Menya ubuzima bw’Umuhire Ana Mariya Adorini

Anne Marie Adorni

Ana Mariya Adorini (Anne Marie Adorni), umubikira wo mu butaliyani, yavutse kuwa 19 Kamena 1805 i Fivizzano yitaba Imana kuwa 7 Gashyantare mu 1893 i Parme. Kuva mu buto bwe yifuzaga kuziha Imana, akibera umumisiyoneri. Nyuma y’uko ise, Matteo Adorni, yitaba Imana mu 1820, we na Nyina Antonia Zanetti bimukiye i Parme. Ni ho yaboneye akazi ko kwigisha abana b’umwe mu bakire bo muri uwo mugi. Muri icyo gihe kandi Adorini yifuje kujya kwiha Imana mu muryango w’Abakaralisa (clarisses capucines) azitirwa n’uko nyina umubyara atifuzaga ko yiha Imana.  Yaje gushyingiranwa na Antoni Dominiko Boti (Antoine Dominique Botti), babyarana abana batandatu, batanu bapfa bakiri bato. Uwasigaye na we, Léopold, yagiye kwiha Imana mu muryango w’ababenedigitini (ordre bénédictin).

Nyuma y’uko umugabo wa Adorini apfuye kuwa 23 Werurwe 1844, uwo mubyeyi wari usigaye wenyine yongeye gutekereza kwiha Imana ariko umujyanama we (confesseur) amusaba kutagira umuryango w’abihayimana ajyamo ahubwo akitangira abagore bafunzwe. Icyo gikorwa cyo kwitangira abagore bafunzwe cyarakunzwe cyane, butuma abandi bagore baza kwiyunga na Adorini bashinga ishyirahamwe ry’abagore basura abagore bafunzwe (union pieuse des femmes visiteuses de femmes emprisonnées), ryemerwa, ku rwego rwa kiliziya mu 1847. Kuwa 1 Gicurasi 1857, nibwo Adorini yashinze umuryango w’ababikira kugira ngo umufashe gukomeza kwita ku bagore bafunguwe ndetse no ku burere bw’abana b’abakobwa bahuye n’ingaruka z’ubuzerezi n’indi myitwarire igayitse. Uwo muryango yawise ‘congrégation des servantes de l'Immaculée Conception de Marie de Parme’.

Ni Papa Pawulo wa VI wamutangaje nk’ukwiye kubahwa (le Vénérable), atangazwa nk’Umuhire (la Bienheureuse) na Karidinali Angelo ukuriye urwego rushinzwe ibijyanye n’abatagitifu, abikoze mu izina rya Papa Benedigito wa XVI. Hari kuwa 3 Ukwakira 2010, muri kiliziya ya Katederali ya Parme. Kiliziya imuhimbaza kuwa 7 Gashyantare.