Mutagatifu Ludoviko Orione, Umuhamya w’impuwe z’Imana

Mutagatifu Ludoviko (Don Orione ou Louis Orione) yavukiye i Pontecurone muri diyosezi ya Tortone, kuwa 23 Kamena 1872. Mu 1886 yagiye mu kigo cy’Abasaleziyani cyayoborwaga na mutagatifu Yohani Bosiko, waje kumubera umujyanama. Mu 1889, yavuye mu baseleziyani, ajya gutangira Seminari ya diyosezi ya Tortone. Yahawe ubupadiri kuwa 13 Mata 1895. Don Orione yitangiye kwamamaza Ivanjili, yohereza abamisiyoneri ngo bajye kwamamaza Yezu Kristu mu bihugu byinshi nka Brésil mu 1913, Argentine, Uruguay na Palestine mu 1921, Pologne mu 1923, Rhodes mu 1925, Amerika mu 1934, Ubwongereza mu 1935 na Albanie mu 1936.

[ Ushaka ku menya amateka y’abatagatifu batandukanye twateguye ? Nyura kuri buri umwe hasi aha, urabona amahuza (Links) akugeza ku nkuru zivuga kuri buri mutagatifu twanyujije kuri uru rubuga. Mutagatifu Alufonsi  ,   Mutagatifu Matilida  ,  Mutagatifu Jisela  ,  Mutagatifu Fransisko Sipineli ]

Mu 1899 nibwo Don Orione yashinze umuryango w’Abihayimana (Petite œuvre de la divine providence), kugira ngo n’abatabona babashe kubaho mu buzima bw’uwihayimana ubaho yitaruye abantu (une vie érémitique). Nyuma y’uko uyu muryango wemewe na Diyosezi kuwa 21 Werurwe 1903, Don Orione yakoze amasezerano yo kwiha Imana mu 1909, yakirwa na papa Piyo wa X, wanaje kumutorera kuba igisonga cy’umwepiskopi (vicaire épiscopal) wa diyosezi ya Messine mu Butaliyani.

Kuwa 29 kamena 1915, Don Orione yashinze ishami ry’abakobwa, abamisiyoneri b’urukundo (Petites Sœurs missionnaires de la charité), rihuje amatwara na basaza babo. Yashinze kandi ababikira bashengerera Isakaramentu (Sœurs adoratrices sacramentines), aba bakiraga n’abashaka kwiha Imana batabona. 

Don Orione yitabye Imana kuwa 12 Werurwe 1940. Ntiyahise atwarwa n’ubushyanguke kuko mu 1965 byemejwe (reconnaissance canonique) ko umubiri we utashyangutse muri iyo myaka 25 yari ishize.  Mu 1980, bamwimura aho yari ashyinguwe, na bwo basanze atarashyanguka. Ni Papa mutagatifu Pawulo wa VI wamutangaje nk’Umwubaha (Vénérable) kuwa 6 Gashyantare 1978. Kuwa 26 Ukwakira 1980, mutagatifu Papa Yohani Pawulo wa II amutangaza nk’Umuhire (Bienheureux), amwandika mu gitabo cy’abatagatifu kuwa 16 Gashyantare 2004. Tumwizihiza kuwa 12 Werurwe.

Asangiye n'aba batagatifu n'Abahire kwamamaza Impuhwe z’Imana. Abo ni  Fawustina Kowalska,  Misheli ,  Siperansiya wa Yezu , Yohani Yozefu Lataste , Tereza w’Umwana Yezu ,na  Yohani Pawulo wa II .