanyuma satani akaboneraho kumuyobya. Gukunda umuntu ni ukumwishimira, ukamwakira uko ameze kose, ukamubonamo ishusho y’Imana n’ingoro ya Roho Mutagatifu byo bikwiye guhora byera bityo ukamubera umufasha w’indahemuka mu kwitagatifuza. Ibi ni byo bigeza ku kubatwa n’urukundo kandi uwageze aha aba ari ku rugero rwo guhara ubuzima bwe kubera umukunzi we nk’uko Yezu Kristu yemeye kuducungura (1Yh.3,16). Tumenye twese ko gukunda bivuga gukiza, kujya inama zubaka mu nzira iboneye; ibi igashobokera kandi bikazanira umunezero abafite urukundo rutunganye, rurambye, rutari urugurano kandi rutagengwa n’irari (Sir.17,6-10;23,17; Ind.8,7-10). 

Gukunda ni ukuzuza amategeko no kwifuriza umuntu icyiza (Rom.13,8-10; 2Yh.6). Icyiza si icyo nkunda, icyo nifuriza mugenzi wanjye nanjye ubwanjye. Ntabwo ari ikinshimisha kimwe n’uko ikibi atari icyo nanga cyangwa ikimbabaza gusa. Icyiza ni icyubahisha Muntu kandi ntikibusanye n’ugushaka kw’Imana dusanga mu Byanditswe bitagatifu. Igihuje n’umugambi w’Imana wo gukiza abantu, ikitarwanya ibikorwa by’urumuri ni cyo umuntu wese wo mu mahanga yose n’ibihe byose akwiriye kwita icyiza kandi agaharanira kugikora no kugikorera abandi. Urukundo kandi ruzanira ibyishimo n’amahoro ababibuze. Umuntu ukunda abandi ntaharanire ko bahorana umunezero n’amahoro, ntafate iyambere mu kubereka inzira y’ibyo no kuyibayoboramo, ntiyifatanye na bo mu byago no mu gahinda, uwo aba yibeshya, abeshya rubanda kandi anoshya abo abeshya ko abakunda. Ukunda by’ukuri aharanira ko uwo akunda atahura n’ikibi aho kiva kikagera bityo akamugobotora mu nzara z’ibihigiye kumuvutsa ihirwe n’ubuzima. Abakundana bashakirana umukiro Imana itanga; ibyo bakabikora bakosorana, bagirana inama kandi bababarirana mu ntege nke zabo. Ngibyo ibishobora guhuza abavandimwe babiri, bikaberekeza mu kubana kw’abashakanye. Urukundo ni intangiriro n’inkingi ya mwamba mu gushinga urugo no kurema umuryango muzima. 

Inyandiko zifashishijwe:

 1.     xxx, « bana, nimwitoze kuba abakristu beza. », ubutumwa bugenewe umunsi mpuzamahanga w’iyogezabutumwa ry’abana, ku wa 15 gashyantare 2015

2.     Abbé jacob yoda, chancelier diocésain, le mariage dans le code de droit canonique de 1983

Ibyonnyi tugomba kwamurura

Inyoni ni kimwe mu byonnyi by'imbuto
(ifota ya Jardinet)

Muri buri muhamagaro uwurimo ahura n'ibyiza ndetse n'ibibi bihangarije kumuvutsa iherezo ry'umuhamagaro arimo; nta muhamagaro utagira umusaraba! Yezu dukurikira si Yezu w'ibitangaza gusa: dukurikira Uwatsinze urupfu, akazuka kandi uwatsinze aba yabanje guhangana n'uwazutse aba yabanje kubabazwa n'urupfu; nibyo koko hazuka uwapfuye kandi hishima uwabanje kubabara. Abantu bari bakwiye kuzirikana ko ikamba ry'amahwa Yezu yambaye ryamugejeje ku ikamba ry'umutsindo; iyo niyo nzira natwe abamukurikira tugomba kunyura twunze ubumwe na We na Roho Mutagatifu kugira ngo turonke ibyiza twateganirijwe kuva isi yaremwa. Ni mucyo turebere hamwe, mu muhamagaro wo gushinga urugo, ibyonnyi tugomba kwamurura. 

Kutemera impinduka 

Hari ubwo umuntu yirengagiza ko yahinduye uburyo bwo kubaho mu gihe yahabwaga isakaramentu ryo gushyingirwa, ibyo bigatuma akomeza kubaho gisore kandi yubatse. Ntibikwiriye ko umuntu agumana imwe mu mico n’ingeso yari afite atarashinga urugo; ni ngombwa guhinduka ukagenza bihuje n’igihe ugezemo, ibya gisore ukabyiyambura kugira ngo ushobore kwirundurira muri uwo muhamagaro winjiyemo. Birababaje kubona umugabo udashaka kumva aho bavuga ko afite umugore cyangwa abana. Biteye agahinda kubona umugore utishimira kumva bamwita “mukanaka” kandi ni n’agahomamunwa kubona uwashyingiwe agikururukana n’abo mu rungano rwe batarinjira muri uwo muhamagaro wo gushinga urugo rwa gikristu. 

Rubyiruko nimukomeze kuzirikana ko buri cyiciro cy’ubuzima ugezemo kigira imyifatire igikwiriye bityo muharanire gusanisha ubuzima bwanyu n’ikigero murimo, murangamiye Kristu Rumuri rw’amahanga. Nimwishimire gutera intambwe nzima kandi mugumane ku mutima ihame ry’uko gutera intambwe bijyana no guhinduka. Ukwemera kwacu kudutoze guhinduka no kwemera impinduka Nyagasani adusaba abinyujije mu masengesho asanzwe, mu isengesho ryo gushengerera ndetse no mu Ijambo ry’Imana no mu zindi nyandiko zitwereka icyiza kandi zikakitwerekezamo. Eraga, “Ibyanditswe Bitagatifu bituyobora ku Mana, bikanadufungurira inzira yo kumenya Imana” (S. Jean Chrysostome. Homélies sur l’Évangile de Jean, 59: 3). Murahunge ibyo byose byabononera roho, bigatuma mutumva neza icyo uwo muhamagaro uvuze mu buzima bwanyu; nimukomeze kuzirikana ko mugomba kurangwa n’urukundo iteka. Koko rero umuhamagaro wa gikristu ni cyane cyane urukundo rw’Imana rureshya kandi rutuma umuntu yikingurira abandi ntiyihugireho, ahubwo agatangira « urugendo ruhoraho ruva ku bwikunde rugana mu kubohoka yitangira abandi, ibyo bigatuma yimenya, by’akarusho akamenya Imana (Benedigito wa XVI, Lett. Enc. Deus caritas est, n.16) ».” (Papa Fransisko, Ubutumwa Nyirubutungane yageneye umunsi mpuzamahanga wa 52 wo gusabira ihamagarwa ry’abiyeguririmana). 

Umutima utanyurwa no guhubuka 

Hari urubyiruko usanga rujarajara mu rukundo. Umusore agasimburanya abakobwa mu cyitwa urukundo nk’uhindura imyenda, n’umukobwa agakunda abasore adashobye gufata mu mutwe. Ibyo si byiza. Gukunda ni uguhitamo kandi guhitamo ni ukuzinukwa; birakwiye kubanza gushishoza mbere yo gufata umwanzuro wo gutangira urugendo rw’urukundo rwihariye n’uwo ufiteho umugambi wo kuzambika impeta. Umuntu ukunda guhubuka ntatana no kwicuza, akenshi bijyana no kwivuguruza, nyamara abantu bagomba kumenya kandi bagahoza ku mutima ko uwinjiye mu muhamagaro wo gushinga urugo akivuguruza, aba abusanya n’ugushaka kw’Imana. Umutima utanyurwa no guhubagurika nta kindi byazanira Muntu kitari ugutendeka no kwiroha mu busambanyi no gutandukana n’uwo yahisemo, tutibagiwe no kunanirwa kwitegeka – la maitrise de soi- bityo ugasanga umuntu yahinduye umutima we icumbi ry’irari n’andi mabi menshi amwegereza umuryango w’ikuzimu, ari ko amuhindura inshuti y’akadasohoka ya Nyakibi. 

Hari ubwo umuntu ahura n’ibibazo akihutira gufata umwanzuro yibwira ko abikemura, bitihise agasanga yarabyongeraga. Twavuga nk’abagira ikibazo mu rukundo bakihutira gutandukana n’abakunzi babo. Yaba abashatse cyangwa abakirambagiza, bakihutira kwishumbusha bagambiriye kwereka abo batandukanye ko bihimirije ubusa; bene aba, akenshi barabihirwa kuko baba batekereje nabi mu kwinjira muri uyu muhamagaro wo gushinga urugo. Kandi uko guhubuka kwabo nta kabuza kubongerera gushavura aho kubazanira umunezero. 

Abakiri bato by’umwihariko, nibarushaho kuzirikana ku byiza by’uyu muhamagaro n’ingorane uwawuhisemo, ahubutse cyangwa yiteguye bihagije, ashobora guhura na zo hanyuma bashakire ibisubizo mu Ijambo ry’Imana duhamagarirwa gukunda no gukundisha abandi. Mu bindi byonnyi twavuga nko gukoresha nabi ikoranabuhanga, kwikubira umutungo k’umwe mu bashakanye, kurutisha ibintu umuntu, kwiroha mu biyobyabwenge n’ibindi byinshi namwe mubona aho mutuye, aho mukorera n’ibyo mwumva mu bitangazamakuru. Ibi byonnyi biteza ibibazo bitandukanye birimo kwiheba no guheranwa n’agahinda ndetse no kwicana. Tuzirikane inyikirizo y’indirimbo ‘Murashishoze’; “Murashishoze igishimisha Imana Nyagasani, Umubyeyi udukunda aganje i Jabiro, Ibikorwa yiremeye bimukomere mu mashyi, Ni Umusumbabyose akwiye kuratwa.” 

Kutinubira ibyago no kwemera ibigeragezo 

Ese iyo uhuye n’ibigeragezo mu muhamagaro wo gushing urugo ubyifatamo ute? Mtg. Simewoni ati “Umwana arira igihe nyina amukarabya n’umuntu w’ukwemera guke yijujutira Imana igihe ari mu byago bisukura roho ye nk’uko amazi asukura isura ye.” (S. Syméon de Daïbabé; Paroles, 89). Ibyago byakagombye kubera umukristu umwanya wo guhamya ukwemera. Agahamya ko Yezu yemeye aba hose, agakorera hose kandi ko yatsinze byose. Ni umwanya wo kurushaho kuzirikana ku bubabare bw’Umwami wacu, we wababaye cyane kandi no muri ubwo bubabare akagira impuhwe asabira abishi be kubabarirwa (Lk.2.3.34). Ibigeragerezo biberaho kutuyungurura maze tukaba abagaragaza ubukristu bwacu mu bikorwa no mu magambo. No mu bigeragezo, Nimumenye ko Imana iba itabatereranye ahubwo ari ukugira ngo imenye ikiri ku mitima yamyu (2Matek, 32,31). Ibigeragezo bitubera uburyo bwiza bwo kwereka Nyagasani ko turi intore ze (Sir,2,5) zitagengwa n’ubwoba ahubwo zitinya Imana. Kandi “umuntu utinya Imana atsinda ubundi bwoba bwose, uwoba bw’iyi si araburenga kandi ntiyigera ahinda umushyitsi” (S. Ephrem le Syrien. Sur la crainte de Dieu et du jugement dernier). 

Mu bigeragezo duhura na byo, Imana idusaba gukurikiza Amategeko uko yakabaye, kuyisenga no kuyishimira, kudahinyura Ibyahanuwe, kugenzura, kwirinda ikibi no kutazimya Roho w’Imana twahawe (1 Tes.5,16-22), kandi n’uwiyemeje gukorera Uhoraho agomba gutegura umutima we kwakira ibigeragezo. Duharanire kuba intwari mu bikorwa aho kuba intwari ku rurimi gusa (Sir.2.1.4;4,29).  Ibigeragezo si umwanya ukwiye wo kwihimura kubo twahisemo, kubatererana no kubagaragariza urwango mu gihe twabasezeranije urukundo ruhoraho.

Ibyago twakagombye ku byemera bikatubera icyiru cy’ibyaha nk’uko tubiririmba; ‘nimbona amakuba munsi, umpe kuyemera rwose, abe icyiru cy’ibyaha (Mubyeyi ugira ibambe, H2.).’ Dusabirane rero kugirango Yezu wababaye adutoze gushishoza no guheka umusaraba nka We. “Ntibishoboka kwegera Imana utanyuze mu bigeragezo, aho bitari imigenzo myiza ya muntu ntiramba... Niba wifuza imigenzo myiza, ntukihunze ibigeragezo kuko buri kigeragezo gitera kwicisha bugufi. Irembo ry’ubwirasi rifungukira ubaho mu migenzo myiza izira ibigeragezo,” (S. Isaac le Syrien; Discours 34). Nimumara gusobanukirwa n’ibyonnyi biri mu rugendo rwanyu, mwihutire ku byamurura kugira ngo bitababuza kugera iyo mujya!

Mutagatifu Izaki, Uwihayimana

Ifoto ya interineti

Mu gitabo cyitwa « Nouvelles Fleurs des vies des saints et fêtes de l’année », Tome I, cyanditswe n’umupadiri w’Umuyezuwiti witwa R.P. RIBADENEIRA, cyandikiwe mu mujyi wa Lyon mu Bufaransa, kikaba cyarasohotse kuri 15 Nzeri, 1786, ku rupapuro rwa 338, uyu mupadiri w’umuyezuwiti atangira agira ati : iyo ubutabera bw’ Imana burakariye abanyabyaha, kenshi na kenshi ijya yifashisha abami n’ibikomangoma kugira ngo ihane abantu b’ibyigomeke n’abantu b’abahemu kandi b’intashima. Iyo Imana imaze gukoresha ikiganza cyabo ngo hubahirizwe amategeko yayo, ihana aba bami kuko akenshi bitwaza ubutegetsi bwabo bagakabya mu gukoresha inkota no kugaragaza ubugome kugira ngo berekane ko batinyitse. Ubundi bakiyorobeka kugira ngo abaturage babo babakunde bakeka ko bagwa neza. Ibi byagaragaye ku mwami w’abami wa Roma Valensi wari warayobeye mu gatsiko k’abakirisitu bari barayobotse umuyobe Ariyusi.

Uyu Valensi yari yiyemeje gutoteza no kurimbura abakirisitu gatolika. Ariko mbere yo gushyira mu bikorwa uwo mugambi w’ubugome bwe, Imana yashatse kumuburira, izana uwihayimana witwaga IZAKI avuye mu gice cy’ubwami bwa Roma y’ Iburasirazuba, Imana imutuma kuburira Valensi ibyago bimutegereje natareka ubwo bugome ngo ahubwo ahindukire akurikire Inzira y’ukuri y’Ivanjili. Aho Izaki yari yibereye wenyine mu kigo cy’abihayimana, yahoraga arira kubera ibyaha by’abantu, ndetse n’ibyago bibategereje, agahora yinginga Imana nyirubuntu ngo igirire ubuntu Kiliziya yayo, ihagarike uriya mwami Valensi wari umeze nk’intare yarakariye kurimbura abakirisitu gatolika.

Igihe rero umwami yari ayoboye igitero cy’ingabo zikomeye zari zigiye kurwanya abanyamusozi (barbares) bari biyemeje gutera umujyi wa Konstantinopule, Izaki yaraje abwira umwami ati, “umva rero mwami, nukingura kiliziya abagatolika basengeramo, ukaba wari warazikinze, Imana izagushyigikira mu migambi yawe yose. Uzatsinda urugamba ugiyemo kandi uzasubira mu rugo rwawe amahoro”. Umwami Valensi yakomeje kumva ayo magambo ya Izaki arayumvira, atuma ku batware bamuyoboreraga ngo bubahirize amabwiriza yahawe aturutse ku Mana, ariko bo baramushuka, bamubwira ko Izaki yataye umutwe, dore ko abo batware bose bari barayobeye mu idini rishya ryabayobe bakurikiye Ariyusi, ahubwo bagashuka umwami ngo ahane Izaki.

Izaki ntiyarambiwe. Hashize iminsi mike asubira kureba Valensi wari ukiri mu nzira ayoboye ingabo, agira ubutwari bwo guhagarika ifarasi y’umwami, amusaba akomeje kubahiriza ibyo yamusabye niba ashaka gutsinda. Ahantu bari bageze hari imanga ifte n’ibihuru by’amahwa, nuko umwami ajugunya Izaki muri ibyo bihuru agira ngo apfiremo, yikomereza urugendo. Ariko haza abagabo batatu Izaki atazi aho baturutse, maze bamuvana muri iyo manga, bamaze kumuvanamo barazimira, nuko abona ko ari abamalayika bamutabaye. Izaki yarirutse anyura mu yindi nzira atanga umwami muri iyo nzira.

Abwira umwami ku nshuro ya gatatu ati: “wanjugunye mu bihuru by’amahwa uzi ko nza gupfiramo ariko Imana yantabaye, none inyohereje kukubwira ngo ufungure Kiliziya z’abakirisitu gatolika wafunze. Umenye ko Imana ariyo yohereje ziriya ngabo z’abanyamusozi ngo ziguteze intambara kubera intambara watangije yo kurwanya abagatolika. Nufungura za kiliziya, uzatsinda urugamba.” Amagambo ya Izaki yasanze n’ubusanzwe umutima wa Valensi wanangiye. Umwami rero yumvise Izaki amusuzuguye, amugabiza abasenateri babiri, Vigitori na Saturunino ngo bamurinde kugeza igihe azagarukira, maze amurebere igihano kimukwiriye. Nuko Izaki abwira umwami ati: “nugaruka amahoro ubwo uzamenya ko Imana itantumye. Uzatangiza urugamba ariko ntuzashobora guhangana n’abanzi. Uzabahunga, maze bagufate bagutwike uri muzima.”

Nk’uko Izaki yabivuze rero, Valensi yatangije urugamba, ingabo ze ziratsindwa, arahunga, yihisha mu muyoboro w’imyotsi yo mu gikoni (cheminée), ingabo z’abanzi zibibonye, zicana umuriro mu ziko, Valensi ahira muri uwo muyoboro. N’igihugu cye ingabo z’abanzi ziragitwika. Nguko uko ubwami bwa Valensi bwarangiye. Icyo gihe Izaki yari yarafungiwe mu buroko. Ba basenateri bamufunze, Saturunini na Vigitori, buri wese yubakira Izaki inzu ngo ayibemo kuko babonye ari intungane. Bashakaga kumugira inshuti yabo, buri wese ku giti cye. Cyakora Saturunino ayubaka vuba, maze Izaki ayibamo kugeza igihe apfiriye. Iyo nzu ntiyayibayemo wenyine, yazanyemo n’abandi bamonaki bayibanamo. Akomeza kugira neza. Ndetse n’impano zinyuranye yahabwaga n’abasenateri yazigabanaga n’abakene, kugeza n’ubwo imyambaro ye ayitanze.

Igihe cyo kwitaba Imana cyegereje, yakoranyije abamonaki bagenzi be, abashishikariza kubaha Imana, gukomera ku migenzo myiza, abatoramo uzababera mukuru, abasaba kuzamwumvira, asaba Imana guha uwo mukuru ubushishozi bwo kubayobora. Yitabye Imana ku itariki 27 Werurwe. Hari mu gisekuruza cya kane. Uwitwa Metafraze ni we wa mbere wanditse iby’ubuzima bwa Izaki, Uwitwa Suriyusi abusubiramo mu gitabo cye cya II. Karidinali Baroniyusi, mu mwaka wa 378 na we yabyanditse mu gitabo yise “les Annales”. Twizihiza mutagatifu Izaki, uwihayimana, ku itariki 27 Werurwe. (Aya mateka yakusanyijwe na padiri Théophile TWAGIRAYEZU, umupadiri bwite wa Diyosezi ya Byumba).

Uko washyigikira itsinda ry’abazirikana ku muhamagaro

ifoto ya internet

Itsinda ry’abazirikana ku muhamagaro (Groupe Vocationnel) ni itsinda ribumbira hamwe urubyiruko gatolika, rwifuza gusobanukirwa byimbitse ibijyanye n'umuhamagaro, kuwurera no kuwurinda. Ni itsinda ryangombwa ku rubyiruko rikwiye gushyigikirwa n’abakristu bose ; abalayiki abasaseridoti n’abihayimana. Ese iryo tsinda rikwiye kwitabwaho rimaze iki ? Ni gute ryashyigikirwa ? 

Itsinda ry’abazirikana ku muhamagaro (Groupe Vocationnel) rimariye iki abarigana ? 

Abarigana n’abarisanzwemo, itsinda ry’abazirikana ku muhamagaro ribatera ibyishimo kuko ribafasha kumva no gutega amatwi ijwi ry'Imana binyuze mu Ijambo ryayo mu isengesho no mu bikorwa by’urukundo. Koko rero, gukora ibikorwa by’urukundo ni ukwitangira abandi nta gihembo cy’isi utegereje ahubwo ukabikora kubera ko ari itegeko ry’ukwemera, rimwe rya roho, ntubikore kubera ko ari itegeko wahawe na muntu cyangwa ngo ubikore utabishizeho umutima woroshya. Iyo ukoze igikorwa cy’urukundo nk’uko, bigirira akamaro uwagikorewe naho wowe ugataha warushijeho gucumura kuko ibyo wakoze uba utabibwirijwe na Roho w’Imana. Urigana rimufasha kurushaho kumva neza igisobanuro cy’umuhamagaro; akamaro kawo muri kiliziya no ku muntu ubwe, bityo akabasha guhitamo no kwemera ugushaka kw’Imana mu muzima bwe.  Uririmo afashwa kuva mu bwigunge binyuze mu gusabana ndetse no gusangizanya ubuzima bityo ufite ibibazo agahumurizwa, agafashwa uko itsinda rishobojwe, akagirwa inama z’uko yakira ibikomere afite kandi akanamenya uruhare rwe mu kubaka Kiliziya n’ubukristu buhamye. 

Abari muri iri tsinda baryungukiramo byinshi: Nta muntu uzamo ngo abure icyo aronka kimwegereza umukiro n’icyo asabira abandi kugira ngo bazagerane ku ntego basangiye. Abataribamo na bo bakwiye kubona ibyiza by’iryo tsinda, nk’abakuze, bakabona uko bashishikariza abakiri bato kurigana. “Muragenze nk’abana b’urumuri mubere urugero abandi, Muzakere gutsinda mwambariye gusenga, Muzatorwe mukunzwe mwitwa abaziranenge.” Aya magambo yo mu ndirimbo ‘murashishoze’ aragaraza icyo abandi batezeho ku bavokasoyoneli kugira ngo barusheho kumenya iby’itsinda ryabo, kurikunda, kurishyigikira no kuriyoboka.  Abavokasiyoneri bagombye kumvisha abalayiki bose icyo itsinda ryabo rivuze, abarijyamo n’intego zaryo. Ibi bigakorwa mu buryo bwose, cyane cyane mu kwera imbuto, zituma abakristu bahinduka, bakabera Kristu abahamya. 

Shyigikira itsinda ry’abazirikana ku muhamagaro (Groupe Vocationnel) 

Birakwiye ko abakristu bose basobanukirwa n’iri tsinda, bakamenya icyo rigamije muri kiliziya n’akamaro rifitiye urubyiruko. Ababyeyi b’abakristu bari bakwiye kohereza abana babo muri iri tsinda kandi bakabafasha kubona ibyo basabwa kugira ngo barusheho kuryitagatifurizamo. Ni ngombwa ko abasaseridoti n’abihayimana muri rusange barushaho guhoza ku mutima iri tsinda barishakira aho gukorera, imfashanyigisho, amahugurwa n’ibindi bikwiriye. Igihe abantu bose bazaba bemenye neza iri tsinda, nibwo bazajya barizirikana mu isengesho ryabo. 

Nuko bambaze bati: “Nyagasani Yezu, Wowe uhamagarira bose kugukurikira no kuba intungane nka Data wo mu ijuru; twiyemeje kugukurikira no kukwamamaza nk’uko twabisezeranye muri Batisimu. Tugutuye roho zacu n’ibyacu byose, tubere ikiramiro n’isoko y’iby’ishimo kugira ngo dushobore gutsinda ibisitaza biri mu rugendo rwo kukwiyegurira nk’uko ubishaka. Nyagasani, tugutuye itsinda ryacu ridufasha kuzirikana ku muhamagro; uririnde, uryiyoborere kandi urikomereshe Roho wawe. Niribe koko ishuri ridutegurira neza kukwiyegurira mu buryo wishimira n’irembo ry’umukiro tugomba guharanira kwinjira n’isoko y’umugisha ku baribamo, abarigenderera n’abarishyigikira bose. Twese hamwe abarigize, uduhe kunga ubumwe no gukunda Ijambo ry’Imana kugira ngo dushobore kumva ijwi ryawe no gusobanukirwa byimbitse icyo udushakaho, tumurikiwe na Roho wawe. Wowe ubaho ugategekana na Data mu busabane na Roho Mutagatifu, Amina!