Umuhire Misheli, umufasha wa Fawustina, intumwa y’impuhwe z’Imana

Misheli (Michał Sopoćko) yavutse kuwa 1 Ugushyingo 1888 mu gihugu cya Biélorussie. Ni we washinze umuryango w’Ababikira ba Yezu Nyir’impuhwe (sœurs de Jésus Miséricordieux, Z.S.J.M). Yahawe ubupadiri mu 1914 nyuma y’amasomo yari asoreje mu Iseminari ya Vilnius muri Lituanie, hanyuma mu 1926 ahabwa impamyabumenyi y’ikirenga muri tewolojiya (doctorat en théologie). Yabaye umwalimu muri kaminuza ya Vilnius kuva mu (1926 -1934).

Misheli Sopoko yamenyaniye na mama Fawustina mu muryango yarimo w’Ababikira ba Bikira Mariya Umwamikazi w’impuhwe (Sœurs de Notre-Dame de la Miséricorde). Mbere yo guhura, Fawustina yari yarahishuriwe ubigira kabiri kose, ko uwo musaseridoti azamufasha kwiyunga n’Imana (futur confesseur) no kwamaza impuhwe z’Imana. Aya mabonekerwa ya Fawustina yabereye i Varsovie n’i Cracovie. Yezu yabwiye Fawustina ko uwo mupadiri azamufasha kurangiza ugushaka kwe ku isi, kandi ko abereye Yezu, ibitekerezo bye bikaba bihuje n’ibya Yezu. Ko Yezu atazigera yemera ko uwo mupadiri yakwibeshya. Yasabye Fawustina kutazagira icyo akora atabimwemereye. « Il t’aidera à accomplir Ma Volonté sur la Terre. [...]C'est un prêtre selon Mon cœur, ses efforts Me sont agréables. [...] Sa pensée est étroitement unie à Ma pensée…je ne le laisserai pas se tromper, et toi, ne fais rien sans son autorisation » (Le Petit Journal 53, 86, 90, 1256, 1408).

Misheli ntiyahinyuye ayo amabonekerwa ya Fawustina, yarayemeye kandi yitangira kwamamaza impuhwe z’Imana (propagateur ardent de la Divine Miséricorde). Ni we wemereye umunyabugeni Eugeniusz Kazimirowski gukora ishusho y’impuhwe z’Imana. Ni imwe tuzi yanditseho « Yezu ndakwizera. Misheli yanditse ibitabo byinshi bivuga ku mpuhwe z’Imana (quatre volumes de ‘La miséricorde de Dieu dans ses œuvres’) no ku burezi (pédagogie) kuko nabwo yabwize.  Misheli Sopoko yabaye umufasha mu kwiyunga n’Imana (confesseur) w’abasaseridoti n’abihayimana, harimo na mutagatifu Fawustina yari abereya umubyeyi wa roho (père spirituel). 

Asangiye n'aba batagatifu n'Abahire kwamamaza Impuhwe z’Imana. Abo ni  Fawustina Kowalska,  Siperansiya wa Yezu , Yohani Yozefu Lataste , Tereza w’Umwana Yezu , Yohani Pawulo wa II  na  Ludoviko Orione. 

Umuryango yashinze wavukiye i Vilnius mu 1942, ubanza guhura n’ingorane, uvuka byuzuye kuwa 25 Kanama 1947. Wemewe ku rwego rwa diyosezi kuwa 2 Kanama 1995, na ho ku rwego rwa kiliziya yose ni kuwa 13 Gicuransi 2008, wemewe na Papa Benedigito wa XVI. Ufite intego yo kwamamaza ubuyoboke bwo kwiyambaza impuhwe z’Imana n’ubutumwa bunyuranye mu maparuwasi (dévotion a la miséricorde divine et apostolat dans les paroisses).

Misheli Sopoko yitabye Imana kuwa 15 Gashyantare 1975 mu gihugu cya Pologne. Ni Papa Benedigito wa XVI wamushyize mu rwego rw’Abahire kuwa 28 Nzeri 2008. Kiliziya imuhimbaza kuwa 15 Gashyantare. 

[ Ushaka ku menya amateka y’abatagatifu batandukanye twateguye ? Nyura kuri buri umwe hasi aha, urabona amahuza (Links) akugeza ku nkuru zivuga kuri buri mutagatifu twanyujije kuri uru rubuga. Mutagatifu Alufonsi  ,   Mutagatifu Matilida  ,  Mutagatifu Jisela  ,  Mutagatifu Fransisko ]

Umuhire Misheli Sopoko, udusabire !